ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತದ ಸರ್ಕಾರಿ ಸ್ವಾಮ್ಯದ ಸಂಸ್ಥೆಯಾದ ಭಾರತ ಸಂಚಾರ ನಿಗಮ ಲಿಮಿಟೆಡ್ (BSNL) ಮುಂದಿನ ವರ್ಷದಿಂದ 5G ಸೇವೆಗಳನ್ನು ಪ್ರಾರಂಭಿಸಲಿದೆ ಎಂದು ಟೆಲಿಕಾಂ ಸಚಿವ ಅಶ್ವಿನಿ ವೈಷ್ಣವ್ ಹೇಳಿದ್ದಾರೆ.
AIR ನ್ಯೂಸ್‌ಗೆ ನೀಡಿದ ಸಂದರ್ಶನದಲ್ಲಿ ವೈಷ್ಣವ್ ಅವರು ಮುಂದಿನ ವರ್ಷದ ವೇಳೆಗೆ ಸರ್ಕಾರಿ ಸ್ವಾಮ್ಯದ ಟೆಲಿಕಾಂ ಆಪರೇಟರ್‌ನಿಂದ 5G ಸೇವೆಗಳನ್ನು ಹೊರತರಲಾಗುವುದು ಎಂದು ಹೇಳಿದ್ದಾರೆ.
ದೇಶದಲ್ಲಿ 5G ಸೇವೆಗಳು ವೇಗವಾಗಿ ವಿಸ್ತಾರಗೊಳ್ಳುತ್ತಿವೆ. 24 ರಿಂದ 36 ತಿಂಗಳ ಅವಧಿಯಲ್ಲಿ ದೇಶದಲ್ಲಿ ಶೇಕಡಾ 80 ರಷ್ಟು ಪ್ರದೇಶದಲ್ಲಿ 5G ಸೇವೆಗಳು ಸಿಗಲಿಚೆ ಎಂದು ಸಚಿವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ದೇಶಾದ್ಯಂತ 50 ನಗರಗಳಲ್ಲಿ ಈಗಾಗಲೇ 5G ಸೇವೆಗಳನ್ನು ಪ್ರಾರಂಭಿಸಲಾಗಿದೆ ಮತ್ತು ಪ್ರತಿ ವಾರ ಸುಮಾರು ಐದು ಸಾವಿರ ಹೊಸ ಸೈಟ್‌ಗಳು ಸೇರ್ಪಡೆಯಾಗುತ್ತಿವೆ. 5G ಸೇವೆಗಳು ಶಿಕ್ಷಣ, ಆರೋಗ್ಯ, ಕೃಷಿ ಮತ್ತು ಲಾಜಿಸ್ಟಿಕ್ಸ್ ಕ್ಷೇತ್ರದಲ್ಲಿ ಭಾರಿ ಬದಲಾವಣೆಯನ್ನು ತರುತ್ತವೆ ಎಂದು ಅವರು ಹೇಳಿದ್ದಾರೆ.
ಏತನ್ಮಧ್ಯೆ, ಖಾಸಗಿ ಟೆಲಿಕಾಂಗಳು 5G ಸೇವೆಗಳನ್ನು ಹಂತಹಂತವಾಗಿ ಹೊರತರುತ್ತಿವೆ. ಅಕ್ಟೋಬರ್ ನಲ್ಲಿ ಪ್ರಾರಂಭವಾದ 5G ಸೇವೆಯನ್ನು ಖಾಸಗಿ ಪೂರೈಕೆ ದಾರರಾದ ರಿಲಯನ್ಸ್ ಜಿಯೋ ಮತ್ತು ಏರ್‌ಟೆಲ್ ಅಕ್ಟೋಬರ್‌ನಿಂದ ದೇಶದಲ್ಲಿ 5G ಸೇವೆಗಳನ್ನು ವಿಸ್ತರಿಸುತ್ತಿವೆ. Jio ನ 5G ಸೇವೆಯು ದೆಹಲಿ-NCR, ಮುಂಬೈ, ಕೋಲ್ಕತ್ತಾ, ವಾರಣಾಸಿ, ಚೆನ್ನೈ, ಬೆಂಗಳೂರು, ಹೈದರಾಬಾದ್, ಪುಣೆ, ನಾಥದ್ವಾರ, ಕೊಚ್ಚಿ ಮತ್ತು ಗುಜರಾತ್‌ನ ಎಲ್ಲಾ 33 ಜಿಲ್ಲಾ ಕೇಂದ್ರಗಳಲ್ಲಿ ಲಭ್ಯವಿದೆ. ಕಂಪನಿಯು ಇತ್ತೀಚೆಗೆ ವಿಶಾಖಪಟ್ಟಣಂ, ವಿಜಯವಾಡ ಮತ್ತು ಗುಂಟೂರಿನಲ್ಲಿ 5G ಅನ್ನು ಪ್ರಾರಂಭಿಸಿತು. ದೆಹಲಿ, ಮುಂಬೈ, ಚೆನ್ನೈ, ಬೆಂಗಳೂರು, ಹೈದರಾಬಾದ್, ಸಿಲಿಗುರಿ, ನಾಗ್ಪುರ, ವಾರಣಾಸಿ, ಪಾಣಿಪತ್, ಗುರುಗ್ರಾಮ್, ಗುವಾಹಟಿ, ಪಾಟ್ನಾ, ಲಕ್ನೋ, ಶಿಮ್ಲಾ, ಇಂಫಾಲ್, ಅಹಮದಾಬಾದ್, ವೈಜಾಗ್ ಮತ್ತು ಪುಣೆಯಲ್ಲಿ ಏರ್‌ಟೆಲ್ 5G ರೋಲ್ ಅನ್ನು ಪ್ರಾರಂಭಿಸಿದೆ.
