ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತದ ಪ್ರಮುಖ ಎಡ್ಟೆಕ್ ಸಂಸ್ಥೆಯಾಗಿದ್ದ ಬೈಜೂಸ್ಗೆ ಮತ್ತೊಂದು ದೊಡ್ಡ ಹಿನ್ನಡೆ ಎದುರಾಗಿದೆ.
ಸಂಸ್ಥಾಪಕ ಬೈಜು ರವೀಂದ್ರನ್ ವಿರುದ್ಧ ಸಿಂಗಾಪುರ ನ್ಯಾಯಾಲಯ ಕಠಿಣ ಕ್ರಮ ಕೈಗೊಂಡಿದ್ದು, ನ್ಯಾಯಾಂಗ ನಿಂದನೆ ಪ್ರಕರಣದಲ್ಲಿ ಆರು ತಿಂಗಳ ಜೈಲು ಶಿಕ್ಷೆ ವಿಧಿಸಿದೆ. ಹಲವು ಬಾರಿ ನೀಡಿದ ಆದೇಶಗಳನ್ನು ಪಾಲಿಸದ ಹಿನ್ನೆಲೆಯಲ್ಲಿ ಕೋರ್ಟ್ ಈ ತೀರ್ಪು ನೀಡಿದೆ.
ಆಸ್ತಿ ವಿವರ ನೀಡಲು ವಿಫಲ
2024ರ ಏಪ್ರಿಲ್ನಿಂದಲೇ ನ್ಯಾಯಾಲಯವು ಬೈಜು ರವೀಂದ್ರನ್ ಅವರಿಗೆ ವೈಯಕ್ತಿಕ ಆಸ್ತಿ, ಮಾಲೀಕತ್ವ ಹಾಗೂ ಹಣಕಾಸು ವಿವರಗಳನ್ನು ಸಲ್ಲಿಸುವಂತೆ ಸೂಚಿಸಿತ್ತು. ಆದರೆ ಅವರು ನಿರಂತರವಾಗಿ ಗಡುವು ಉಲ್ಲಂಘಿಸಿ ಅಗತ್ಯ ದಾಖಲೆಗಳನ್ನು ನೀಡದಿರುವುದನ್ನು ನ್ಯಾಯಾಲಯ ಗಂಭೀರವಾಗಿ ಪರಿಗಣಿಸಿದೆ.
ಇದನ್ನೂ ಓದಿ:
ಅಧಿಕಾರಿಗಳಿಗೆ ಶರಣಾಗುವಂತೆ ಸೂಚನೆ
ಸಿಂಗಾಪುರ ಕೋರ್ಟ್ ತಕ್ಷಣವೇ ಅಧಿಕಾರಿಗಳ ಮುಂದೆ ಹಾಜರಾಗುವಂತೆ ಬೈಜು ರವೀಂದ್ರನ್ ಅವರಿಗೆ ಆದೇಶಿಸಿದೆ. ಜೊತೆಗೆ ಸುಮಾರು 70,500 ಅಮೆರಿಕನ್ ಡಾಲರ್ ಕಾನೂನು ವೆಚ್ಚ ಪಾವತಿಸಬೇಕೆಂದೂ ಸೂಚಿಸಿದೆ. ಪ್ರಕರಣಕ್ಕೆ ಸಂಬಂಧಿಸಿದ ಕಂಪನಿಯ ಮಾಲೀಕತ್ವದ ದಾಖಲೆಗಳನ್ನು ಕೂಡ ಸಲ್ಲಿಸಲು ಹೇಳಲಾಗಿದೆ.
ಸಾಲದ ಸಂಕಷ್ಟದಲ್ಲಿ ಬೈಜೂಸ್
ಬೈಜೂಸ್ ಈಗಾಗಲೇ ಜಾಗತಿಕ ಮಟ್ಟದಲ್ಲಿ ಹೂಡಿಕೆದಾರರು ಹಾಗೂ ಸಾಲದಾತರೊಂದಿಗೆ ಕಾನೂನು ಹೋರಾಟ ಎದುರಿಸುತ್ತಿದೆ. ವಿಶೇಷವಾಗಿ 1.2 ಬಿಲಿಯನ್ ಡಾಲರ್ ಸಾಲ ಮರುಪಾವತಿ ವಿಚಾರ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ. ಈ ಬೆಳವಣಿಗೆ ನಡುವೆಯೇ ಬೈಜು ರವೀಂದ್ರನ್ ಇನ್ನೂ ಯಾವುದೇ ಸಾರ್ವಜನಿಕ ಪ್ರತಿಕ್ರಿಯೆ ನೀಡಿಲ್ಲ.
