ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಧಾರವಾಡ ಜಿಲ್ಲೆಯಲ್ಲಿ ದಲಿತ ಸಮುದಾಯದ ಜನರಿಗೆ ಜಾತಿ ಮತ್ತು ಆದಾಯ ಪ್ರಮಾಣ ಪತ್ರಗಳನ್ನು ಪಡೆಯುವುದು ಸವಾಲಿನ ಕೆಲಸವಾಗಿ ಪರಿಣಮಿಸಿದೆ. ಕಂದಾಯ ಇಲಾಖೆಯ ಕಠಿಣ ನಿಯಮಗಳು ಹಾಗೂ ತಹಶೀಲ್ದಾರ್ ಕಚೇರಿ ಅಧಿಕಾರಿಗಳ ಉದಾಸೀನತೆಯಿಂದಾಗಿ ನೈಜ ದಲಿತ ಫಲಾನುಭವಿಗಳು ತಮಗೆ ಸಿಗಬೇಕಾದ ಸರ್ಕಾರಿ ಸೌಲಭ್ಯಗಳಿಂದ ವಂಚಿತರಾಗುತ್ತಿದ್ದಾರೆ.
ಅಧಿಕಾರಿಗಳು ಹಿಂದೇಟು ಹಾಕಲು ಅಸಲಿ ಕಾರಣವೇನು?
ದಲಿತರಿಗೆ ಜಾತಿ ಪ್ರಮಾಣ ಪತ್ರಗಳನ್ನು ವಿತರಿಸಲು ಅಧಿಕಾರಿಗಳು ನಿರಾಕರಿಸುತ್ತಿರುವುದಕ್ಕೆ ಪ್ರಮುಖವಾಗಿ 1950 ರ ವಾಸಸ್ಥಳದ ದಾಖಲೆಗಳಕಡ್ಡಾಯ ನಿಯಮವೇ ಕಾರಣವಾಗಿದೆ. ಪರಿಶಿಷ್ಟ ಜಾತಿಗೆ ಸೇರಿದ ವ್ಯಕ್ತಿಯ ಕುಟುಂಬ 1950 ಕ್ಕಿಂತ ಮೊದಲು ಅದೇ ಜಿಲ್ಲೆ ಅಥವಾ ರಾಜ್ಯದಲ್ಲಿ ವಾಸವಾಗಿತ್ತು ಎಂಬುದಕ್ಕೆ ಕಂದಾಯ ಇಲಾಖೆಯ ಹಳೆಯ ದಾಖಲೆಗಳನ್ನು ಒದಗಿಸುವಂತೆ ಅಧಿಕಾರಿಗಳು ಹಠ ಹಿಡಿಯುತ್ತಿದ್ದಾರೆ.
ಅನಕ್ಷರಸ್ಥರಾಗಿರುವ, ಕೃಷಿ ಕೂಲಿ ಕಾರ್ಮಿಕರಾಗಿರುವ ಅಥವಾ ದಶಕಗಳ ಹಿಂದೆ ಬೇರೆ ಭಾಗಗಳಿಂದ ವಲಸೆ ಬಂದು ನೆಲೆಸಿರುವ ಬಡ ದಲಿತ ಕುಟುಂಬಗಳ ಬಳಿ 1950ರ ಯಾವುದೇ ಲಿಖಿತ ದಾಖಲೆಗಳು, ಪಹಣಿ ಅಥವಾ ಮನೆ ತೆರಿಗೆ ರಶೀದಿಗಳು ಲಭ್ಯವಿಲ್ಲ. ನೆಮ್ಮದಿ ಕೇಂದ್ರ ಹಾಗೂ ಅಟಲ್ ಜೀ ಜನಸ್ನೇಹಿ ಕೇಂದ್ರಗಳಲ್ಲಿ ಆನ್ಲೈನ್ ಮೂಲಕ ಅರ್ಜಿ ಸಲ್ಲಿಸಿದಾಗ, ಹಳೆಯ ವಂಶಾವಳಿ ಅಥವಾ ನಿರಂತರ ವಾಸಸ್ಥಳದ ಪುರಾವೆ ಇಲ್ಲದ ಕಾರಣಕ್ಕೆ ತಂತ್ರಾಂಶದಲ್ಲೇ ಅರ್ಜಿಗಳು ತಿರಸ್ಕೃತಗೊಳ್ಳುತ್ತಿವೆ.
ಶಿಕ್ಷಣ ಮತ್ತು ಸೌಲಭ್ಯ ವಂಚಿತರಾಗುತ್ತಿರುವ ಮಕ್ಕಳು:
ಪ್ರಸ್ತುತ ಶಾಲಾ-ಕಾಲೇಜುಗಳ ಪ್ರವೇಶಾತಿ ಮತ್ತು ವಿದ್ಯಾರ್ಥಿವೇತನಕ್ಕೆ ಅರ್ಜಿ ಸಲ್ಲಿಸುವ ಸಮಯ ಹತ್ತಿರವಾಗುತ್ತಿದೆ. ಆದರೆ ಅಧಿಕಾರಿಗಳ ಈ ಧೋರಣೆಯಿಂದಾಗಿ ನೂರಾರು ವಿದ್ಯಾರ್ಥಿಗಳಿಗೆ ಸಕಾಲದಲ್ಲಿ ಜಾತಿ ಪ್ರಮಾಣ ಪತ್ರ ಸಿಗುತ್ತಿಲ್ಲ. ಇದರಿಂದಾಗಿ ಉನ್ನತ ಶಿಕ್ಷಣ ಪಡೆಯುವ ದಲಿತ ವಿದ್ಯಾರ್ಥಿಗಳು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಸೌಲಭ್ಯ ವಂಚಿತರಾದ ಹಲವರು ಮರು ಪ್ರವೇಶ ಪಡೆಯಲು ಸಾಧ್ಯವಾಗದೆ ಶಿಕ್ಷಣದಿಂದಲೇ ದೂರ ಉಳಿಯುವ ಆತಂಕ ಎದುರಾಗಿದೆ.
ಇದನ್ನೂ ಓದಿ;
ದಲಿತ ಸಂಘಟನೆಗಳ ಆಕ್ರೋಶ ಮತ್ತು ಎಚ್ಚರಿಕೆ:
ಅಧಿಕಾರಿಗಳ ಈ ಅನಗತ್ಯ ಕಿರುಕುಳವನ್ನು ಖಂಡಿಸಿ ವಿವಿಧ ದಲಿತ ಸಂಘಟನೆಗಳು ಜಿಲ್ಲಾಧಿಕಾರಿ ಕಚೇರಿ ಮುಂಭಾಗ ಪ್ರತಿಭಟನೆ ನಡೆಸಲು ಸಿದ್ಧತೆ ನಡೆಸಿವೆ. ವರ್ಷಗಟ್ಟಲೆಯಿಂದ ಇಲ್ಲೇ ಬದುಕು ಕಟ್ಟಿಕೊಂಡಿದ್ದರೂ ನಮಗೆ ಜಾತಿ ಪ್ರಮಾಣ ಪತ್ರ ನೀಡಲು 1950ರ ದಾಖಲೆ ಕೇಳುವುದು ಎಷ್ಟು ನ್ಯಾಯ? ಸ್ಥಳೀಯವಾಗಿ ಮಹಜರ್ ನಡೆಸಿ ಪತ್ರ ನೀಡಲು ಕಾನೂನಿನಲ್ಲಿ ಅವಕಾಶವಿದ್ದರೂ ಅಧಿಕಾರಿಗಳು ಲಂಚಕ್ಕಾಗಿ ಅಥವಾ ಆಲಸ್ಯತನದಿಂದ ಜನರನ್ನು ಅಲೆದಾಡಿಸುತ್ತಿದ್ದಾರೆ ಎಂದು ಸಮುದಾಯದ ಮುಖಂಡರು ಆರೋಪಿಸಿದ್ದಾರೆ.
ಈ ಕುರಿತು ಧಾರವಾಡ ಜಿಲ್ಲಾಡಳಿತ ತಕ್ಷಣ ಮಧ್ಯಪ್ರವೇಶಿಸಿ, ನಿಯಮಗಳನ್ನು ಸಡಿಲಗೊಳಿಸಿ ಬಡ ದಲಿತ ಕುಟುಂಬಗಳಿಗೆ ಸರಳೀಕೃತ ವಿಧಾನದಲ್ಲಿ ಪ್ರಮಾಣ ಪತ್ರ ಸಿಗುವಂತೆ ಕ್ರಮ ಕೈಗೊಳ್ಳಬೇಕು ಎಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.
