ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿ ಒಡೆತನದ ಬಾಸ್ಟಿಯನ್ ಬಾಂದ್ರಾ ಎಂಬ ಹೊಟೇಲ್ ಇದೇ ಗುರುವಾರ (ಸೆ. 4)ರಂದು ಬಂದ್ ಮಾಡಲಾಗುತ್ತದೆ ಎಂದು ಖುದ್ದು ಶಿಲ್ಪಾ ಶೆಟ್ಟಿಯವರೇ ತಿಳಿಸಿದ್ದಾರೆ.
ತಮ್ಮ ಸಾಮಾಜಿಕ ಜಾಲತಾಣಗಳಲ್ಲಿ ಈ ಕುರಿತಂತೆ ಪೋಸ್ಟ್ ಹಾಕಿರುವ ಅವರು, ಇದೇ ಗುರುವಾರ ಒಂದು ಯುಗಾಂತ್ಯವಾಗಲಿದೆ ಎಂದಿದ್ದಾರೆ.
ಬಾಸ್ಟಿಯನ್ ಹಾಲ್ಪಿಟಾಲಿಟಿ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯಲ್ಲಿ ನಟಿ ಶಿಲ್ಪಾ ಶೆಟ್ಟಿಯವರು ಪಾಲುದಾರರಾಗಿದ್ದಾರೆ. ಆ ಸಂಸ್ಥೆಯಿಂದ ಮುಂಬೈ ಸೇರಿದಂತೆ ನಾನಾ ನಗರಗಳಲ್ಲಿ ಬಾಸ್ಟಿಯನ್ ಹೆಸರಿನಲ್ಲಿ ಅನೇಕ ಐಷಾರಾಮಿ ಹೊಟೇಲ್ ಗಳಿವೆ. ಬೆಂಗಳೂರಿನ ಶಾಂತಲಾ ನಗರದಲ್ಲಿಯೂ ಶಿಲ್ಪಾ ಶೆಟ್ಟಿ ಒಡೆತನದ ಬಾಸ್ಟಿಯನ್ ಗಾರ್ಡನ್ ಸಿಟಿ ಎಂಬ ಹೊಟೇಲ್ ಇದೆ.
ತಮ್ಮ ಸೋಷಿಯಲ್ ಮೀಡಿಯಾ ಪೋಸ್ಟ್ ನಲ್ಲಿ ಹೊಟೇಲ್ ಮುಚ್ಚುವ ಬಗ್ಗೆ ಮಾಹಿತಿ ನೀಡಿರುವ ಶಿಲ್ಪಾ ಶೆಟ್ಟಿ, ‘ಮುಂಬೈನ ಕಣ್ಮಣಿಗಳಲ್ಲೊಂದಾಗಿದ್ದ ಬಾಸ್ಟಿಯನ್ ಬಾಂದ್ರಾ ಹೊಟೇಲ್ನ್ನು ನಾವು ಗುರುವಾರದಂದು ಮುಚ್ಚುತ್ತಿದ್ದೇವೆ. ಅಸಂಖ್ಯ ಸುಂದರ ನೆನಪುಗಳನ್ನು, ಮರೆಯಲಾಗದ ರಾತ್ರಿಗಳನ್ನು ಹಾಗೂ ಅವಿಸ್ಮರಣಿಯ ಸಂದರ್ಭಗಳನ್ನು ನೀಡಿರುವ ಆ ಹೊಟೇಲ್, ಮುಂಬೈನಲ್ಲಿ ರಾತ್ರಿಯ ವೇಳೆ ಜೀವಿಸುವಂಥ ಅನೇಕರ ಜೀವನವನ್ನು ಕಟ್ಟಿಕೊಡುವಲ್ಲಿ ಪ್ರಮುಖ ಪಾತ್ರ ವಹಿಸಿತ್ತು. ಆದರೆ, ಗುರುವಾರದಂದು ಅದು ಅಸ್ತಂಗತವಾಗಲಿದೆ. ಗುರುವಾರ ರಾತ್ರಿಯಂದು ಆ ಹೊಟೇಲ್ ನಲ್ಲಿ ನಮ್ಮ ಆತ್ಮೀಯರಿಗಾಗಿ ವಿದಾಯದ ಪಾರ್ಟಿ ಅಳವಡಿಸಿದ್ದೇವೆ ಎಂದು ಹೇಳಿದ್ದಾರೆ.
‘ಬಾಸ್ಟಿಯನ್ ಬಾಂದ್ರಾ ಮುಚ್ಚಿದರೂ, ಮುಂಬೈನಲ್ಲಿರುವ ತಮ್ಮ ಮತ್ತೊಂದು ನೈಟ್ ಹೋಟೆಲ್ ಆದ ಬಾಸ್ಟಿಯನ್ ಅಟ್ ಟಾಪ್ ಹೊಟೇಲ್ ಎಂದಿನಂತೆ ತನ್ನ ಸೇವೆಯನ್ನು ಮುಂದುವರಿಸುತ್ತದೆ ಎಂದು ಅವರು ತಿಳಿಸಿದ್ದಾರೆ. ಬ್ಯಾಸ್ಟಿಯನ್ ಬಾಂದ್ರಾ ಹೊಟೇಲ್ ನಲ್ಲಿ ಇರುತ್ತಿದ್ದ ಎಲ್ಲಾ ವಿಶೇಷಗಳು ಬಾಸ್ಟಿಯನ್ ಅಟ್ ಟಾಪ್ ಹೊಟೇಲ್ ನಲ್ಲಿ ಮುಂದುವರಿಯುತ್ತವೆ ಎಂದು ಅವರು ತಿಳಿಸಿದ್ದಾರೆ.
ಅಷ್ಟಕ್ಕೂ ಆ ಹೊಟೇಲ್ ಮುಚ್ಚಿದ್ಯಾಕೆ?
ನಟಿ ಶಿಲ್ಪಾ ಶೆಟ್ಟಿ ಹಾಗೂ ಆಕೆಯ ಪತಿ ರಾಜ್ ಶೆಟ್ಟಿ ವಿರುದ್ಧ ಉದ್ಯಮಿಯೊಬ್ಬರಿಗೆ ಕೋಟ್ಯಂತರ ರೂಪಾಯಿ ವಂಚನೆ ಮಾಡಿರುವ ಆರೋಪ ಕೇಳಿಬಂದಿದೆ. ಲೋಟಸ್ ಕ್ಯಾಪಿಟಲ್ ಫೈನಾನ್ಶಿಯಲ್ ಸರ್ವೀಸಸ್ ಲಿಮಿಟೆಡ್ ಎಂಬ ಸಂಸ್ಥೆಯ ನಿರ್ದೇಶಕರಾದ ದೀಪಕ್ ಕೊಠಾರಿ ಎಂಬುವರಿಗೆ ಈ ಶಿಲ್ಪಾ – ರಾಜ್ ದಂಪತಿಯು 60 ಕೋಟಿ ರೂ.ಗಳ ಮೋಸ ಮಾಡಿದ್ದಾರೆಂದು ಹೇಳಲಾಗಿದೆ. ಈ ಕುರಿತಂತೆ, ದೂರು ದಾಖಲಾಗಿರುವ ಬಗ್ಗೆ ಹಲವಾರು ಮಾಹಿತಿಗಳು ಮಾಧ್ಯಮಗಳಲ್ಲಿ ಹರಿದಾಡುತ್ತಿವೆ. ಆ ಹಿನ್ನೆಲೆಯಲ್ಲಿ, ಈ ದಂಪತಿಯು ತಮ್ಮ ಒಡೆತನದ ಬಾಸ್ಟಿಯನ್ ಬಾಂದ್ರಾ ರೆಸ್ಟೋರೆಂಟ್ ಹೊಟೇಲ್ ಮುಚ್ಚುತ್ತಿದ್ದಾರೆ ಮಾಡುತ್ತಿದ್ದಾರೆ ಎಂಬ ಮಾತುಗಳು ಕೇಳಿಬಂದಿವೆ. ಆದರೆ, ಅದೇ ಕಾರಣಕ್ಕಾಗಿಯೇ ಈ ಮುಚ್ಚಲಾಗುತ್ತಿದೆ ಎಂದು ಶಿಲ್ಪಾ ಶೆಟ್ಟಿ ಹೇಳಿಲ್ಲ.
