ಭೀಕರ ಪ್ರವಾಹಕ್ಕೆ ಜಮ್ಮು-ಕಾಶ್ಮೀರದ ಗಡಿ ಜಿಲ್ಲೆ ತತ್ತರ: ನಡುಬೀದಿಗೆ ಬಂದ ನೂರಾರು ಕುಟುಂಬ

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ಜಮ್ಮು-ಕಾಶ್ಮೀರದ ಗಡಿ ಭಾಗದ ಜಿಲ್ಲೆಯಾದ ರಜೌರಿಯಲ್ಲಿ ಶನಿವಾರ ರಾತ್ರಿಯಿಂದ ಸುರಿದ ಭಾರಿ ಮಳೆಯು ಇಡೀ ಪಟ್ಟಣವನ್ನು ಜಲದಿಗ್ಬಂಧನದಲ್ಲಿ ಸಿಲುಕಿಸಿದೆ. ದಿಢೀರ್ ಸಂಭವಿಸಿದ ಹಠಾತ್ ಪ್ರವಾಹದಿಂದಾಗಿ ಹಲವು ತಗ್ಗು ಪ್ರದೇಶಗಳು ಸಂಪೂರ್ಣ ಮುಳುಗಡೆಯಾಗಿದ್ದು, ನೂರಾರು ಕುಟುಂಬಗಳು ಸುರಕ್ಷಿತ ಸ್ಥಳಗಳಿಗೆ ವಲಸೆ ಹೋಗುವಂತಾಗಿದೆ.

ಉಕ್ಕಿ ಹರಿದ ಪ್ರಮುಖ ನದಿಗಳು

ಶನಿವಾರ ಸಂಜೆಯಿಂದ ಆರಂಭವಾದ ಧಾರಾಕಾರ ಮಳೆಯು ಇಡೀ ರಾತ್ರಿ ಮುಂದುವರಿದ ಕಾರಣ, ಸ್ಥಳೀಯ ಜಲಮೂಲಗಳು ಅಪಾಯದ ಮಟ್ಟ ಮೀರಿವೆ. ಪ್ರಮುಖವಾಗಿ ದರ್ಹಾಲಿ, ಖಂಡ್ಲಿ, ಜಮೋಲಾ ಹಾಗೂ ಸುಕ್ತೋಹ್ ನದಿಗಳು ಭೋರ್ಗರೆದು ಹರಿಯುತ್ತಿದ್ದು, ಪಟ್ಟಣದ ಪ್ರಮುಖ ಭಾಗಗಳಿಗೆ ನೀರು ನುಗ್ಗಲು ಕಾರಣವಾಗಿದೆ.

ಕೊಚ್ಚಿಹೋದ ವಾಹನಗಳು, ಬಸ್ ನಿಲ್ದಾಣ ಜಲಾವೃತ

ಬೆಲಾ ಕಾಲೋನಿ ಬಳಿ ಇದ್ದ ದರ್ಹಾಲಿ ನದಿಯ ಪ್ರವಾಹ ತಡೆಗೋಡೆಯು ನೀರಿನ ರಭಸಕ್ಕೆ ಕೊಚ್ಚಿಹೋಗಿದೆ. ಪರಿಣಾಮವಾಗಿ, ಹೊಸ ಬಸ್ ನಿಲ್ದಾಣದ ಒಳಗೆ ಪ್ರವಾಹದ ನೀರು ನುಗ್ಗಿದ್ದು, ಅಲ್ಲಿ ನಿಲ್ಲಿಸಲಾಗಿದ್ದ ಹತ್ತಾರು ಕಾರುಗಳು, ಬೈಕ್‌ಗಳು ಸೇರಿದಂತೆ ಹಲವು ವಾಹನಗಳು ನೀರಿನಲ್ಲಿ ಮುಳುಗಿವೆ ಹಾಗೂ ಕೆಲವು ವಾಹನಗಳು ಪ್ರವಾಹದ ಭರಾಟೆಗೆ ತೇಲಿಹೋಗಿವೆ. ಸದ್ಯ ಪಟ್ಟಣದಲ್ಲಿ ಜನಜೀವನ ಸಂಪೂರ್ಣವಾಗಿ ಅಸ್ತವ್ಯಸ್ತಗೊಂಡಿದೆ.