ಹೊಸದಿಗಂತ ಬೆಳಗಾವಿ:
ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯಲ್ಲಿ ಮಹತ್ತರ ಮೈಲಿಗಲ್ಲು ಸಾಧಿಸಿದ ಬಿಎಲ್ಒಗಳ ಮನೆಗೆ ಸ್ವತಃ ಬೆಳಗಾವಿ ಜಿಲ್ಲಾಧಿಕಾರಿ ಮೊಹಮ್ಮದ್ ರೋಷನ್ ಭೇಟಿ ನೀಡಿ ಅಭಿನಂದಿಸಿದ್ದಾರೆ.
ಕೊಟ್ಟ ಮಾತು ಉಳಿಸಿಕೊಂಡ ಜಿಲ್ಲಾಧಿಕಾರಿ
ದಕ್ಷಿಣ ವಿಧಾನಸಭಾ ಕ್ಷೇತ್ರದಲ್ಲಿ ಶೇ.100 ರಷ್ಟು ಕಾಮಗಾರಿ ಮುಗಿಸಿದ ಮತಗಟ್ಟೆ ಅಧಿಕಾರಿ ಸತೀಶ ಢವಳೆ ಅವರ ಶಹಾಪೂರದ ನಿವಾಸಕ್ಕೆ ಗುರುವಾರ ಭೇಟಿ ನೀಡಿದ ಡಿಸಿ, ಸಾಧಕರನ್ನು ಗೌರವಿಸಿದರು. “ನೀಡಿದ ಭರವಸೆಯಂತೆ ಶ್ರೇಷ್ಠ ಕೆಲಸ ಮಾಡಿದ ಸಿಬ್ಬಂದಿಯ ಮನೆಗೆ ಬಂದಿರುವುದು ಸಂತಸ ತಂದಿದೆ. ಭಾರಿ ಮಳೆ ಮತ್ತು ದೈನಂದಿನ ಕಾರ್ಯಭಾರದ ನಡುವೆಯೂ ಶಿಕ್ಷಕರು ಹಾಗೂ ಪಾಲಿಕೆ ಸಿಬ್ಬಂದಿ ತೋರಿದ ಬದ್ಧತೆ ಮಾದರಿಯಾಗಿದೆ. ಬೆಳಗಾವಿ ಜಿಲ್ಲೆಯನ್ನು ರಾಜ್ಯದಲ್ಲೇ ಪ್ರಥಮ ಸ್ಥಾನಕ್ಕೇರಿಸುವುದು ನಮ್ಮ ಗುರಿ” ಎಂದು ಅವರು ಹೇಳಿದರು.
ಅಧಿಕಾರಿಗಳ ಪ್ರಶಂಸೆ ಹಾಗೂ ಹುಮ್ಮಸ್ಸು
ಸಹಾಯಕ ನೋಂದಣಾಧಿಕಾರಿ ಡಾ. ಸಿದ್ದು ಹುಲ್ಲೋಳಿ ಮಾತನಾಡಿ, “ಸಿಬ್ಬಂದಿಯ ಮನೆಗೆ ತೆರಳಿ ಪ್ರಶಂಸಿಸಿದ ಕರ್ನಾಟಕದ ಮೊದಲ ಜಿಲ್ಲಾಧಿಕಾರಿ ಇವರು. ಯಾವುದೇ ಒತ್ತಡವಿಲ್ಲದೆ, ಪ್ರೀತಿ ಹಾಗೂ ಮಾರ್ಗದರ್ಶನದಿಂದ ಈ ಸಾಧನೆ ಸಾಧ್ಯವಾಗಿದೆ” ಎಂದರು.
ಸಾಧಕರಿಗೆ ಗೌರವ ಸಲ್ಲಿಕೆ
ಇದೇ ಸಂದರ್ಭದಲ್ಲಿ ಬಿಎಲ್ಒಗಳಾದ ಸತೀಶ ಢವಳೆ, ಪೂನಂ ಬಬಲೆ, ಎಸ್.ಜಿ. ಕವಳೆ ಸೇರಿದಂತೆ ಹಲವು ಮೇಲ್ವಿಚಾರಕರು ಹಾಗೂ ನೋಡಲ್ ಅಧಿಕಾರಿಗಳನ್ನು ಸನ್ಮಾನಿಸಲಾಯಿತು. ಸ್ಥಳೀಯ ನಗರಸೇವಕ ರವಿ ಸಾಲುಂಕೆ ಮತ್ತು ಇತರ ಅಧಿಕಾರಿಗಳು ಉಪಸ್ಥಿತರಿದ್ದರು.
