ಹೊಸ ದಿಗಂತ ಡಿಜಿಟಲ್ ಡೆಸ್ಕ್:
ಭಾರತೀಯ ಶಿಕ್ಷಣ ಪದ್ಧತಿಗೆ ಉತ್ತೇಜನ ನೀಡಲು ಶಿಕ್ಷಣ ಸಚಿವಾಲಯವು 2023-24ರ ಶೈಕ್ಷಣಿಕ ವರ್ಷದಿಂದ ಹೊಸ ಪದವಿಪೂರ್ವ ಮತ್ತು ಸ್ನಾತಕೋತ್ತರ ಕೋರ್ಸ್‌ಗಳನ್ನು ಆರಂಭಿಸುತ್ತಿದೆ. ವಾಸ್ತುಶಾಸ್ತ್ರದಿಂದ ಹಿಡಿದು ಭಾರತೀಯ ಸಂಗೀತ ವಾದ್ಯಗಳವರೆಗೆ ಹಲವಾರು ವಿಷಯಗಳಲ್ಲಿ ಪದವಿಪೂರ್ವ ಮತ್ತು ಸ್ನಾತಕೋತ್ತರ ಕೋರ್ಸ್‌ಗಳನ್ನು ಆರಂಭಿಸಲಾಗುವುದು.
ಹೊಸ ಶಿಕ್ಷಣ ನೀತಿಯ ನಿಬಂಧನೆಗಳ ಅಡಿಯಲ್ಲಿ ಈ ಹೊಸ ಉಪಕ್ರಮವನ್ನು ತೆಗೆದುಕೊಳ್ಳಲಾಗಿದೆ ಮತ್ತು ಯುಜಿಸಿ ಈಗಾಗಲೇ ಇದಕ್ಕಾಗಿ ಕರಡನ್ನು ಸಿದ್ಧಪಡಿಸಿದೆ.
ಹೊಸ ಕೋರ್ಸ್‌ಗಳು ಹೀಗಿವೆ:
ಭಾರತೀಯ ಭಾಷಾ ವಿಜ್ಞಾನ, ಭಾರತೀಯ ವಾಸ್ತು ಶಾಸ್ತ್ರ, ಭಾರತೀಯ ತರ್ಕ ವಿಜ್ಞಾನ, ಲೋಹಶಾಸ್ತ್ರ ವಿಜ್ಞಾನ, ಶಿಲ್ಪ ವಿಜ್ಞಾನ, ಬೀಜಗಣಿತ, ಭಾರತೀಯ ಸಂಗೀತ ವಾದ್ಯಗಳು, ಬ್ರಿಟಿಷರ ಪೂರ್ವ ಕಾಲದ ನೀರಿನ ನಿರ್ವಹಣೆ. ಇವುಗಳಲ್ಲಿ ಕೆಲವು ಫೌಂಡೇಶನ್ ಕೋರ್ಸ್ಗಳಾಗಿದ್ದರೆ ಇನ್ನು ಕೆಲವು ಆಪ್ಷನಲ್ ಆಗಿರಲಿವೆ.
ಯುಜಿಸಿ ಪ್ರಕಾರ, ವಿಶ್ವವಿದ್ಯಾನಿಲಯಗಳು ಮತ್ತು ಉನ್ನತ ಶಿಕ್ಷಣ ಸಂಸ್ಥೆಗಳು ಮತ್ತು ದೇಶಾದ್ಯಂತದ ರಾಜ್ಯಗಳಿಗೆ ಭಾರತೀಯ ಜ್ಞಾನ ವ್ಯವಸ್ಥೆಗಳ ಆಧಾರದ ಮೇಲೆ ಕೋರ್ಸ್‌ಗಳಿಗೆ ಕರಡನ್ನು ಕಳುಹಿಸಲಾಗಿದೆ.
ವಿಶ್ವವಿದ್ಯಾನಿಲಯಗಳಲ್ಲಿ ಪ್ರವೇಶ ಪಡೆಯುವ ವಿದ್ಯಾರ್ಥಿಗಳು ಭಾರತೀಯ ಜ್ಞಾನ ವ್ಯವಸ್ಥೆಗಳ ಆಧಾರದ ಮೇಲೆ ಈ ಕೋರ್ಸ್‌ಗಳಿಂದ ಕನಿಷ್ಠ ಐದು ಶೇಕಡಾ ಕ್ರೆಡಿಟ್ ಸ್ಕೋರ್ ಪಡೆಯುತ್ತಾರೆ. ಅದಕ್ಕಾಗಿ ಎಲ್ಲಾ ಐಐಟಿ ಸಂಸ್ಥೆಗಳು, ಎಲ್ಲಾ ವಿಶ್ವವಿದ್ಯಾನಿಲಯಗಳ ಕುಲಪತಿಗಳು ಮತ್ತು ಕಾಲೇಜುಗಳ ಪ್ರಾಂಶುಪಾಲರನ್ನು ಸಂಪರ್ಕಿಸಲು ಪ್ರಾಥಮಿಕ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ. ಯುಜಿಸಿ ಈ ಕುರಿತು ಎಲ್ಲರಿಗೂ ಪತ್ರವನ್ನು ಕಳುಹಿಸಿದ್ದು, ಸಾಂಸ್ಕೃತಿಕ ಬೆಳವಣಿಗೆಯನ್ನು ಉತ್ತೇಜಿಸಲು ಈ ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಅದರಲ್ಲಿ ಉಲ್ಲೇಖಿಸಲಾಗಿದೆ.
ಎಲ್ಲರಿಗೂ ಉತ್ತಮ ಗುಣಮಟ್ಟದ ಶಿಕ್ಷಣ ಒದಗಿಸುವ ಮೂಲಕ ಭಾರತವನ್ನು ಪರಿವರ್ತಿಸಲು ನೇರವಾಗಿ ಕೊಡುಗೆ ನೀಡುವ ಭಾರತೀಯ ನೀತಿಯಲ್ಲಿ ಬೇರೂರಿರುವ ಶಿಕ್ಷಣ ವ್ಯವಸ್ಥೆ ನಿರ್ಮಿಸುವುದು ಹೊಸ ನೀತಿಯ ಉದ್ದೇಶವಾಗಿದೆ.
