ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಆಹಾರ ಕಲಬೆರಕೆ ವಿರುದ್ಧ ಹೈದರಾಬಾದ್ ಪೊಲೀಸರು ಆರಂಭಿಸಿರುವ ವಿಶೇಷ ಕಾರ್ಯಾಚರಣೆಗೆ ಮಹತ್ವದ ಯಶಸ್ಸು ಸಿಕ್ಕಿದೆ.
ಕಳೆದ 100 ದಿನಗಳಲ್ಲಿ H-FAST (Hyderabad Food Adulteration Surveillance Team) ತಂಡ 185 ಪ್ರಕರಣಗಳನ್ನು ದಾಖಲಿಸಿ, ಸುಮಾರು 122 ಟನ್ ಕಳಪೆ ಮತ್ತು ಕಲಬೆರಕೆ ಆಹಾರ ಪದಾರ್ಥಗಳನ್ನು ಜಪ್ತಿ ಮಾಡಿದೆ. ವಿವಿಧ ಇಲಾಖೆಗಳ ಸಹಯೋಗದಲ್ಲಿ ನಗರದ ಹಲವು ಭಾಗಗಳಲ್ಲಿ ದಾಳಿ ನಡೆಸಲಾಗಿದೆ.
ಭಾರಿ ಪ್ರಮಾಣದ ಕಳಪೆ ಆಹಾರ ವಶ
ಕಾರ್ಯಾಚರಣೆಯಲ್ಲಿ ಕಲಬೆರಕೆಯ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ರಾಸಾಯನಿಕ ಬಳಸಿ ಹಣ್ಣಾಗಿಸಿದ ಹಣ್ಣುಗಳು, ಕಳಪೆ ಮಾಂಸ, ಹಾಳಾದ ಉಪ್ಪಿನಕಾಯಿ, ನಕಲಿ ಟೀ ಪುಡಿ, ಕೃತಕ ಪನೀರ್, ಕಳಪೆ ಖೋವಾ, ಮೊಸರು ಹಾಗೂ ಅಸ್ವಚ್ಛ ಫ್ರೈಡ್ ಚಿಕನ್ ಸೇರಿದಂತೆ ಹಲವು ಆಹಾರ ಪದಾರ್ಥಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಇದನ್ನೂ ಓದಿ:
247 ಪ್ರಕರಣಗಳು ಮುಂದಿನ ಕ್ರಮಕ್ಕೆ
ಜಪ್ತಿಯಾದ ಪ್ರಕರಣಗಳಲ್ಲಿ 247 ಪ್ರಕರಣಗಳನ್ನು ಜಿಎಚ್ಎಂಸಿ ಆಹಾರ ಸುರಕ್ಷತಾ ಅಧಿಕಾರಿಗಳಿಗೆ ಕಾನೂನು ಕ್ರಮಕ್ಕಾಗಿ ಹಸ್ತಾಂತರಿಸಲಾಗಿದೆ. ಬೇಕರಿಗಳು, ಪನೀರ್ ಘಟಕಗಳು, ಹೋಟೆಲ್ಗಳು, ಮಾಂಸದ ಅಂಗಡಿಗಳು, ನೀರಿನ ಘಟಕಗಳು ಹಾಗೂ ತ್ವರಿತ ವಿತರಣಾ ಸಂಸ್ಥೆಗಳ ವಿರುದ್ಧವೂ ಕ್ರಮ ಕೈಗೊಳ್ಳಲಾಗಿದೆ.
‘ಆಹಾರ ಕಲಬೆರಕೆ ಎಂದರೆ ಜೀವದ ಜೊತೆ ಆಟ’
ಆಹಾರ ಕಲಬೆರಕೆ ಸಾಮಾನ್ಯ ಅಪರಾಧವಲ್ಲ, ಅದು ಜನರ ಜೀವಕ್ಕೆ ಅಪಾಯ ಉಂಟುಮಾಡುವ ಕೃತ್ಯ ಎಂದು ಪೊಲೀಸ್ ಆಯುಕ್ತ ವಿ.ಸಿ. ಸಜ್ಜನಾರ್ ಹೇಳಿದ್ದಾರೆ. ಇಂತಹ ಪ್ರಕರಣಗಳಲ್ಲಿ ಅಗತ್ಯವಿದ್ದರೆ ಪ್ರಿವೆಂಟಿವ್ ಡಿಟೆನ್ಷನ್ (PD) ಕಾಯ್ದೆ ಅಡಿಯಲ್ಲಿ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಿದ್ದಾರೆ. ಸಾರ್ವಜನಿಕರು ಅನುಮಾನಾಸ್ಪದ ಆಹಾರದ ಬಗ್ಗೆ ಮಾಹಿತಿ ನೀಡುವಂತೆ ಅವರು ಮನವಿ ಮಾಡಿದ್ದಾರೆ.
