ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಕನ್ನಡ ಚಿತ್ರರಂಗದಲ್ಲಿ ಈಗ ಎಲ್ಲೆಲ್ಲೂ ‘ಪ್ರೇಮದ ಊರಲಿ’ ಸಿನಿಮಾದ್ದೇ ಹವಾ. ಆರಂಭದಲ್ಲಿ ಯಾವುದೇ ದೊಡ್ಡ ಸದ್ದು ಗದ್ದಲವಿಲ್ಲದೆ ತೆರೆಕಂಡ ಈ ಚಿತ್ರ, ಈಗ ಬಾಕ್ಸ್ ಆಫೀಸ್‌ನಲ್ಲಿ ಅಕ್ಷರಶಃ ಅಬ್ಬರಿಸುತ್ತಿದೆ. ಪ್ರೇಕ್ಷಕರ ಮನ ಗೆದ್ದಿರುವ ಈ ಸಿನಿಮಾ ಸ್ಯಾಂಡ್‌ವುಡ್‌ನಲ್ಲಿ ಹೊಸ ದಾಖಲೆಗಳನ್ನು ನಿರ್ಮಿಸುತ್ತಿದೆ.
ಚಿತ್ರವು ಬಿಡುಗಡೆಯಾಗಿ 19 ದಿನಗಳು ಕಳೆದಿದ್ದರೂ, ಅದರ ಬಾಕ್ಸ್ ಆಫೀಸ್ ಓಟ ಮಾತ್ರ ಸ್ವಲ್ಪವೂ ಕುಗ್ಗಿಲ್ಲ. 19ನೇ ದಿನದಂದು ಬರೋಬ್ಬರಿ 4.75 ಕೋಟಿ ರೂ. ಗ್ರಾಸ್ ಗಳಿಕೆ ಮಾಡುವ ಮೂಲಕ ಈ ಚಿತ್ರ ತನ್ನ ಬಲವನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.
ಮೂರನೇ ವಾರದಲ್ಲೇ 30.75 ಕೋಟಿ ರೂ. ಬಾಚಿಕೊಂಡಿರುವ ಈ ಸಿನಿಮಾ, 19 ದಿನಗಳ ಒಟ್ಟು ಗಳಿಕೆ 63.75 ಕೋಟಿ ರೂ.ಗೆ ತಲುಪಿದೆ. ಸದ್ಯದ ಟ್ರೆಂಡ್ ಗಮನಿಸಿದರೆ, ಈ ವಾರದ ಅಂತ್ಯಕ್ಕೆ ಕಲೆಕ್ಷನ್ 38 ಕೋಟಿ ರೂ. ತಲುಪುವ ನಿರೀಕ್ಷೆಯಿದೆ ಮತ್ತು ಒಟ್ಟಾರೆ ಗಳಿಕೆಯು 70 ಕೋಟಿ ರೂ. ದಾಟಲಿದೆ ಎಂದು ಅಂದಾಜಿಸಲಾಗಿದೆ.
ರಂಗಾಯಣ ರಘು, ಶ್ರೀ ರಾಮ್, ತಪಸ್ವಿನಿ ಪೂಣಚ್ಚ ಮತ್ತು ರಮಿಕಾ ಶಿವು ಮುಂತಾದ ಪ್ರತಿಭಾವಂತ ತಾರಾಗಣವಿರುವ ಈ ರೊಮ್ಯಾಂಟಿಕ್ ಕಾಮಿಡಿ ಡ್ರಾಮಾ ಈಗಾಗಲೇ ದೊಡ್ಡ ಹಿಟ್ ಆಗಿ ಹೊರಹೊಮ್ಮಿದೆ. ಪ್ರಸ್ತುತ ಟ್ರೆಂಡ್ ನೋಡುತ್ತಿದ್ದರೆ, ಈ ಸಿನಿಮಾವು 100 ಕೋಟಿ ರೂ. ಗಳಿಕೆಯ ಮೈಲಿಗಲ್ಲು ದಾಟುವುದು ಖಚಿತ ಎನ್ನಲಾಗುತ್ತಿದೆ.
