ಆಗಸದಾಟದ ಪ್ರಮುಖ ದೇಶವಾಗುವ ಗುರಿ, ಏರೋಸ್ಪೋರ್ಟ್ಸ್ ಕರಡು ನೀತಿ ಬಿಡುಗಡೆ ಮಾಡಿದೆ ಭಾರತ

ಹೊಸ ದಿಗಂತ ಡಿಜಿಟಲ್ ಡೆಸ್ಕ್
ಆಗಸದ ಆಟಗಳು ಅಂದರೆ ಪ್ಯಾರಾಗ್ಲೈಡಿಂಗ್, ಸ್ಕೈ ಡೈವಿಂಗ್, ಪ್ಯಾರಾ ಸೇಲಿಂಗ್, ಬಲೂನ್ ವಿಹಾರ ಇತ್ಯಾದಿಗಳಿಗೆ ಅನ್ವಯವಾಗುವಂತೆ ಕರಡು ನೀತಿಯೊಂದನ್ನು ಭಾರತದ ನಾಗರಿಕ ವಿಮಾನಯಾನ ಸಚಿವಾಲಯ ಶನಿವಾರ ಬಿಡುಗಡೆ ಮಾಡಿದೆ. ಇದರ ಉದ್ದೇಶ, 2030ರ ವೇಳೆಗೆ ಈ ದೇಶವನ್ನು ಇಂಥ ಆಗಸದ ಕ್ರೀಡೆಗಳಲ್ಲಿ ಮುಂಚೂಣಿಯಲ್ಲಿ ನಿಲ್ಲಿಸುವುದು.
ಈಗ ಅಂಥ ಹಲವು ಆಟಗಳನ್ನು ಖಾಸಗಿಯವರು ಸಂಘಟಿಸುತ್ತಾರಾದರೂ ಅವಕ್ಕೆಲ್ಲ ಅನ್ವಯವಾಗುವ ಏಕರೂಪ ನಿಯಮಗಳಿಲ್ಲ. ಸುರಕ್ಷತೆಯ ಅಂಶಗಳಂತೂ ಪ್ರಶ್ನಾರ್ಹವಾಗಿವೆ. ಅಂತಾರಾಷ್ಟ್ರೀಯ ಸುರಕ್ಷತೆಯ ಮಾನದಂಡಗಳನ್ನು ಇಲ್ಲೂ ಅಳವಡಿಸುವುದನ್ನು ಕರಡು ನೀತಿ ಪ್ರಸ್ತಾಪಿಸಿದೆ. ಈ ಕ್ರೀಡೆಯನ್ನು ಉತ್ತೇಜಿಸುವ ಸಂಸ್ಥೆಗಳು ಪಾಲಿಸಬೇಕಾದ ನಿಯಮ, ನಿಯಮ ಉಲ್ಲಂಘನೆಗೆ ಅವು ತೆರಬೇಕಾದ ದಂಡ ಇವೆಲ್ಲದರ ಬಗ್ಗೆ ಕರಡಿನಲ್ಲಿ ಚರ್ಚೆಯಾಗಿದ್ದು, ಈ ಬಗ್ಗೆ ಎಲ್ಲ ಹಿತಾಸಕ್ತ ವಲಯಗಳಿಂದ ಪ್ರತಿಕ್ರಿಯೆ ಬಂದ ನಂತರ ಪಕ್ಕಾ ನೀತಿ ತಯಾರಿಸಲಾಗುತ್ತದೆ.
ಭಾರತವನ್ನು ಈ ಬಗೆಯ ಕ್ರೀಡೆಗಳ ತಾಣವಾಗಿಸಿದರೆ ಇಂಥ ಆಗಸದಾಟಗಳಿಂದ ನೇರವಾಗಿ ಬರುವ ಆದಾಯದ ಜತೆ ಪ್ರವಾಸೋದ್ಯಮವೂ ಅಭಿವೃದ್ಧಿಯಾಗುತ್ತದೆ ಹಾಗೂ ಈ ಹಂತದಲ್ಲಿ ಸ್ಥಳೀಯರಿಗೂ ಉದ್ಯೋಗ ಸಿಗುತ್ತದೆ ಎಂಬ ಚಿಂತನೆ ಸರ್ಕಾರದ್ದು.