ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಆರೋಗ್ಯಕರ ಜೀವನಕ್ಕೆ ನಾವು ಬಳಸುವ ಆಹಾರ ಪದಾರ್ಥಗಳು ಎಷ್ಟು ತಾಜಾವಾಗಿವೆ ಎಂಬುದು ಮುಖ್ಯವಾಗುತ್ತದೆ. ನಮ್ಮ ದೈನಂದಿನ ಅಡುಗೆಯಲ್ಲಿ ಅತ್ಯಂತ ಪ್ರಮುಖ ಪಾತ್ರ ವಹಿಸುವ ಅಡುಗೆ ಎಣ್ಣೆ ಒಂದು ವೇಳೆ ಕೆಟ್ಟುಹೋಗಿದ್ದರೆ, ಅದು ಇಡೀ ಕುಟುಂಬದ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಬಹುದು. ಎಣ್ಣೆಯನ್ನು ಅತಿಯಾಗಿ ಕಾಯಿಸುವುದರಿಂದ ಅಥವಾ ದೀರ್ಘಕಾಲದವರೆಗೆ ಸರಿಯಾಗಿ ಸಂಗ್ರಹಿಸದಿದ್ದರೆ ಅದು ವಿಷಕಾರಿಯಾಗಿ ಬದಲಾಗಬಹುದು. ನಿಮ್ಮ ಮನೆಯಲ್ಲಿರುವ ಅಡುಗೆ ಎಣ್ಣೆ ಬಳಸಲು ಯೋಗ್ಯವಾಗಿದೆಯೇ ಅಥವಾ ಇಲ್ಲವೇ ಎಂಬುದನ್ನು ಪತ್ತೆ ಹಚ್ಚಲು ಇಲ್ಲಿವೆ ಸುಲಭ ವಿಧಾನಗಳು.
ಗಾಢವಾದ ಬಣ್ಣ
ತಾಜಾ ಅಡುಗೆ ಎಣ್ಣೆಯು ಸಾಮಾನ್ಯವಾಗಿ ತಿಳಿ ಹಳದಿ ಅಥವಾ ಪಾರದರ್ಶಕವಾಗಿರುತ್ತದೆ. ಆದರೆ, ನೀವು ಬಳಸುತ್ತಿರುವ ಎಣ್ಣೆಯ ಬಣ್ಣವು ಅತಿಯಾಗಿ ಕಪ್ಪಾಗಿದ್ದರೆ ಅಥವಾ ಗಾಢ ಕಂದು ಬಣ್ಣಕ್ಕೆ ತಿರುಗಿದ್ದರೆ, ಆ ಎಣ್ಣೆ ತನ್ನ ಗುಣಮಟ್ಟವನ್ನು ಕಳೆದುಕೊಂಡಿದೆ ಮತ್ತು ಬಳಕೆಗೆ ಯೋಗ್ಯವಾಗಿಲ್ಲ ಎಂದರ್ಥ.
ಕಮಟು ವಾಸನೆ
ಎಣ್ಣೆ ಕೆಟ್ಟುಹೋಗಿದೆ ಎಂದು ತಿಳಿಯಲು ಅತ್ಯಂತ ಸುಲಭವಾದ ಮಾರ್ಗವೆಂದರೆ ಅದರ ವಾಸನೆ. ಎಣ್ಣೆಯ ಬಾಟಲಿಯನ್ನು ತೆರೆದಾಗ ಅದರಿಂದ ಕಮಟು ವಾಸನೆ, ಹಳಸಿದ ವಾಸನೆ ಅಥವಾ ರಾಸಾಯನಿಕದಂತಹ ತೀಕ್ಷ್ಣವಾದ ದುರ್ವಾಸನೆ ಬರುತ್ತಿದ್ದರೆ ಆ ಎಣ್ಣೆಯನ್ನು ತಕ್ಷಣವೇ ಬಲಿಸಿ.
ಜಿಗುಟುತನ ಹೆಚ್ಚಾಗುವುದು
ಒಳ್ಳೆಯ ಅಡುಗೆ ಎಣ್ಣೆಯು ಹಗುರವಾಗಿದ್ದು, ಸುಲಭವಾಗಿ ಹರಿಯುತ್ತದೆ. ಆದರೆ ಎಣ್ಣೆಯು ತೀರ ದಪ್ಪಗಾಗಿ, ಜಿಗುಟುತನ ಹೆಚ್ಚಾಗಿದ್ದರೆ ಅದು ಕೆಟ್ಟುಹೋಗಿರುವ ಮುನ್ಸೂಚನೆಯಾಗಿದೆ. ಇಂತಹ ಎಣ್ಣೆಯಲ್ಲಿ ಅಡುಗೆ ಮಾಡುವುದರಿಂದ ಜೀರ್ಣಕ್ರಿಯೆಯ ತೊಂದರೆಗಳು ಎದುರಾಗುತ್ತವೆ.
ಬೇಗನೆ ಹೊಗೆ ಬರುವುದು
ಬಳಕೆಗೆ ಯೋಗ್ಯವಾಗಿರುವ ಎಣ್ಣೆಯನ್ನು ಕಾಯಿಸಿದಾಗ ಅದು ನಿರ್ದಿಷ್ಟ ತಾಪಮಾನ ತಲುಪಿದ ಬಳಿಕವಷ್ಟೇ ಹೊಗೆಯಾಡುತ್ತದೆ. ಆದರೆ ಕೆಟ್ಟ ಎಣ್ಣೆಯು ಬಾಣಲೆಗೆ ಹಾಕಿದ ತಕ್ಷಣ ಅಥವಾ ಅಲ್ಪ ಪ್ರಮಾಣದ ಉರಿಯಲ್ಲೇ ವಿಪರೀತವಾಗಿ ಹೊಗೆಯಾಡಲು ಆರಂಭಿಸುತ್ತದೆ. ಇಂತಹ ಎಣ್ಣೆಯಲ್ಲಿ ಕರಿದ ಪದಾರ್ಥಗಳನ್ನು ತಿನ್ನುವುದರಿಂದ ಕ್ಯಾನ್ಸರ್ನಂತಹ ಕಾಯಿಲೆಗಳ ಅಪಾಯ ಹೆಚ್ಚಿರುತ್ತದೆ.
ಇದನ್ನೂ ಓದಿ:
ನೊರೆ ಬರುವುದು
ನೀವು ಬಾಣಲೆಯಲ್ಲಿ ಎಣ್ಣೆಯನ್ನು ಕಾಯಿಸಿ ಅದಕ್ಕೆ ಪದಾರ್ಥಗಳನ್ನು ಹಾಕಿದಾಗ ಎಣ್ಣೆಯ ಮೇಲ್ಭಾಗದಲ್ಲಿ ಅತಿಯಾಗಿ ಸಾಬೂನಿನಂತೆ ನೊರೆ ಅಥವಾ ಗುಳ್ಳೆಗಳು ಬರುತ್ತಿದ್ದರೆ, ಆ ಎಣ್ಣೆಯು ಆಕ್ಸಿಡೀಕರಣಕ್ಕೆ ಒಳಗಾಗಿದೆ ಎಂದು ತಿಳಿಯಬೇಕು. ಇದು ಎಣ್ಣೆ ಹಾಳಾಗಿದೆ ಎಂಬುದರ ಸ್ಪಷ್ಟ ಸಂಕೇತ.
ಕರಿದ ಎಣ್ಣೆಯ ಮರುಬಳಕೆ
ಒಮ್ಮೆ ಪೂರಿ, ಬೋಂಡಾ ಅಥವಾ ಬಜ್ಜಿ ಕರಿಯಲು ಬಳಸಿದ ಎಣ್ಣೆಯನ್ನು ಮತ್ತೆ ಮತ್ತೆ ಕಾಯಿಸಿ ಬಳಸುವುದು ಅತ್ಯಂತ ಅಪಾಯಕಾರಿ. ಕರಿದ ಎಣ್ಣೆಯನ್ನು ಗರಿಷ್ಠ 1 ಬಾರಿ ಮಾತ್ರ ಮರುಬಳಕೆ ಮಾಡಬಹುದು. ಮೂರನೇ ಬಾರಿ ಬಳಸುವಾಗ ಆ ಎಣ್ಣೆಯಲ್ಲಿ ಟ್ರಾನ್ಸ್ ಫ್ಯಾಟ್ ಮತ್ತು ಮುಕ್ತ ರಾಡಿಕಲ್ಗಳು ಹೆಚ್ಚಾಗಿ, ಹೃದಯಾಘಾತದಂತಹ ಅಪಾಯವನ್ನು ತಂದೊಡ್ಡುತ್ತವೆ.
