ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಬ್ರೆಜಿಲ್ ಫುಟ್ಬಾಲ್ ದಂತಕಥೆ ಹಾಗೂ ಅತ್ಯುತ್ತಮ ಫುಟ್ಬಾಲ್ ಆಟಗಾರ ಪೀಲೆ (82) ಅನಾರೋಗ್ಯದ ಕಾರಣ ಇಂದು ನಿಧನರಾಗಿದ್ದಾರೆ. ಪೀಲೆ ಕೆಲ ದಿನಗಳಿಂದ ಕ್ಯಾನ್ಸರ್ ನಿಂದ ಬಳಲುತ್ತಿದ್ದು, ಸಾವೊ ಪಾಲೊದಲ್ಲಿನ ಆಲ್ಬರ್ಟ್ ಐನ್ಸ್ಟೈನ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಚಿಕಿತ್ಸೆ ಫಲಕಾರಿಯಾಗದೆ ಪೀಲೆ ನಿಧನರಾಗಿದ್ದಾರೆಂದು ಪೀಲೆ ಅವರ ಪುತ್ರಿ ಅಧಿಕೃತವಾಗಿ ಸ್ಪಷ್ಟಪಡಿಸಿದರು.
ಕಳೆದ ವರ್ಷ ಸೆಪ್ಟೆಂಬರ್ನಲ್ಲಿ ಪೀಲೆಯ ಕೊಲೊನ್ನಿಂದ ಕ್ಯಾನ್ಸರ್ ಗಡ್ಡೆಯನ್ನು ವೈದ್ಯರು ತೆಗೆದುಹಾಕಿದ್ದರು. ಅಂದಿನಿಂದ ಅವರು ಕೀಮೋಥೆರಪಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇತ್ತೀಚೆಗೆ ಅವರ ಆರೋಗ್ಯ ಸ್ಥಿತಿ ಹದಗೆಟ್ಟಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಪೀಲೆಗೆ ಶ್ವಾಸಕೋಶದ ಸೋಂಕು ಇದೆ ಎಂದು ವೈದ್ಯರು ಕಂಡುಕೊಂಡರು. ಪೀಲೆ ಅವರ ಹಲವು ಅಂಗಗಳು ವಿಫಲವಾದ ಕಾರಣ ಅವರ ಆರೋಗ್ಯ ಸ್ಥಿತಿ ಹದಗೆಟ್ಟಿದ್ದು ಇಂದು ಇಹಲೋಕ ತ್ಯಜಿಸಿದರು.
ಪೀಲೆ ಅಕ್ಟೋಬರ್ 23, 1940 ರಂದು ಬ್ರೆಜಿಲ್ನ ಟ್ರೆಸ್ ಕೊರಾಕೋಸ್ನಲ್ಲಿ ಜನಿಸಿದರು. ಪೀಲೆಯ ನಿಜವಾದ ಹೆಸರು ಎಡ್ಸನ್ ಅರಂಟ್ಸ್ ಡೊ ನಾಸಿಮಿಯೆಂಟೊ. ಅವರು ಸಾಕರ್ ಇತಿಹಾಸದಲ್ಲಿ ದಂತಕಥೆ ಆಟಗಾರರಾಗಿ ಹೊರಹೊಮ್ಮಿದರು. ಪೀಲೆ ಫುಟ್ಬಾಲ್ ಇತಿಹಾಸದಲ್ಲಿ ಅತ್ಯುತ್ತಮ ಆಟಗಾರರಲ್ಲಿ ಒಬ್ಬರು. ಪೀಲೆ ಫುಟ್ಬಾಲ್ ವಿಶ್ವಕಪ್ನಲ್ಲಿ ಬ್ರೆಜಿಲ್ ಅನ್ನು ನಾಲ್ಕು ಬಾರಿ ಪ್ರತಿನಿಧಿಸಿದರು.
1958, 1962, 1970 ವಿಶ್ವಕಪ್ ವಿಜಯಗಳಲ್ಲಿ ಪಾಲುದಾರರಾದರು. ಫಾರ್ವರ್ಡ್ ಮತ್ತು ಆಕ್ರಮಣಕಾರಿ ಮಿಡ್ಫೀಲ್ಡರ್ ಆಗಿ, ಮೈದಾನದಲ್ಲಿ ಪೀಲೆ ಅವರ ಸಾಧನೆಗಳು ಅಸಾಮಾನ್ಯವಾಗಿವೆ. ಫುಟ್ಬಾಲ್ ವಿಶ್ವಕಪ್ನಲ್ಲಿ ಆಡಿದ 14 ಪಂದ್ಯಗಳಲ್ಲಿ ಪೀಲೆ 12 ಗೋಲುಗಳನ್ನು ಗಳಿಸಿದರು. ಜುಲೈ 1971 ರಲ್ಲಿ ಯುಗೊಸ್ಲಾವಿಯಾ ವಿರುದ್ಧ ತಮ್ಮ ಕೊನೆಯ ಅಂತರಾಷ್ಟ್ರೀಯ ಪಂದ್ಯವನ್ನು ಆಡಿದರು. ಪೀಲೆ ಎರಡು ದಶಕಗಳಿಂದ ಸಾಕರ್ ಪ್ರೇಮಿಗಳನ್ನು ರೋಮಾಂಚನಗೊಳಿಸಿದ್ದಾರೆ.