ತಾರೆಯರಿಗೂ ತಟ್ಟಿದ ವಾಯುಮಾಲಿನ್ಯದ ಬಿಸಿ: ಮುಂಬೈ ಗಾಳಿಯ ಗುಣಮಟ್ಟದ ಬಗ್ಗೆ ನಟಿ ಜೂಹಿ ಚಾವ್ಲಾ ಕಳವಳ

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:‌

ದೇಶದ ವಾಣಿಜ್ಯ ನಗರಿ ಮುಂಬೈನಲ್ಲಿ ಹೆಚ್ಚುತ್ತಿರುವ ವಾಯುಮಾಲಿನ್ಯದ ಕುರಿತು ಬಾಲಿವುಡ್ ನಟಿ ಜೂಹಿ ಚಾವ್ಲಾ ತೀವ್ರ ಆತಂಕ ವ್ಯಕ್ತಪಡಿಸಿದ್ದಾರೆ. ಕಳೆದ ಕೆಲವು ದಿನಗಳಿಂದ ಗಾಳಿಯಲ್ಲಿ ಇಂಧನ ಸುಟ್ಟಂತಹ ವಿಚಿತ್ರ ವಾಸನೆ ಬರುತ್ತಿರುವುದನ್ನು ಗಮನಿಸಿರುವ ಅವರು, ಈ ಕುರಿತು ಸಾಮಾಜಿಕ ಜಾಲತಾಣ ‘ಎಕ್ಸ್’ ಮೂಲಕ ಸಾರ್ವಜನಿಕರನ್ನು ಪ್ರಶ್ನಿಸಿದ್ದಾರೆ.

ಜೂಹಿ ಚಾವ್ಲಾ ಪೋಸ್ಟ್‌ನಲ್ಲಿ ಏನಿದೆ?

“ಗಾಳಿಯಲ್ಲಿ ಬರುತ್ತಿರುವ ಈ ವಿಚಿತ್ರವಾದ ಇಂಧನ ಸುಟ್ಟ ವಾಸನೆ ಏನು ಎಂದು ಯಾರಾದರೂ ದಯವಿಟ್ಟು ಹೇಳುತ್ತೀರಾ? ಇದು ಬಹುತೇಕ ಸೀಮೆಎಣ್ಣೆ ಅಥವಾ ಡೀಸೆಲ್ ವಾಸನೆಯಂತಿದೆ. ಕಳೆದ ಹಲವು ದಿನಗಳಿಂದ ಮುಂಜಾನೆಯಿಂದ ಹಿಡಿದು ದಿನದ ವಿವಿಧ ಸಮಯಗಳಲ್ಲಿ ನಾನು ಇದನ್ನು ಗಮನಿಸುತ್ತಿದ್ದೇನೆ. ನಿಮಗೂ ಈ ರೀತಿಯ ವಾಸನೆ ಬರುತ್ತಿದೆಯೇ? ದಯವಿಟ್ಟು ತಿಳಿಸಿ” ಎಂದು ಜೂಹಿ ಚಾವ್ಲಾ ಬರೆದುಕೊಂಡಿದ್ದಾರೆ.

ನಟಿ ಭೂಮಿ ಪೆಡ್ನೇಕರ್ ಕೂಡ ಧ್ವನಿ ಎತ್ತಿದ್ದರು

ಇತ್ತೀಚೆಗೆ ನಟಿ ಭೂಮಿ ಪೆಡ್ನೇಕರ್ ಕೂಡ ಇನ್‌ಸ್ಟಾಗ್ರಾಮ್ ಪೋಸ್ಟ್ ಮೂಲಕ ವಾಯುಮಾಲಿನ್ಯದ ಅಪಾಯಗಳ ಬಗ್ಗೆ ಎಚ್ಚರಿಸಿದ್ದರು. ದೀಪಾವಳಿ ಸಂಭ್ರಮದ ನಂತರ ಉಂಟಾಗುವ ಪಟಾಕಿ ತ್ಯಾಜ್ಯ ಮತ್ತು ಮಾಲಿನ್ಯವು ಮಕ್ಕಳು, ವೃದ್ಧರು, ಉಸಿರಾಟದ ಸಮಸ್ಯೆ ಇರುವವರು ಹಾಗೂ ಪ್ರಾಣಿಗಳ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದರು.

ಇದನ್ನೂ ಓದಿ:

ಮುಂಬೈ ಗಾಳಿಯ ಗುಣಮಟ್ಟ ಹೇಗಿದೆ?

ಮುಂಬೈ ಮಹಾನಗರ ಪಾಲಿಕೆಯ (BMC) ಪರಿಸರ ಪೋರ್ಟಲ್ ಮಾಹಿತಿಯ ಪ್ರಕಾರ, ಮುಂಬೈ ನಗರದ ಗಾಳಿಯು ‘ಕಳಪೆ’ ಮತ್ತು ‘ಅನಾರೋಗ್ಯಕರ’ ಹಂತಕ್ಕೆ ತಲುಪಿದೆ. ನಗರದಾದ್ಯಂತ ವಾಯು ಗುಣಮಟ್ಟ ಸೂಚ್ಯಂಕ 132 ರಿಂದ 153 ರಷ್ಟಿದ್ದು, ಅಂಬಿವಲಿಯಲ್ಲಿ 159, ಬಾಂದ್ರಾ ಕುರ್ಲಾ ಕಾಂಪ್ಲೆಕ್ಸ್‌ನಲ್ಲಿ 155 ಹಾಗೂ ಅಂಧೇರಿ ಪೂರ್ವ ಭಾಗಗಳಲ್ಲಿ ಮಾಲಿನ್ಯದ ಪ್ರಮಾಣ ಹೆಚ್ಚಾಗಿದೆ.

ಮಾಲಿನ್ಯ ಹೆಚ್ಚಾಗಲು ಪ್ರಮುಖ ಕಾರಣಗಳೇನು?

ಮುಂಬೈನಲ್ಲಿ ನಿರಂತರವಾಗಿ ನಡೆಯುತ್ತಿರುವ ಕಟ್ಟಡ ನಿರ್ಮಾಣ ಹಾಗೂ ರಸ್ತೆ ಕಾಮಗಾರಿಗಳ ಧೂಳು, ಭಾರೀ ವಾಹನಗಳ ಹೊಗೆ ಮತ್ತು ನವೆಂಬರ್ ತಿಂಗಳ ಶುಷ್ಕ ಹವಾಮಾನದಲ್ಲಿ ಗಾಳಿಯ ವೇಗ ಕಡಿಮೆಯಾಗಿರುವುದರಿಂದ ಮಾಲಿನ್ಯಕಾರಕ ಕಣಗಳು ಭೂಮಿಯ ಮೇಲ್ಮೈಯಲ್ಲೇ ಉಳಿದುಕೊಂಡಿವೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.