ಅನೇಕರು ಊಟ ಮಾಡಿದ ತಕ್ಷಣ ಹೊಟ್ಟೆ ತುಂಬಿದಂತೆ ಆಗುತ್ತದೆ, ಹೊಟ್ಟೆ ಬಲೂನ್ನಂತೆ ಉಬ್ಬುತ್ತದೆ, ಗ್ಯಾಸ್ ಆಗುತ್ತಿದೆ ಎಂದು ಹೇಳುವುದನ್ನು ಕೇಳುತ್ತೇವೆ. ಹೆಚ್ಚಿನವರು ಇದನ್ನು ಸಾಮಾನ್ಯ ಜೀರ್ಣಕ್ರಿಯೆ ಸಮಸ್ಯೆ ಎಂದು ನಿರ್ಲಕ್ಷಿಸುತ್ತಾರೆ. ಆದರೆ ವೈದ್ಯರ ಪ್ರಕಾರ, ಪ್ರತಿ ಊಟದ ಬಳಿಕ ನಿರಂತರವಾಗಿ ಹೊಟ್ಟೆ ಉಬ್ಬುವುದು ಆರೋಗ್ಯಕರ ಜೀರ್ಣಕ್ರಿಯೆಯ ಲಕ್ಷಣವಲ್ಲ…
ಗ್ಯಾಸ್ ಅಷ್ಟೇ ಅಲ್ಲ, ಒಳಗಿರಬಹುದು ಬೇರೆ ಸಮಸ್ಯೆ!
ಊಟದ ಬಳಿಕ ಹೊಟ್ಟೆ ಉಬ್ಬಲು ಹಲವು ಕಾರಣಗಳಿವೆ. ತುಂಬಾ ವೇಗವಾಗಿ ಊಟ ಮಾಡುವುದು, ಆಹಾರದ ಜೊತೆಗೆ ಹೆಚ್ಚು ಗಾಳಿ ಒಳಗೆ ಹೋಗುವುದು, ಕರುಳಿನ ಸಮಸ್ಯೆಗಳು ಅಥವಾ ಜೀರ್ಣಕ್ರಿಯೆ ನಿಧಾನಗೊಳ್ಳುವುದು ಇದಕ್ಕೆ ಕಾರಣವಾಗಬಹುದು. ವೈದ್ಯರ ಪ್ರಕಾರ, ಸಾಮಾನ್ಯವಾಗಿ ಊಟದ ನಂತರ ಸ್ವಲ್ಪ ಭಾರವಾದ ಅನುಭವ ಆಗಬಹುದು. ಆದರೆ ಪ್ರತಿದಿನ, ಪ್ರತಿಯೊಂದು ಊಟದ ನಂತರ ಹೊಟ್ಟೆ ಉಬ್ಬುತ್ತಿದ್ದರೆ ಅದನ್ನು ಗಂಭೀರವಾಗಿ ಪರಿಗಣಿಸಬೇಕು.
ನಿಮಗೂ ಈ ಲಕ್ಷಣಗಳಿವೆಯೇ?
ಊಟ ಮಾಡಿದ ಕೆಲವೇ ನಿಮಿಷಗಳಲ್ಲಿ ಹೊಟ್ಟೆ ಉಬ್ಬುವುದು, ಆಗಾಗ ತೇಗು ಬರುವುದು, ಹೊಟ್ಟೆ ಬಿಗಿಯಾದ ಅನುಭವ, ಎದೆ ಉರಿ ಅಥವಾ ಆಸಿಡ್ ರಿಫ್ಲಕ್ಸ್, ಊಟದ ಬಳಿಕ ತೀವ್ರ ದಣಿವು, ಹೊಟ್ಟೆ ತುಂಬಿದ ಭಾವನೆ ಗಂಟೆಗಳ ಕಾಲ ಇರುವುದು… ಈ ಲಕ್ಷಣಗಳು ಪದೇ ಪದೇ ಕಾಣಿಸಿಕೊಂಡರೆ ಇದು ಜೀರ್ಣಾಂಗ ವ್ಯವಸ್ಥೆ ಸರಿಯಾಗಿ ಕಾರ್ಯನಿರ್ವಹಿಸುತ್ತಿಲ್ಲ ಎಂಬ ಸೂಚನೆಯಾಗಿರಬಹುದು.
ಯಾವ ಆಹಾರಗಳು ಕಾರಣವಾಗಬಹುದು?
ಕೆಲವರಿಗೆ ಡೇರಿ ಉತ್ಪನ್ನಗಳು, ಬೀನ್ಸ್, ಎಲೆಕೋಸು, ಬ್ರೊಕೊಲಿ, ಸಕ್ಕರೆ ಆಲ್ಕೋಹಾಲ್ ಇರುವ ಆಹಾರಗಳು, ಕಾರ್ಬೊನೇಟೆಡ್ ಪಾನೀಯಗಳು ಹಾಗೂ ಎಣ್ಣೆಯಲ್ಲಿ ಕರಿದ ಆಹಾರಗಳು ಹೊಟ್ಟೆ ಉಬ್ಬರ ಹೆಚ್ಚಿಸಬಹುದು. ಕರಿದ ಆಹಾರಗಳು ಜೀರ್ಣಕ್ರಿಯೆಯನ್ನು ನಿಧಾನಗೊಳಿಸಿ ಹೊಟ್ಟೆಯಲ್ಲಿ ಭಾರ ಮತ್ತು ಉಬ್ಬರ ಉಂಟುಮಾಡುತ್ತವೆ.
ಇದನ್ನೂ ಓದಿ:
ಯಾವಾಗ ವೈದ್ಯರನ್ನು ಸಂಪರ್ಕಿಸಬೇಕು?
ಸಾಮಾನ್ಯ ಉಬ್ಬರ ಕೆಲ ಗಂಟೆಗಳಲ್ಲಿ ಕಡಿಮೆಯಾಗುತ್ತದೆ. ಆದರೆ ನಿರಂತರ ಹೊಟ್ಟೆ ನೋವು, ವಾಂತಿ, ತೂಕ ಕಡಿಮೆಯಾಗುವುದು, ಹಸಿವು ಕಡಿಮೆಯಾಗುವುದು, ಮಲವಿಸರ್ಜನೆಯಲ್ಲಿ ಬದಲಾವಣೆ ಕಂಡುಬರುತ್ತಿದ್ದಲ್ಲಿ ವೈದ್ಯರ ಸಲಹೆ ಪಡೆಯುವುದು ಅಗತ್ಯ:
ಉಬ್ಬರ ಕಡಿಮೆ ಮಾಡಲು ಏನು ಮಾಡಬೇಕು?
ನಿಧಾನವಾಗಿ ಊಟ ಮಾಡಿ, ಆಹಾರವನ್ನು ಚೆನ್ನಾಗಿ ಜಗಿದು ತಿನ್ನಿ, ಊಟದ ಬಳಿಕ 10-15 ನಿಮಿಷ ನಡೆಯಿರಿ, ಹೆಚ್ಚು ಎಣ್ಣೆ ಮತ್ತು ಕರಿದ ಆಹಾರ ಕಡಿಮೆ ಮಾಡಿ, ಯಾವ ಆಹಾರದಿಂದ ಸಮಸ್ಯೆ ಆಗುತ್ತದೆ ಎಂಬುದನ್ನು ಗಮನಿಸಿ, ಸಾಕಷ್ಟು ನೀರು ಕುಡಿಯಿರಿ, ಒತ್ತಡ (Stress) ನಿಯಂತ್ರಿಸಿ. ಇವು ಹೊಟ್ಟೆ ಉಬ್ಬರವನ್ನು ಗಣನೀಯವಾಗಿ ಕಡಿಮೆ ಮಾಡಲು ಸಹಕಾರಿ ಎನ್ನುತ್ತಾರೆ ವೈದ್ಯರು.
