ರಾತ್ರಿ ನಿದ್ರೆ ಬರ್ತಿಲ್ವಾ? ಈ ಸಣ್ಣ ಅಭ್ಯಾಸ ಬದಲಿಸಿದರೆ ಸಾಕು, ಹಾಸಿಗೆಗೆ ಹೋದ ಕೆಲವೇ ನಿಮಿಷಗಳಲ್ಲಿ ನಿದ್ದೆ!

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ಒಂದು ಕಾಲದಲ್ಲಿ ತಲೆ ದಿಂಬಿಗೆ ತಾಕಿದ ಕೂಡಲೇ ನಿದ್ದೆ ಬರುತ್ತಿತ್ತು. ಆದರೆ ಈಗ ಪರಿಸ್ಥಿತಿ ಬದಲಾಗಿದೆ. ಹಾಸಿಗೆಯಲ್ಲಿ ಮಲಗಿದರೂ ಕಣ್ಣು ಮುಚ್ಚುವುದಿಲ್ಲ. ಮೊಬೈಲ್ ಸ್ಕ್ರೋಲ್ ಮಾಡುತ್ತಾ, ಯೋಚನೆಗಳ ಸುಳಿಯಲ್ಲಿ ಸಿಲುಕುತ್ತಾ ರಾತ್ರಿ ಕಳೆಯುವವರ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಆರೋಗ್ಯ ತಜ್ಞರ ಪ್ರಕಾರ, ನಿದ್ರೆ ಬರದಿರುವುದಕ್ಕೆ ಮುಖ್ಯ ಕಾರಣ ನಮ್ಮ ಜೀವನಶೈಲಿಯೇ.

ಇದನ್ನೂ ಓದಿ:

ಮಲಗುವ ಮುನ್ನ ಗಂಟೆಗಟ್ಟಲೆ ಮೊಬೈಲ್, ಲ್ಯಾಪ್‌ಟಾಪ್ ಅಥವಾ ಟಿವಿ ನೋಡುವ ಅಭ್ಯಾಸ ಮೆದುಳನ್ನು ಎಚ್ಚರ ಸ್ಥಿತಿಯಲ್ಲೇ ಇಡುತ್ತದೆ. ಪರಿಣಾಮವಾಗಿ ದೇಹ ದಣಿದಿದ್ದರೂ ನಿದ್ರೆ ದೂರವಾಗುತ್ತದೆ. ಉತ್ತಮ ನಿದ್ರೆ ಬೇಕಾದರೆ ಮಲಗುವ ಕನಿಷ್ಠ ಒಂದು ಗಂಟೆ ಮೊದಲು ಮೊಬೈಲ್ ಬಳಕೆಯನ್ನು ನಿಲ್ಲಿಸಬೇಕು. ಬದಲಿಗೆ ಪುಸ್ತಕ ಓದುವುದು, ನಿಧಾನ ಸಂಗೀತ ಕೇಳುವುದು ಅಥವಾ ಕೆಲ ನಿಮಿಷ ಧ್ಯಾನ ಮಾಡುವುದು ಮನಸ್ಸಿಗೆ ನೆಮ್ಮದಿ ನೀಡುತ್ತದೆ. ಇದೇ ವೇಳೆ ಪ್ರತಿದಿನ ಒಂದೇ ಸಮಯಕ್ಕೆ ಮಲಗುವುದು ಮತ್ತು ಎದ್ದೇಳುವುದು ದೇಹದ ನೈಸರ್ಗಿಕ ಗಡಿಯಾರವನ್ನು ಸರಿಯಾಗಿಡಲು ಸಹಾಯ ಮಾಡುತ್ತದೆ. ತಜ್ಞರು ಮತ್ತೊಂದು ಪ್ರಮುಖ ಸಲಹೆಯನ್ನೂ ನೀಡುತ್ತಾರೆ. ಮಲಗುವ ಮುನ್ನ ನಾಳೆಯ ಚಿಂತೆ, ಕೆಲಸದ ಒತ್ತಡ ಅಥವಾ ಸಮಸ್ಯೆಗಳ ಬಗ್ಗೆ ಹೆಚ್ಚು ಯೋಚಿಸಬೇಡಿ. ಮನಸ್ಸು ಎಷ್ಟು ಶಾಂತವಾಗಿರುತ್ತದೋ, ನಿದ್ರೆಯೂ ಅಷ್ಟೇ ಬೇಗ ಬರುತ್ತದೆ. ನಿದ್ರೆ ಕೇವಲ ವಿಶ್ರಾಂತಿ ಅಲ್ಲ. ಅದು ದೇಹ ಮತ್ತು ಮೆದುಳಿನ ಆರೋಗ್ಯಕ್ಕೆ ಅತ್ಯಗತ್ಯ. ಆದ್ದರಿಂದ ನಿದ್ರಾಹೀನತೆಯನ್ನು ನಿರ್ಲಕ್ಷಿಸದೆ, ಸರಿಯಾದ ಅಭ್ಯಾಸಗಳನ್ನು ರೂಢಿಸಿಕೊಂಡರೆ ರಾತ್ರಿ ನೆಮ್ಮದಿಯ ನಿದ್ದೆ ನಿಮ್ಮದಾಗಬಹುದು.