ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
2022ರ ಐಪಿಎಲ್ ಮಾರ್ಚ್ ಕೊನೆ ವಾರದಿಂದ ಆರಂಭಗೊಂಡು, ಮೇ ತಿಂಗಳ ಅಂತ್ಯದವರೆಗೆ ನಡೆಯಲಿದೆ ಎಂದು ಬಿಸಿಸಿಐ ಕಾರ್ಯದರ್ಶಿ ಜಯ್ ಶಾ ತಿಳಿಸಿದ್ದಾರೆ.
ಬಿಸಿಸಿಐ ಇಂದು ಐಪಿಎಲ್ನ ಎಲ್ಲ ಫ್ರಾಂಚೈಸಿ ಮಾಲೀಕರೊಂದಿಗೆ ಸಭೆ ನಡೆಸಿದ್ದು, ಬಳಿಕ ಮಾಧ್ಯಮಗೋಷ್ಟಿಯಲ್ಲಿ ಭಾಗಿಯಾಗಿ ಮಾತನಾಡಿದ ಜಯ್ ಶಾ, ಐಪಿಎಲ್ ಅನ್ನು ಭಾರತದಲ್ಲೇ ಆಯೋಜಿಸಬೇಕೆಂದು ಅನೇಕ ತಂಡದ ಮಾಲೀಕರು ಅಭಿಪ್ರಾಯವನ್ನು ಹೊರಹಾಕಿದ್ದಾರೆ. ಹೀಗಾಗಿ, ಭಾರತದಲ್ಲೇ ಟೂರ್ನಿ ನಡೆಸಲು ಹೆಚ್ಚಿನ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದರು.
ಈ ಬಾರಿ ಅಹಮದಾಬಾದ್ ಮತ್ತು ಲಕ್ನೋ ತಂಡಗಳು ಹೊಸದಾಗಿ ಸೇರ್ಪಡೆಯಾಗಿದ್ದು, ಹೀಗಾಗಿ ಬಿಸಿಸಿಐ ಉತ್ಸುಕವಾಗಿದೆ. ಆದರೆ ಕ್ರಿಕೆಟ್ ಆಟಗಾರರ ಆರೋಗ್ಯ ಮತ್ತು ಸುರಕ್ಷತೆಯಲ್ಲಿ ಯಾವುದೇ ರೀತಿಯ ರಾಜಿ ಮಾಡಿಕೊಂಡಿಲ್ಲ. ದೇಶದಲ್ಲಿ ಕೋವಿಡ್ ಹೊಸ ರೂಪಾಂತರ ಕಾಣಿಸಿಕೊಂಡಿರುವ ಕಾರಣ ಟೂರ್ನಿ ನಡೆಸಲು ಪ್ಲಾನ್ ಬಿ ರೂಪಿಸಲಾಗಿದೆ ಎಂದರು.
ಇನ್ನು ಐಪಿಎಲ್ ಮೆಗಾ ಹರಾಜು ನಡೆಸಲು ಫೆಬ್ರವರಿ 12-13 ನಿಗದಿಗೊಳಿಸಿದ್ದು, ಅದಕ್ಕೂ ಮುಂಚಿತವಾಗಿ ಐಪಿಎಲ್ ನಡೆಸುವ ಸ್ಥಳಗಳನ್ನ ಖಚಿತ ಪಡಿಸುತ್ತೇವೆ ಎಂದರು.
