600ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದ ಖ್ಯಾತ ಕಲಾವಿದ ಗಿರಿ ಬಾಬು ನಿಧನ

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:

ತೆಲುಗು ಚಿತ್ರರಂಗದ ಹಿರಿಯ ನಟ ಗಿರಿ ಬಾಬು (80) ಶನಿವಾರ ನಿಧನರಾಗಿದ್ದಾರೆ. ಹೈದರಾಬಾದ್‌ನ ಕೊಂಡಾಪುರದಲ್ಲಿರುವ ಖಾಸಗಿ ಆಸ್ಪತ್ರೆಯಲ್ಲಿ ವಯೋಸಹಜ ಅನಾರೋಗ್ಯಕ್ಕೆ ಚಿಕಿತ್ಸೆ ಪಡೆಯುತ್ತಿದ್ದ ಅವರು ಕೊನೆಯುಸಿರೆಳೆದಿದ್ದಾರೆ.

1946ರ ಜೂನ್ 8ರಂದು ಪ್ರಕಾಶಂ ಜಿಲ್ಲೆಯ ರವಿನುತಲ ಗ್ರಾಮದಲ್ಲಿ ಜನಿಸಿದ ಗಿರಿ ಬಾಬು, 1973ರಲ್ಲಿ ತೆರೆಕಂಡ ‘ಜಗಮೇ ಮಾಯ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಪ್ರವೇಶಿಸಿದರು. ಆರಂಭದಲ್ಲಿ ಖಳನಟನಾಗಿ ಗುರುತಿಸಿಕೊಂಡ ಅವರು, ನಂತರ ನಾಯಕ ನಟ ಹಾಗೂ ಪೋಷಕ ಕಲಾವಿದನಾಗಿಯೂ ತಮ್ಮ ಅಭಿನಯ ಸಾಮರ್ಥ್ಯವನ್ನು ಸಾಬೀತುಪಡಿಸಿದರು.

ಐದು ದಶಕಗಳ ಸಿನಿ ಪಯಣ

ಸುಮಾರು ಐದು ದಶಕಗಳ ಸುದೀರ್ಘ ಸಿನಿ ಪಯಣದಲ್ಲಿ 600ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿರುವುದು ಅವರ ಕಲಾ ಬದುಕಿನ ವಿಶೇಷ ಸಾಧನೆಯಾಗಿದೆ. ತೆಲುಗು ಚಿತ್ರರಂಗದ ಹಲವು ಪ್ರಮುಖ ನಟರು ಮತ್ತು ನಿರ್ದೇಶಕರೊಂದಿಗೆ ಕೆಲಸ ಮಾಡಿದ್ದ ಅವರು, ವಿಭಿನ್ನ ಪಾತ್ರಗಳ ಮೂಲಕ ಪ್ರೇಕ್ಷಕರ ಮನಸ್ಸಿನಲ್ಲಿ ವಿಶೇಷ ಸ್ಥಾನ ಸಂಪಾದಿಸಿದ್ದರು.

ಇದನ್ನೂ ಓದಿ:

ನಿರ್ಮಾಪಕ, ನಿರ್ದೇಶಕರಾಗಿಯೂ ಗುರುತು

ನಟನೆಗೆ ಮಾತ್ರ ಸೀಮಿತವಾಗದೆ ನಿರ್ಮಾಣ ಮತ್ತು ನಿರ್ದೇಶನ ಕ್ಷೇತ್ರದಲ್ಲಿಯೂ ಗಿರಿ ಬಾಬು ತಮ್ಮ ಪ್ರತಿಭೆ ಪ್ರದರ್ಶಿಸಿದ್ದರು. ‘ಸಿಂಹ ಗರ್ಜನ’, ‘ಮೆರುಪು ದಾಡಿ’ ಹಾಗೂ ‘ಇಂದ್ರಜಿತ್’ ಸೇರಿದಂತೆ ಹಲವು ಚಿತ್ರಗಳನ್ನು ನಿರ್ಮಿಸಿದ್ದರು. ‘ರಣರಂಗಂ’, ‘ಇಂದ್ರಜಿತ್’ ಮತ್ತು ‘ನೀ ಸುಖಮೇ ನೇ ಕೋರುಕುನ್ನಾ’ ಚಿತ್ರಗಳಿಗೆ ನಿರ್ದೇಶನ ನೀಡಿದ್ದರು.

2023ರಲ್ಲಿ ಬಿಡುಗಡೆಯಾದ ‘ಅನ್ನಿ ಮಂಚಿ ಶಕುಣಮೂಲೆಯು’ ಅವರ ಕೊನೆಯ ತೆರೆಕಂಡ ಚಿತ್ರವಾಗಿತ್ತು.

ಕುಟುಂಬದ ಹಿನ್ನೆಲೆ

2016ರಲ್ಲಿ ಅನಾರೋಗ್ಯದಿಂದ ಪತ್ನಿಯನ್ನು ಕಳೆದುಕೊಂಡಿದ್ದ ಗಿರಿ ಬಾಬು ಅವರಿಗೆ ಇಬ್ಬರು ಪುತ್ರರಿದ್ದಾರೆ. ಅವರ ಪುತ್ರರಾದ ಬೋಸ್ ಬಾಬು ಮತ್ತು ಖ್ಯಾತ ಹಾಸ್ಯನಟ ರಘು ಬಾಬು ಕೂಡ ಚಿತ್ರರಂಗದಲ್ಲಿ ಗುರುತಿಸಿಕೊಂಡಿದ್ದಾರೆ.