ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಚಳಿಗಾಲದಲ್ಲಿ ಎದುರಾಗುವ ದಟ್ಟ ಹೊಗೆ (ಸ್ಮಾಗ್) ಮತ್ತು ವಾಹನಗಳ ಮಾಲಿನ್ಯ ನಿಯಂತ್ರಿಸುವ ಉದ್ದೇಶದಿಂದ ದೆಹಲಿ ಸರ್ಕಾರವು ಇಂದಿನಿಂದಲೇ (ಅ.1) ರಾಜಧಾನಿಯಾದ್ಯಂತ ಅತ್ಯಂತ ಕಟ್ಟುನಿಟ್ಟಿನ ‘No PUCC, No Fuel’ ನಿಯಮವನ್ನು ಜಾರಿಗೆ ತಂದಿದೆ.
ಹೊಸ ನಿಯಮದ ಪ್ರಕಾರ, ಮಾನ್ಯತೆ ಇರುವ ಮಾಲಿನ್ಯ ನಿಯಂತ್ರಣ ಪ್ರಮಾಣಪತ್ರ (PUCC) ಇಲ್ಲದ ಯಾವುದೇ ವಾಹನಗಳಿಗೆ ದೆಹಲಿಯ ಪೆಟ್ರೋಲ್ ಬಂಕ್‌ಗಳಲ್ಲಿ ಪೆಟ್ರೋಲ್, ಡೀಸೆಲ್, ಸಿಎನ್‌ಜಿ ಮತ್ತು ಎಲ್‌ಪಿಜಿ ಮಾರಾಟ ಮಾಡುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ.
ಆಟೋಮ್ಯಾಟಿಕ್ ಕ್ಯಾಮೆರಾಗಳ ಕಣ್ಣಾವಲು
ಈ ಯೋಜನೆಯನ್ನು ಯಶಸ್ವಿಯಾಗಿ ಅನುಷ್ಠಾನಗೊಳಿಸಲು ದೆಹಲಿಯ ಸುಮಾರು 500 ಪೆಟ್ರೋಲ್ ಬಂಕ್‌ಗಳಲ್ಲಿ ಆಧುನಿಕ ‘ಆಟೋಮ್ಯಾಟಿಕ್ ನಂಬರ್ ಪ್ಲೇಟ್ ರೆಕಗ್ನಿಷನ್’ ಕ್ಯಾಮೆರಾ ವ್ಯವಸ್ಥೆಯನ್ನು ಅಳವಡಿಸಲಾಗಿದೆ. ವಾಹನಗಳು ಇಂಧನ ತುಂಬಿಸುವ ನಳಿಕೆಯ ಹತ್ತಿರ ಬರುತ್ತಿದ್ದಂತೆ, ಈ ಕ್ಯಾಮೆರಾಗಳು ನಂಬರ್ ಪ್ಲೇಟ್ ಗುರುತಿಸಿ ರಾಷ್ಟ್ರೀಯ ವಾಹನ ದತ್ತಾಂಶದ ಜೊತೆ ಪರಿಶೀಲಿಸುತ್ತವೆ.
ಇಂಧನ ಪೂರೈಕೆ ಸ್ಥಗಿತ
ಒಂದು ವೇಳೆ ವಾಹನದ ಮಾಲಿನ್ಯ ಪ್ರಮಾಣಪತ್ರದ ಅವಧಿ ಮುಗಿದಿದ್ದರೆ ಅಥವಾ ಸರ್ಟಿಫಿಕೇಟ್ ಇಲ್ಲದಿದ್ದರೆ, ತಂತ್ರಜ್ಞಾನ ಆಧಾರಿತ ಆಟೋಮ್ಯಾಟಿಕ್ ಸಿಸ್ಟಮ್ ಇಂಧನ ಪೂರೈಕೆಯನ್ನು ತಾನಾಗಿಯೇ ಸ್ಥಗಿತಗೊಳಿಸುತ್ತದೆ. ಹೊಸದಾಗಿ ಪ್ರಮಾಣಪತ್ರ ಪಡೆಯುವವರೆಗೂ ಇಂಧನ ಸಿಗುವುದಿಲ್ಲ.
ಬಂಕ್ ಮ್ಯಾನೇಜರ್ ಹೇಳಿಕೆ
ಈ ಕುರಿತು ಮಾಹಿತಿ ನೀಡಿರುವ ಸ್ಥಳೀಯ ಭಾರತ್ ಪೆಟ್ರೋಲಿಯಂ ಬಂಕ್‌ನ ಮ್ಯಾನೇಜರ್ ದಿನೇಶ್ ಕುಮಾರ್, ಗುರುವಾರ ಮುಂಜಾನೆಯಿಂದಲೇ ನಿಯಮವನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಲಾಗಿದೆ. ಲಿಂಕ್ ಮಾಡಲಾದ ಸಿಸ್ಟಮ್‌ನಲ್ಲಿ ಪಿ‌ಯುಸಿಸಿ ಇಲ್ಲ ಎಂದು ತೋರಿಸಿದರೆ ಇಂಧನ ನೀಡುತ್ತಿಲ್ಲ. ಚಳಿಗಾಲದ ಮಾಲಿನ್ಯ ತಡೆಯಲು ಅಕ್ಟೋಬರ್ 1 ರಿಂದಲೇ ಸರ್ಕಾರ ಈ ಸೂಕ್ತ ಕ್ರಮ ಕೈಗೊಂಡಿದೆ ಎಂದಿದ್ದಾರೆ.
ಸಾರ್ವಜನಿಕರ ಬೆಂಬಲ
ಸರ್ಕಾರದ ಈ ನಿರ್ಧಾರಕ್ಕೆ ವಾಹನ ಸವಾರರು ಮತ್ತು ವಾಣಿಜ್ಯ ಸಾರಿಗೆ ಚಾಲಕರಿಂದ ವ್ಯಾಪಾರ ಬೆಂಬಲ ವ್ಯಕ್ತವಾಗಿದೆ. ಬಂಕ್‌ಗಳಲ್ಲೇ ಮಾಲಿನ್ಯ ತಪಾಸಣಾ ಕೇಂದ್ರಗಳಿರುವುದರಿಂದ ತಕ್ಷಣವೇ ನವೀಕರಿಸಿಕೊಳ್ಳಲು ಅನುಕೂಲವಾಗಿದೆ ಎಂದು ಹಪುರ್ ಮೂಲದ ಸಾರಿಗೆ ಆಪರೇಟರ್ ಜೈ ಭಗವಾನ್ ಗೌತಮ್ ತಿಳಿಸಿದ್ದಾರೆ.
ಇದನ್ನೂ ಓದಿ:
ಪ್ರತಿ ವರ್ಷ ಚಳಿಗಾಲದಲ್ಲಿ ನೆರೆಯ ರಾಜ್ಯಗಳಲ್ಲಿನ ಕೃಷಿ ತ್ಯಾಜ್ಯ ಸುಡುವಿಕೆ, ಗಾಳಿಯ ಕಡಿಮೆ ವೇಗ ಹಾಗೂ ವಾಹನಗಳ ದಟ್ಟಣೆಯಿಂದಾಗಿ ದೆಹಲಿಯಲ್ಲಿ ವಾಯು ಮಾಲಿನ್ಯ ಅಪಾಯಕಾರಿ ಮಟ್ಟವನ್ನು ತಲುಪುತ್ತದೆ. ಇದನ್ನು ತಡೆಯಲು ಇಂಧನ ಖರೀದಿಸುವ ಜಾಗದಲ್ಲೇ ಕಠಿಣ ನಿಯಮ ಜಾರಿಗೊಳಿಸುವ ಮೂಲಕ ಮಾಲಿನ್ಯಕಾರಕ ವಾಹನಗಳಿಗೆ ಬ್ರೇಕ್ ಹಾಕಲು ಅಧಿಕಾರಿಗಳು ಮುಂದಾಗಿದ್ದಾರೆ.
