‘ಅಕ್ಕ’ ವೆಬ್ ಸರಣಿಯಲ್ಲಿ ರೆಟ್ರೋ ಲುಕ್: ಜೀನತ್ ಅಮಾನ್ ಸ್ಟೈಲ್‌ನಿಂದ ಸ್ಫೂರ್ತಿ ಪಡೆದ ರಾಧಿಕಾ ಆಪ್ಟೆ

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:‌

ಬಾಲಿವುಡ್‌ ನಟಿ ರಾಧಿಕಾ ಆಪ್ಟೆ ತಮ್ಮ ಮುಂಬರುವ ಪೀರಿಯಡ್ ಕ್ರೈಮ್ ಥ್ರಿಲ್ಲರ್ ‘ಅಕ್ಕ’ ವೆಬ್ ಸರಣಿಯ ತಮ್ಮ ಲುಕ್‌ಗಾಗಿ ಹಿರಿಯ ನಟಿ ಜೀನತ್ ಅಮಾನ್ ಅವರ ಐಕಾನಿಕ್ ಕೇಶವಿನ್ಯಾಸ ಮತ್ತು ಶೈಲಿಯಿಂದ ಸ್ಫೂರ್ತಿ ಪಡೆದಿರುವುದಾಗಿ ತಿಳಿಸಿದ್ದಾರೆ. ಈ ಸರಣಿಯಲ್ಲಿ ಅವರು ‘ರುದ್ರಾ’ ಎಂಬ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

70ರ ದಶಕದ ರೆಟ್ರೋ ಲುಕ್

‘ಅಕ್ಕ’ ವೆಬ್ ಸರಣಿಯ ಕಥೆಯು 1970ರ ದಶಕದ ಹಿನ್ನೆಲೆಯಲ್ಲಿ ಸಾಗಲಿದ್ದು, ರಾಧಿಕಾ ಆಪ್ಟೆ ಅವರ ಪಾತ್ರ ಮುಂಬೈ ಮೂಲದ್ದಾಗಿದೆ. ಆ ಕಾಲದ ಶೈಲಿಯನ್ನು ಮರುಸೃಷ್ಟಿಸಲು ಚಿತ್ರತಂಡ ಜೀನತ್ ಅಮಾನ್ ಅವರ ಆನ್-ಸ್ಕ್ರೀನ್ ಲುಕ್‌ಗಳನ್ನು ರೆಫರೆನ್ಸ್ ಆಗಿ ಬಳಸಿಕೊಂಡಿದೆ. ಈ ಬಗ್ಗೆ ಮಾತನಾಡಿರುವ ರಾಧಿಕಾ, “ನನ್ನ ಕಾಸ್ಟ್ಯೂಮ್ ಮತ್ತು ಹೇರ್ ಸ್ಟೈಲಿಂಗ್ ಮಾಡುವಾಗ ಜೀನತ್ ಅಮಾನ್ ಅವರ ಫ್ರಿಂಜ್ ಹೇರ್ ಸ್ಟೈಲ್ ಅನ್ನು ಗಮನದಲ್ಲಿಟ್ಟುಕೊಂಡು ವಿಗ್ ಹಾಗೂ ವಸ್ತ್ರವಿನ್ಯಾಸವನ್ನು ಸಿದ್ಧಪಡಿಸಲಾಯಿತು” ಎಂದಿದ್ದಾರೆ.

ಇದನ್ನೂ ಓದಿ:

ಮಹಿಳಾ ಗ್ಯಾಂಗ್‌ಸ್ಟರ್‌ಗಳ ನಡುವಿನ ಸಂಘರ್ಷ

ಈ ವೆಬ್ ಸರಣಿಯ ಪ್ರಮುಖ ಆಕರ್ಷಣೆಯೇ ಇದರ ಮಹಿಳಾ ಪ್ರಧಾನ ಗ್ಯಾಂಗ್‌ಸ್ಟರ್ ಜಗತ್ತು. ಇಲ್ಲಿ ಕೇವಲ ಒಳ್ಳೆಯ ಅಥವಾ ಕೆಟ್ಟ ಪಾತ್ರಗಳಿಗಿಂತ, ನೈತಿಕವಾಗಿ ಸಂಕೀರ್ಣವಾಗಿರುವ ಪಾತ್ರಗಳು ಕಥೆಯನ್ನು ಮುನ್ನಡೆಸುತ್ತವೆ. ಧರ್ಮರಾಜ್ ಶೆಟ್ಟಿ ನಿರ್ದೇಶಿಸಿರುವ ಈ ಸರಣಿಯಲ್ಲಿ ಕೀರ್ತಿ ಸುರೇಶ್ ‘ಭವಾನಿ’ ಎಂಬ ಡಾನ್ ಪಾತ್ರದಲ್ಲಿ ನಟಿಸಿದ್ದರೆ, ರಾಧಿಕಾ ಆಪ್ಟೆ ಅವಳಿಗೆ ಸವಾಲು ಹಾಕುವ ಎದುರಾಳಿ ‘ರುದ್ರಾ’ ಆಗಿ ಬಣ್ಣ ಹಚ್ಚಿದ್ದಾರೆ.

ವೈಆರ್‌ಎಫ್ ಎಂಟರ್‌ಟೈನ್‌ಮೆಂಟ್ ನಿರ್ಮಿಸಿರುವ ‘ಅಕ್ಕ’ ವೆಬ್ ಸರಣಿಯು ಅಕ್ಟೋಬರ್ 30 ರಂದು ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಗೊಳ್ಳಲಿದೆ.