ವಯಸ್ಸು ಹೆಚ್ಚಾಗುತ್ತಿದ್ದಂತೆ ನಮ್ಮ ದೇಹದಲ್ಲಿ ಅನೇಕ ಬದಲಾವಣೆಗಳಾಗುವುದು ಸಹಜ. ಚರ್ಮದ ಮೇಲೆ ಸುಕ್ಕುಗಳು ಮೂಡುವುದು, ಕೂದಲು ಬಿಳಿಯಾಗುವುದು ಎಷ್ಟು ಸಾಮಾನ್ಯವೋ, ಅಂತೆಯೇ ನಮ್ಮ ಹಲ್ಲುಗಳ ರಚನೆಯಲ್ಲೂ ಕೆಲವು ಸೂಕ್ಷ್ಮ ಬದಲಾವಣೆಗಳು ಕಾಣಿಸಿಕೊಳ್ಳುತ್ತವೆ. ಅನೇಕ ಜನರು ವಯಸ್ಸಾದಂತೆ ತಮ್ಮ ಮುಂಭಾಗದ ಹಲ್ಲುಗಳ ತುದಿಯನ್ನು ನಾಲಿಗೆಯಿಂದ ಸ್ಪರ್ಶಿಸಿದಾಗ ಒರಟಾಗಿರುವುದನ್ನು ಗಮನಿಸಿರುತ್ತಾರೆ.
ಕೆಲವೊಮ್ಮೆ ಹಲ್ಲಿನ ಅಂಚು ಚೂಪಾದಂತೆ ಅಥವಾ ಸಣ್ಣ ಚೂರು ಮುರಿದುಹೋದಂತೆ ಭಾಸವಾಗುತ್ತದೆ. ಹೀಗೇಕೆ ಆಗುತ್ತದೆ? ಇದು ಯಾವುದೇ ದೊಡ್ಡ ಕಾಯಿಲೆಯೇ ಅಥವಾ ಸಾಮಾನ್ಯ ಪ್ರಕ್ರಿಯೆಯೇ?
ನಮ್ಮ ಹಲ್ಲಿನ ಹೊರಭಾಗದಲ್ಲಿ ‘ಎನಾಮಲ್’ ಎಂಬ ಗಟ್ಟಿಯಾದ ಬಿಳಿ ಪದರವಿರುತ್ತದೆ. ಇದು ನಮ್ಮ ದೇಹದಲ್ಲೇ ಅತ್ಯಂತ ಗಟ್ಟಿಯಾದ ಭಾಗ. ಆದರೆ, ನಾವು ವರ್ಷಗಳ ಕಾಲ ಆಹಾರ ಜಗಿಯುವಾಗ, ಮಾತನಾಡುವಾಗ ಮತ್ತು ಆಹಾರ ಸೇವಿಸುವಾಗ ಈ ಎನಾಮಲ್ ನಿಧಾನವಾಗಿ ಸವೆಯಲು ಪ್ರಾರಂಭವಾಗುತ್ತದೆ. ವಯಸ್ಸಾದಂತೆ ಈ ಪದರ ತೆಳುವಾಗುತ್ತಾ ಬಂದು, ಹಲ್ಲಿನ ನೈಸರ್ಗಿಕ ವಿನ್ಯಾಸ ಬದಲಾಗಿ ಒರಟಾಗುತ್ತವೆ.
ನಿದ್ರೆಯಲ್ಲಿ ಅಥವಾ ಅತಿಯಾದ ಒತ್ತಡದಲ್ಲಿದ್ದಾಗ ಅರಿವಿಲ್ಲದೆಯೇ ಹಲ್ಲುಗಳನ್ನು ಒಂದಕ್ಕೊಂದು ಉಜ್ಜುತ್ತಾರೆ. ಈ ಅಭ್ಯಾಸಕ್ಕೆ ದಂತ ವೈದ್ಯಕೀಯದಲ್ಲಿ ‘ಬ್ರಕ್ಸಿಸಮ್’ ಎನ್ನಲಾಗುತ್ತದೆ. ಹೀಗೆ ಹಲ್ಲು ಕಡಿಯುವುದರಿಂದ ಹಲ್ಲಿನ ಮೇಲ್ಭಾಗ ಮತ್ತು ತುದಿಯ ಅಂಚುಗಳು ಸವೆದು, ಸಣ್ಣದಾಗಿ ಬಿರುಕು ಬಿಟ್ಟು ಒರಟಾಗುತ್ತವೆ.
ನಾವು ಸೇವಿಸುವ ಶೀತಲ ಪಾನೀಯಗಳು, ನಿಂಬೆರಸ, ಹುಳಿ ಪದಾರ್ಥಗಳು, ಹಾಗೂ ಹೊಟ್ಟೆಯಲ್ಲಿ ಉಂಟಾಗುವ ಗ್ಯಾಸ್ಟ್ರಿಕ್ ಆಸಿಡ್ ಹಲ್ಲಿನ ಆರೋಗ್ಯದ ಮೇಲೆ ನೇರ ಪರಿಣಾಮ ಬೀರುತ್ತವೆ. ಈ ಆಮ್ಲಗಳು ಹಲ್ಲಿನ ಎನಾಮಲ್ ಅನ್ನು ಮೃದುಗೊಳಿಸಿ ಕರಗಿಸುತ್ತವೆ. ಪರಿಣಾಮವಾಗಿ, ಹಲ್ಲುಗಳ ಅಂಚುಗಳು ತೆಳುವಾಗಿ ಕಾಗದದಂತೆ ಕಿತ್ತುಬರುವ ಸ್ಥಿತಿಗೆ ತಲುಪುತ್ತವೆ.
ನಾವು ಜೀವಮಾನವಿಡೀ ತಿನ್ನುವ ಗಟ್ಟಿ ಆಹಾರಗಳು, ಅಡಿಕೆ, ಕಬ್ಬು ಜಗಿಯುವುದು ಅಥವಾ ಹಲ್ಲಿನಿಂದ ಬಾಟಲ್ ಮುಚ್ಚಳ ತೆರೆಯುವುದು, ದಾರ ಕತ್ತರಿಸುವಂತಹ ಅಭ್ಯಾಸಗಳು ಹಲ್ಲಿನ ಅಂಚಿಗೆ ಸಣ್ಣ ಸಣ್ಣ ಹಾನಿ ಉಂಟುಮಾಡುತ್ತವೆ. ವಯಸ್ಸಾಗುತ್ತಿದ್ದಂತೆ ಈ ಪುಟ್ಟ ಹಾನಿಗಳೇ ದೊಡ್ಡದಾಗಿ ಕಾಣಿಸಿಕೊಳ್ಳುತ್ತವೆ.
ಇದಕ್ಕೆ ಪರಿಹಾರವೇನು?
ಯಾವಾಗಲೂ ‘ಸಾಫ್ಟ್’ ಅಥವಾ ‘ಅಲ್ಟ್ರಾ ಸಾಫ್ಟ್’ ಬ್ರಷ್ ಬಳಸಿ.
ನಿದ್ರೆಯಲ್ಲಿ ಹಲ್ಲು ಕಡಿಯುವ ಅಭ್ಯಾಸವಿದ್ದರೆ ದಂತ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ.
ಹುಳಿ ಅಥವಾ ಆಸಿಡ್ ಅಂಶವಿರುವ ಆಹಾರ ಸೇವಿಸಿದ ತಕ್ಷಣ ನೀರು ಕುಡಿಯಿರಿ ಅಥವಾ ಬಾಯಿ ಮುಕ್ಕಳಿಸಿ.
ಹಲ್ಲಿನ ಅಂಚು ತೀರಾ ಒರಟಾಗಿದ್ದು ನಾಲಿಗೆಗೆ ಚುಚ್ಚುತ್ತಿದ್ದರೆ, ದಂತ ವೈದ್ಯರು ‘ಎನಾಮೆಲೋಪ್ಲಾಸ್ಟಿ’ ಎಂಬ ಸರಳ ವಿಧಾನದ ಮೂಲಕ ಕೆಲವೇ ನಿಮಿಷಗಳಲ್ಲಿ ಹಲ್ಲಿನ ಅಂಚನ್ನು ನಯಗೊಳಿಸುತ್ತಾರೆ.
ವರ್ಷಕ್ಕೆ ಕನಿಷ್ಠ ಒಮ್ಮೆಯಾದರೂ ದಂತ ವೈದ್ಯರಲ್ಲಿ ತಪಾಸಣೆ ಮಾಡಿಸಿಕೊಳ್ಳುವುದು ಹಲ್ಲಿನ ದೀರ್ಘಾಯುಷ್ಯಕ್ಕೆ ಒಳ್ಳೆಯದು.
