ಹಬ್ಬಗಳು ಬಂದರೆ ಸಾಕು, ನಮ್ಮ ಮನೆಗಳಲ್ಲಿ ಸಿಹಿತಿಂಡಿಗಳು, ಕರಿದ ತಿಂಡಿಗಳು ಮತ್ತು ಬಗೆಬಗೆಯ ಖಾದ್ಯಗಳ ಘಮಲು ಹಬ್ಬುತ್ತದೆ. ಹಬ್ಬದ ಖುಷಿಯಲ್ಲಿ ಊಟ-ತಿಂಡಿಯ ಮೇಲೆ ಹಿಡಿತ ತಪ್ಪುವುದು ಸಹಜ. ಆದರೆ, ಈ ಅತಿ ಭೋಜನವು ನಮ್ಮ ದೇಹದ ರಕ್ತದಲ್ಲಿನ ಸಕ್ಕರೆ ಮಟ್ಟದ ಮೇಲೆ ತೀವ್ರವಾದ ದುಷ್ಪರಿಣಾಮ ಬೀರುತ್ತದೆ ಎಂಬುದು ನಿಮಗೆ ತಿಳಿದಿದೆಯೇ?
ಹಬ್ಬದ ದಿನಗಳಲ್ಲಿ ನಾವು ಸೇವಿಸುವ ಸಿಹಿ ಪದಾರ್ಥಗಳು ಮತ್ತು ಮೈದಾ ಅಥವಾ ರಿಫೈನ್ಡ್ ಹಿಟ್ಟಿನಿಂದ ತಯಾರಿಸಿದ ತಿನಿಸುಗಳು ಕಾರ್ಬೋಹೈಡ್ರೇಟ್ಸ್‌ನಿಂದ ಕೂಡಿರುತ್ತವೆ. ದೇಹವು ಇವುಗಳನ್ನು ಅತಿ ವೇಗವಾಗಿ ಗ್ಲುಕೋಸ್ ಆಗಿ ಪರಿವರ್ತಿಸುತ್ತದೆ. ಇದರಿಂದ ರಕ್ತದಲ್ಲಿ ಸಕ್ಕರೆಯ ಮಟ್ಟ ಹಠಾತ್ ಏರಿಕೆಯಾಗಿ, ಸುಸ್ತು, ತಲೆನೋವು ಮತ್ತು ಆಯಾಸ ಉಂಟಾಗುತ್ತದೆ.
ಅತಿಯಾದ ಕ್ಯಾಲೊರಿ ಮತ್ತು ಸಕ್ಕರೆ ಅಂಶವನ್ನು ಒಮ್ಮೆಲೆ ಸೇವಿಸಿದಾಗ, ನಮ್ಮ ಮೇದಿರಂಜಕ ಗ್ರಂಥಿಯು ಅದನ್ನು ನಿಯಂತ್ರಿಸಲು ಹೆಚ್ಚಿನ ಪ್ರಮಾಣದಲ್ಲಿ ಇನ್ಸುಲಿನ್ ಉತ್ಪಾದಿಸಬೇಕಾಗುತ್ತದೆ. ಇದು ನಿರಂತರವಾಗಿ ನಡೆದರೆ ದೇಹದ ಜೀವಕೋಶಗಳು ಇನ್ಸುಲಿನ್‌ಗೆ ಸರಿಯಾಗಿ ಸ್ಪಂದಿಸುವುದಿಲ್ಲ. ಇದರಿಂದ ಭವಿಷ್ಯದಲ್ಲಿ ಮಧುಮೇಹ ಬರುವ ಅಪಾಯ ಹೆಚ್ಚಾಗುತ್ತದೆ.
ಹಬ್ಬದ ಸಮಯದಲ್ಲಿ ಗಂಟೆಗಳ ಕಾಲ ಕುಳಿತು ಅತಿಯಾಗಿ ತಿನ್ನುವುದರಿಂದ ಜೀರ್ಣಕ್ರಿಯೆ ನಿಧಾನವಾಗುತ್ತದೆ. ಇದರಿಂದ ರಕ್ತದಲ್ಲಿ ಸಕ್ಕರೆ ಮತ್ತು ಕೊಬ್ಬಿನಾಂಶ ಎರಡೂ ಅಸಮತೋಲನಗೊಳ್ಳುತ್ತವೆ. ಇದು ತೂಕ ಹೆಚ್ಚಾಗಲು ಹಾಗೂ ದೀರ್ಘಕಾಲಿಕ ಆರೋಗ್ಯ ಸಮಸ್ಯೆಗಳಿಗೆ ದಾರಿ ಮಾಡಿಕೊಡುತ್ತದೆ.
ಹಬ್ಬದ ಸಂಭ್ರಮವನ್ನು ಸವಿಯಲು ಯಾವುದೇ ತಡೆಯಿಲ್ಲ, ಆದರೆ ಮಿತಿಯಿರಲಿ. ಸಿಹಿತಿಂಡಿಗಳನ್ನು ಸವಿಯುವಾಗ ಸಣ್ಣ ಪ್ರಮಾಣದಲ್ಲಿ ಸೇವಿಸಿ. ಇದರೊಂದಿಗೆ ಸಾಕಷ್ಟು ನೀರುಕುಡಿಯುವುದು ಮತ್ತು ನಿಯಮಿತವಾಗಿ ನಡೆಯುವುದು ರಕ್ತದ ಸಕ್ಕರೆ ಮಟ್ಟವನ್ನು ನಿಯಂತ್ರಣದಲ್ಲಿಡಲು ಸಹಾಯ ಮಾಡುತ್ತದೆ.
