ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಉತ್ತರ ಪ್ರದೇಶದ ಮೀರಟ್ನಲ್ಲಿ ನಿವೃತ್ತ ನ್ಯಾಯಾಧೀಶ ಡಾ. ಜ್ಞಾನೇಂದ್ರ ಕುಮಾರ್ ಶರ್ಮಾ ತಮ್ಮ ಪುತ್ರಿಯನ್ನು ವಿಚ್ಛೇದನದ ಬಳಿಕ ಮನೆಗೆ ಅದ್ದೂರಿಯಾಗಿ ಕರೆತಂದು ಎಲ್ಲರ ಗಮನ ಸೆಳೆದಿದ್ದಾರೆ.
ಏಳು ವರ್ಷದ ವೈವಾಹಿಕ ಜೀವನ ಅಂತ್ಯಗೊಂಡ ನಂತರ ಮಗಳು ಪ್ರಣಿತಾಳನ್ನು ಕುಟುಂಬದವರು ಸಂಭ್ರಮದೊಂದಿಗೆ ಸ್ವಾಗತಿಸಿದ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.
ಪ್ರಣಿತಾ ಅವರು 2018ರಲ್ಲಿ ಸೇನಾ ಮೇಜರ್ ಗೌರವ್ ಅಗ್ನಿಹೋತ್ರಿ ಅವರನ್ನು ವಿವಾಹವಾಗಿದ್ದರು. ಆದರೆ ಪರಸ್ಪರ ಹೊಂದಾಣಿಕೆಯ ಕೊರತೆಯಿಂದಾಗಿ ದಂಪತಿ ಕುಟುಂಬ ನ್ಯಾಯಾಲಯದ ಮೂಲಕ ವಿಚ್ಛೇದನ ಪಡೆದಿದ್ದಾರೆ. ಕಾನೂನುಬದ್ಧವಾಗಿ ಸಂಬಂಧ ಮುಕ್ತವಾದ ಬಳಿಕ, ಮಗಳು ಮನೆಗೆ ಮರಳಿದ ಸಂದರ್ಭದಲ್ಲಿ ಕುಟುಂಬವು ವಿಶೇಷ ಸ್ವಾಗತ ಕಾರ್ಯಕ್ರಮವನ್ನು ಆಯೋಜಿಸಿತು.
“I Love My Daughter, My Heart My Soul” ಎಂಬ ಬರಹವಿರುವ ಒಂದೇ ರೀತಿಯ ಕಪ್ಪು ಟೀ-ಶರ್ಟ್ಗಳನ್ನು ಧರಿಸಿದ ಕುಟುಂಬ ಸದಸ್ಯರು ಬ್ಯಾಂಡ್ ವಾದ್ಯದೊಂದಿಗೆ ನೃತ್ಯ ಮಾಡುತ್ತಾ ಮಗಳನ್ನು ಮನೆಗೆ ಕರೆತಂದರು. ರಸ್ತೆಯಲ್ಲಿ ಸಿಹಿ ಹಂಚಿ ಸಂಭ್ರಮಿಸಿದ ದೃಶ್ಯಗಳು ಸ್ಥಳೀಯರ ಗಮನ ಸೆಳೆದವು.
ಈ ಬಗ್ಗೆ ಮಾತನಾಡಿದ ಡಾ. ಜ್ಞಾನೇಂದ್ರ ಕುಮಾರ್ ಶರ್ಮಾ, “ನನ್ನ ಮಗಳು ಮದುವೆ ಜೀವನದಲ್ಲಿ ಸಂತೋಷವಾಗಿರಲಿಲ್ಲ. ಅವಳ ನಗು ಮತ್ತು ನೆಮ್ಮದಿಯನ್ನು ಮರಳಿ ತರುವುದು ತಂದೆಯಾಗಿ ನನ್ನ ಜವಾಬ್ದಾರಿ” ಎಂದು ಹೇಳಿದರು. ವಿಚ್ಛೇದನದ ಸಂದರ್ಭದಲ್ಲಿ ಯಾವುದೇ ಪರಿಹಾರ ಹಣವನ್ನು ಸ್ವೀಕರಿಸಿಲ್ಲ, ಮಗಳ ಸಂತೋಷವೇ ಕುಟುಂಬಕ್ಕೆ ಮುಖ್ಯ ಎಂದು ಅವರು ಸ್ಪಷ್ಟಪಡಿಸಿದರು.
ಈ ಘಟನೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ಕೆಲವರು ತಂದೆಯ ಬೆಂಬಲವನ್ನು ಶ್ಲಾಘಿಸಿದ್ದರೆ, ಇನ್ನೂ ಕೆಲವರು ಇದನ್ನು ಅತಿಯಾದ ಪ್ರದರ್ಶನ ಎಂದು ಟೀಕಿಸಿದ್ದಾರೆ.
