ಹೊಸದಿಗಂತ ಡಿಜಿಟಲ್ ಡೆಸ್ಕ್:
ರಾವಲ್ಪಿಂಡಿಯ ಚಕ್ಲಾಲಾ ಪ್ರದೇಶದಲ್ಲಿರುವ ನೂರ್ ಖಾನ್ ವಾಯುನೆಲೆ ಮೇಲೆ ಅಫ್ಘಾನಿಸ್ತಾನದ ತಾಲಿಬಾನ್ ಪಡೆಗಳು ಡ್ರೋನ್ ದಾಳಿ ನಡೆಸಿದೆಯೆಂಬ ಮಾಹಿತಿ ಹೊರಬಿದ್ದಿದೆ.
ಕಳೆದ ಮೇ ತಿಂಗಳಲ್ಲಿ ಭಾರತದ ‘ಆಪರೇಷನ್ ಸಿಂಧೂರ್’ ವೇಳೆ ಹಾನಿಗೊಳಗಾಗಿದ್ದ ಈ ವಾಯುನೆಲೆ ಇತ್ತೀಚೆಗೆ ಪುನರ್ನಿರ್ಮಾಣಗೊಂಡಿತ್ತು. ಇದೀಗ ಮತ್ತೆ ದಾಳಿ ಸಂಭವಿಸಿರುವುದು ಪಾಕಿಸ್ತಾನಕ್ಕೆ ತೀವ್ರ ಆಘಾತವಾಗಿದೆ.
ಅಫ್ಘಾನ್ ಅಧಿಕಾರಿಗಳ ಪ್ರಕಾರ, ನೂರ್ ಖಾನ್ ವಾಯುನೆಲೆ ಮಾತ್ರವಲ್ಲದೆ ಕ್ವೆಟ್ಟಾದ 12ನೇ ಡಿವಿಷನ್ ಕೇಂದ್ರ ಹಾಗೂ ಖೈಬರ್ ಪಖ್ತುನ್ಖ್ವಾದ ಖ್ವಾಜೈ ಮಿಲಿಟರಿ ಶಿಬಿರವೂ ಗುರಿಯಾಗಿವೆ. ಕಾಬೂಲ್ ಮತ್ತು ಬಾಗ್ರಾಮ್ ಮೇಲೆ ಪಾಕಿಸ್ತಾನ ನಡೆಸಿದ ಕ್ರಮಗಳಿಗೆ ಪ್ರತೀಕಾರವಾಗಿ ಈ ದಾಳಿ ನಡೆದಿದೆ ಎಂದು ತಾಲಿಬಾನ್ ಹೇಳಿದೆ.
ಇದನ್ನೂ ಓದಿ:
ಪಾಕಿಸ್ತಾನವು ಪ್ರತಿಯಾಗಿ ‘ಗಜಬ್ ಲಿಲ್ ಹಕ್’ ಹೆಸರಿನ ಕಾರ್ಯಾಚರಣೆ ಆರಂಭಿಸಿದ್ದು, ಗಡಿಭಾಗದಲ್ಲಿ ಭಾರೀ ಸೈನಿಕ ಚಟುವಟಿಕೆಗಳು ನಡೆದಿವೆ. ಹಲವಾರು ತಾಲಿಬಾನ್ ಯೋಧರು ಸಾವನ್ನಪ್ಪಿದ್ದು, ನೂರಾರು ಮಂದಿ ಗಾಯಗೊಂಡಿದ್ದಾರೆ ಎಂದು ಪಾಕಿಸ್ತಾನ ಹೇಳಿದೆ.
ಇನ್ನೊಂದೆಡೆ, ಅಫ್ಘಾನ್ ಪಾಕಿಸ್ತಾನದ ಯುದ್ಧವಿಮಾನ ಹೊಡೆದುರುಳಿಸಿರುವುದಾಗಿ ದಾವೆ ಮಾಡಿದ್ದು, ಪಾಕ್ ಅಧಿಕಾರಿಗಳು ಅದನ್ನು ಖಂಡಿಸಿದ್ದಾರೆ. ಎರಡೂ ದೇಶಗಳ ನಡುವಿನ 2,600 ಕಿ.ಮೀ ಗಡಿ ಪ್ರದೇಶದಲ್ಲಿ ಉದ್ವಿಗ್ನತೆ ಹೆಚ್ಚಾಗಿದ್ದು, ಪರಿಸ್ಥಿತಿ ಇನ್ನಷ್ಟು ಗಂಭೀರವಾಗುವ ಸಾಧ್ಯತೆ ಇದೆ.
