November 16, 2026
Monday, November 16, 2026
spot_img

‘Belonging: A Journey of Love’ | ಕುಟುಂಬದ ಸುತ್ತ ಹೆಣೆದ ಸುಳ್ಳುಗಳಿಗೆ ಉತ್ತರಿಸಲು ಪುಸ್ತಕ ಬರೆದೆ: ಸೋನಿಯಾ ಗಾಂಧಿ

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:

ತಮ್ಮ ಕುಟುಂಬದ ಕುರಿತು ವರ್ಷಗಳಿಂದ ಹರಿದಾಡುತ್ತಿರುವ ಸುಳ್ಳು ಕಥನಗಳಿಗೆ ತೆರೆ ಎಳೆಯುವ ಉದ್ದೇಶದಿಂದಲೇ ಆತ್ಮಕಥನ ಬರೆದಿದ್ದೇನೆ ಎಂದು ಕಾಂಗ್ರೆಸ್ ಸಂಸದೀಯ ಪಕ್ಷದ ಅಧ್ಯಕ್ಷೆ ಸೋನಿಯಾ ಗಾಂಧಿ ಹೇಳಿದ್ದಾರೆ. ಸೋಮವಾರ ಸಂಜೆ ನವದೆಹಲಿಯಲ್ಲಿ ನಡೆದ ಸಮಾರಂಭದಲ್ಲಿ ತಮ್ಮ ‘Belonging: A Journey of Love’ ಕೃತಿಯನ್ನು ಅವರು ಅಧಿಕೃತವಾಗಿ ಬಿಡುಗಡೆ ಮಾಡಿದರು.

ವಾಸ್ತವಕ್ಕೆ ದೂರವಾದ ಸಂಗತಿ

ಪುಸ್ತಕ ಬಿಡುಗಡೆ ಸಮಾರಂಭದಲ್ಲಿ ಮಾತನಾಡಿದ ಸೋನಿಯಾ ಗಾಂಧಿ, ತಮ್ಮ ಅತ್ತೆ, ಪತಿ, ಮಗ, ಮಗಳು ಹಾಗೂ ತಮ್ಮ ಬಗ್ಗೆಯೂ ಸಾಕಷ್ಟು ಸಂಗತಿಗಳನ್ನು ಹೇಳಲಾಗಿದೆ. ಆದರೆ ಅವುಗಳಲ್ಲಿ ಬಹುತೇಕವು ವಾಸ್ತವಕ್ಕೆ ದೂರವಾಗಿವೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು. ವ್ಯಕ್ತಿಗಳ ಸುತ್ತ ಸುಳ್ಳು ಕಥೆಗಳನ್ನು ಹೆಣೆಯಲಾಗುತ್ತದೆ, ನೋವುಂಟುಮಾಡುವ ಮಾತುಗಳನ್ನು ಹರಡಲಾಗುತ್ತದೆ. ತಮ್ಮ ಕುಟುಂಬದ ಬಗ್ಗೆ ತಮಗೆ ತಿಳಿದಿರುವ ಸಂಗತಿಗಳು ಮತ್ತು ವೈಯಕ್ತಿಕ ಭಾವನೆಗಳನ್ನು ಓದುಗರೊಂದಿಗೆ ಹಂಚಿಕೊಳ್ಳಲು ಈ ಪುಸ್ತಕ ಒಂದು ಅವಕಾಶವಾಗಿದೆ ಎಂದು ತಿಳಿಸಿದರು.

‘Belonging’ ಶೀರ್ಷಿಕೆಯ ಹಿಂದಿನ ಭಾವನೆ

ಪುಸ್ತಕದ ಶೀರ್ಷಿಕೆಯ ಅರ್ಥವನ್ನು ವಿವರಿಸಿದ ಅವರು, ಹೊಸ ಪರಿಸರದಲ್ಲಿ ಹೊರಗಿನವರಂತೆ ಭಾಸವಾಗುವುದು, ಪ್ರತಿಯೊಂದು ಹೆಜ್ಜೆಯನ್ನೂ ಜನರು ಗಮನಿಸುತ್ತಿದ್ದಾರೆ ಎಂಬ ಭಾವನೆ ಕಾಡುವುದು ಸಹಜ ಎಂದರು. ಒಂದು ಕುಟುಂಬ ಅಥವಾ ಸಮಾಜದಲ್ಲಿ ಒಪ್ಪಿಗೆ ಪಡೆಯಲು ನಡೆಸುವ ಪ್ರಯತ್ನವೇ ಕೊನೆಗೆ ಸೇರಿದ ಭಾವನೆಯನ್ನು ಮೂಡಿಸುತ್ತದೆ ಎಂದು ಹೇಳಿದರು.

ಮದುವೆಯಾಗಿ ಪತಿಯ ಮನೆಗೆ ಪ್ರವೇಶಿಸುವ ಭಾರತೀಯ ಮಹಿಳೆಯರ ಅನುಭವಕ್ಕೂ ತಮ್ಮ ಬದುಕಿಗೂ ಸಾಮ್ಯವಿದೆ ಎಂದು ಸೋನಿಯಾ ಅಭಿಪ್ರಾಯಪಟ್ಟರು. ಸಂಪೂರ್ಣ ಭಿನ್ನವಾದ ಸಾಮಾಜಿಕ ಮತ್ತು ಸಾಂಸ್ಕೃತಿಕ ವಾತಾವರಣದಿಂದ ಬಂದಿದ್ದರಿಂದ ತಮಗೆ ಹೊಂದಿಕೊಳ್ಳುವುದು ಮತ್ತಷ್ಟು ಸವಾಲಾಗಿತ್ತು. ಆದರೆ ಭಾರತೀಯ ಮಹಿಳೆಯರೂ ಅತ್ತೆಯ ಮನೆಯ ವಾತಾವರಣಕ್ಕೆ ಹೊಂದಿಕೊಳ್ಳಲು ಸಾಕಷ್ಟು ಕಷ್ಟಪಡುತ್ತಾರೆ ಎಂದರು.

ನವೆಂಬರ್ 10ರಂದು ಮಾರುಕಟ್ಟೆಗೆ ಬಂದಿರುವ ಈ ಪುಸ್ತಕ ಒಂದು ವಾರದೊಳಗೆ ಎರಡು ಲಕ್ಷಕ್ಕೂ ಅಧಿಕ ಪ್ರತಿಗಳ ಮಾರಾಟ ಕಂಡಿದೆ ಎಂದು ವರದಿಯಾಗಿದೆ. ಓದುಗರ ಪ್ರೀತಿಗೆ ಕೃತಜ್ಞತೆ ಸಲ್ಲಿಸಿದ ಸೋನಿಯಾ, ಕೆಲವು ಟೀಕೆಗಳು ಕಟುವಾಗಿದ್ದರೂ, ಕೆಲವು ವಿಮರ್ಶೆಗಳು ಪ್ರಾಮಾಣಿಕವಾಗಿದ್ದವು ಎಂದು ಹೇಳಿದರು.

ಸಮಾರಂಭದಲ್ಲಿ ರಾಹುಲ್ ಗಾಂಧಿ, ಪ್ರಿಯಾಂಕಾ ಗಾಂಧಿ, ಮಲ್ಲಿಕಾರ್ಜುನ ಖರ್ಗೆ ಸೇರಿದಂತೆ ಹಲವು ರಾಜಕೀಯ ನಾಯಕರು ಪಾಲ್ಗೊಂಡಿದ್ದರು. ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್, ಹೇಮಂತ್ ಸೊರೇನ್, ಒಮರ್ ಅಬ್ದುಲ್ಲಾ ಹಾಗೂ ಅಖಿಲೇಶ್ ಯಾದವ್ ಕೂಡ ಉಪಸ್ಥಿತರಿದ್ದರು.

ಇದೇ ವೇಳೆ, ಮಾಜಿ ಪ್ರಧಾನಿ ರಾಜೀವ್ ಗಾಂಧಿ ಅವರೊಂದಿಗಿನ ತಮ್ಮ ಪ್ರೇಮಕಥೆಯನ್ನೂ ಸೋನಿಯಾ ನೆನಪಿಸಿಕೊಂಡರು. ಕೇಂಬ್ರಿಡ್ಜ್‌ನಲ್ಲಿ ಸ್ನೇಹಿತರ ಮೂಲಕ ಪರಿಚಯವಾದ ರಾಜೀವ್ ಅವರೊಂದಿಗೆ ನಡೆದ ಪ್ರೀತಿ, ಮದುವೆಯ ಹಾದಿಯನ್ನು ಸ್ಮರಿಸಿದರು.

Must Read

Skip to toolbar