ಹೊಸದಿಗಂತ ಡಿಜಿಟಲ್ ಡೆಸ್ಕ್:
ದೇಶದ ವಿವಿಧ ಭಾಗಗಳಲ್ಲಿ ಒಂದೇ ಸಮಯದಲ್ಲಿ ಸಂಪೂರ್ಣ ವಿಭಿನ್ನ ಹವಾಮಾನ ಪರಿಸ್ಥಿತಿ ನಿರ್ಮಾಣವಾಗಿ ಅಚ್ಚರಿ ಹಾಗೂ ಭಯ ಎರಡನ್ನು ಏಕಕಾಲದಲ್ಲಿ ಸೃಷ್ಟಿಸಿದೆ!
ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ INSAT-3DS ಹವಾಮಾನ ಉಪಗ್ರಹ ಸೆರೆಹಿಡಿದ ಚಿತ್ರದಲ್ಲಿ ಈ ವೈಪರೀತ್ಯ ಸ್ಪಷ್ಟವಾಗಿ ಗೋಚರಿಸಿದೆ.
ಉಪಗ್ರಹ ಸೆರೆಹಿಡಿದ ಚಿತ್ರದಲ್ಲಿ ಮಧ್ಯ, ಪೂರ್ವ ಹಾಗೂ ದಕ್ಷಿಣ ಭಾರತದ ಹಲವು ಭಾಗಗಳಲ್ಲಿ ದಟ್ಟವಾದ ಮೋಡಗಳ ವ್ಯಾಪ್ತಿ ಕಂಡುಬಂದಿದೆ. ಇದಕ್ಕೆ ವಿರುದ್ಧವಾಗಿ ವಾಯವ್ಯ ಭಾರತದ ಬಹುತೇಕ ಭಾಗಗಳಲ್ಲಿ ಆಕಾಶ ಹೆಚ್ಚು ಸ್ಪಷ್ಟವಾಗಿರುವುದು ಗಮನ ಸೆಳೆದಿದೆ. ಮುಂಗಾರು ಋತುವಿನ ಅಂತಿಮ ಹಂತ ಸಮೀಪಿಸುತ್ತಿರುವ ಸಂದರ್ಭದಲ್ಲಿ ದೇಶದ ಎರಡು ಭಾಗಗಳಲ್ಲಿ ಕಂಡುಬಂದಿರುವ ಈ ವ್ಯತ್ಯಾಸ ಹವಾಮಾನದ ಪ್ರಾದೇಶಿಕ ಬದಲಾವಣೆಯನ್ನು ತೋರಿಸಿದೆ.
ಉಪಗ್ರಹ ಚಿತ್ರದಲ್ಲಿ ಮಧ್ಯ ಭಾರತದಿಂದ ಪೂರ್ವ ಮತ್ತು ಈಶಾನ್ಯ ಭಾಗಗಳತ್ತ ವ್ಯಾಪಿಸಿರುವ ದೊಡ್ಡ ಮೋಡದ ಪ್ರದೇಶ ಕಂಡುಬಂದಿದ್ದರೆ, ಬಂಗಾಳ ಕೊಲ್ಲಿ ಹಾಗೂ ಅದರ ಸುತ್ತಮುತ್ತಲಿನ ಪ್ರದೇಶಗಳಲ್ಲಿಯೂ ದಟ್ಟ ಮೋಡಗಳಿರುವುದು ಗೋಚರಿಸಿದೆ. ಮತ್ತೊಂದೆಡೆ ರಾಜಸ್ಥಾನ, ಗುಜರಾತ್ ಸೇರಿದಂತೆ ವಾಯವ್ಯ ಭಾರತದ ಹಲವು ಪ್ರದೇಶಗಳಲ್ಲಿ ಮೋಡಗಳ ಪ್ರಮಾಣ ಕಡಿಮೆಯಾಗಿ, ಆಕಾಶ ಸ್ಪಷ್ಟವಾಗಿರುವ ಪ್ರದೇಶಗಳು ಹೆಚ್ಚಾಗಿ ಕಂಡುಬಂದಿವೆ.
ಈ ಹವಾಮಾನ ವ್ಯತ್ಯಾಸಕ್ಕೆ ಪ್ರಸ್ತುತ ದುರ್ಬಲಗೊಳ್ಳುತ್ತಿರುವ ಡೀಪ್ ಡಿಪ್ರೆಶನ್ ಪ್ರಮುಖ ಕಾರಣಗಳಲ್ಲಿ ಒಂದು ಎನ್ನಲಾಗುತ್ತಿದೆ. ಹವಾಮಾನ ವ್ಯವಸ್ಥೆಯ ಪ್ರಭಾವದಿಂದ ಮಧ್ಯ ಮತ್ತು ಪೂರ್ವ ಭಾಗಗಳಲ್ಲಿ ತೇವಾಂಶ ಹಾಗೂ ಮೋಡಗಳ ಪ್ರಮಾಣ ಹೆಚ್ಚಾಗಿದ್ದರೆ, ವಾಯವ್ಯ ಭಾರತದಲ್ಲಿ ಮುಂಗಾರು ಹಿಂತೆಗೆತದ ಪ್ರಕ್ರಿಯೆ ಆರಂಭವಾಗಿರುವುದರಿಂದ ತುಸು ಒಣ ಹಾಗೂ ಸ್ಪಷ್ಟ ವಾತಾವರಣ ಕಂಡುಬರುತ್ತಿದೆ.
ಪ್ರಸ್ತುತ ಕಾಣಿಸಿಕೊಂಡಿರುವ ಈ ಮೋಡ-ಒಣಹವೆಯ ವಿಭಜನೆ ಶಾಶ್ವತವಲ್ಲ. ಡೀಪ್ ಡಿಪ್ರೆಶನ್ ಮತ್ತಷ್ಟು ದುರ್ಬಲಗೊಂಡು ಸ್ಥಳಾಂತರಗೊಳ್ಳುತ್ತಿದ್ದಂತೆ ದೇಶದ ವಿವಿಧ ಭಾಗಗಳಲ್ಲಿನ ಮೋಡ ಮತ್ತು ಮಳೆಯ ವಿನ್ಯಾಸವೂ ಬದಲಾಗುವ ಸಾಧ್ಯತೆಯಿದೆ. ಇದೇ ವೇಳೆ,ಡೀಪ್ ಡಿಪ್ರೆಶನ್ ಹಾಗೂ ಇತರ ಹವಾಮಾನ ವ್ಯವಸ್ಥೆಗಳ ಪ್ರಭಾವದಿಂದ ದೇಶದ ಹಲವು ಭಾಗಗಳಲ್ಲಿ ಮಳೆಯ ಸಾಧ್ಯತೆ ಮುಂದುವರಿಯಲಿದೆ ಎಂದು ಹವಾಮಾನ ಮುನ್ಸೂಚನೆಗಳು ಸೂಚಿಸಿವೆ.
