ಗೊತ್ತಿರಲಿ | ರಾತ್ರಿಯ ಊಟ ಮತ್ತು ನಿದ್ರೆಯ ನಡುವೆ ಎಷ್ಟು ಸಮಯದ ಅಂತರವಿರಬೇಕು ಗೊತ್ತಾ?

ರಾತ್ರಿಯ ಊಟ ಮಾಡಿದ ಕೂಡಲೇ ಮಲಗುವುದು ಅನೇಕರು ಪಾಲಿಸುವ ಅಭ್ಯಾಸ. ಆದರೆ ಈ ಅಭ್ಯಾಸ ಜೀರ್ಣಕ್ರಿಯೆಗೆ ತೊಂದರೆ ಉಂಟುಮಾಡುವುದರ ಜೊತೆಗೆ ದೇಹದ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತದೆ.

ಉತ್ತಮ ಜೀರ್ಣಕ್ರಿಯೆ, ಸುಖನಿದ್ರೆ ಮತ್ತು ತೂಕ ನಿಯಂತ್ರಣಕ್ಕಾಗಿ ರಾತ್ರಿ ಊಟ ಹಾಗೂ ನಿದ್ದೆಯ ನಡುವೆ ಸರಿಯಾದ ಸಮಯದ ಅಂತರ ಇರಬೇಕು ಎಂದು ಆರೋಗ್ಯ ತಜ್ಞರು ಸಲಹೆ ನೀಡುತ್ತಾರೆ.

ಎಷ್ಟು ಸಮಯದ ಅಂತರ ಇರಬೇಕು?

ರಾತ್ರಿಯ ಊಟ ಮತ್ತು ನಿದ್ದೆಯ ನಡುವೆ ಕನಿಷ್ಠ 2 ರಿಂದ 3 ಗಂಟೆಗಳ ಅಂತರ ಇರುವುದು ಉತ್ತಮ. ಈ ಅವಧಿಯಲ್ಲಿ ಆಹಾರ ಜೀರ್ಣವಾಗಲು ದೇಹಕ್ಕೆ ಸಮಯ ಸಿಗುತ್ತದೆ. ಇದರಿಂದ ಹೊಟ್ಟೆ ಉಬ್ಬರ, ಎದೆಯುರಿ ಮತ್ತು ಅಜೀರ್ಣದಂತಹ ಸಮಸ್ಯೆಗಳು ಕಡಿಮೆಯಾಗುತ್ತವೆ.

ಊಟ ಮಾಡಿದ ತಕ್ಷಣ ಮಲಗಿದರೆ ಏನಾಗುತ್ತೆ?

ಊಟವಾದ ಕೂಡಲೇ ಮಲಗಿದರೆ ಜೀರ್ಣಕ್ರಿಯೆ ನಿಧಾನಗೊಳ್ಳಬಹುದು. ಹೊಟ್ಟೆಯಲ್ಲಿರುವ ಆಮ್ಲ ಮೇಲಕ್ಕೆ ಬಂದು ಎದೆಯುರಿ, ಆಸಿಡ್ ರಿಫ್ಲಕ್ಸ್ ಹಾಗೂ ಅಜೀರ್ಣದ ಸಮಸ್ಯೆ ಉಂಟಾಗುವ ಸಾಧ್ಯತೆ ಹೆಚ್ಚಿರುತ್ತದೆ. ಕೆಲವರಿಗೆ ನಿದ್ರೆಯ ಗುಣಮಟ್ಟವೂ ಹದಗೆಡಬಹುದು.

ರಾತ್ರಿ ಊಟ ಹೇಗಿರಬೇಕು?

ರಾತ್ರಿ ಊಟವನ್ನು ಸಾಧ್ಯವಾದಷ್ಟು ಹಗುರವಾಗಿ ಮಾಡುವುದು ಒಳ್ಳೆಯದು. ತರಕಾರಿ, ಬೇಳೆ, ಸೂಪ್, ರೊಟ್ಟಿ ಅಥವಾ ಸಿರಿಧಾನ್ಯಗಳಿಂದ ತಯಾರಿಸಿದ ಆಹಾರ ಉತ್ತಮ ಆಯ್ಕೆಯಾಗಬಹುದು. ಅತಿಯಾದ ಎಣ್ಣೆ, ಕರಿದ ಪದಾರ್ಥಗಳು ಮತ್ತು ಹೆಚ್ಚು ಸಿಹಿ ಇರುವ ಆಹಾರವನ್ನು ರಾತ್ರಿ ತಪ್ಪಿಸುವುದು ಒಳಿತು.

ಈ ಅಭ್ಯಾಸಗಳನ್ನು ಪಾಲಿಸಿ

• ರಾತ್ರಿ 7.00 ರಿಂದ 8.30 ಗಂಟೆಯೊಳಗೆ ಊಟ ಮುಗಿಸಲು ಪ್ರಯತ್ನಿಸಿ.
• ಊಟದ ಬಳಿಕ 10–15 ನಿಮಿಷ ನಿಧಾನವಾಗಿ ನಡೆಯಿರಿ.
• ಊಟ ಮಾಡಿದ ತಕ್ಷಣ ಮಲಗುವುದು ಅಥವಾ ಭಾರೀ ವ್ಯಾಯಾಮ ಮಾಡುವುದು ತಪ್ಪಿಸಿ.
• ಮಲಗುವ ಮುನ್ನ ಹೆಚ್ಚು ಕಾಫಿ, ಟೀ ಅಥವಾ ಸಕ್ಕರೆ ಪಾನೀಯಗಳನ್ನು ಸೇವಿಸಬೇಡಿ.
• ಪ್ರತಿದಿನ ಒಂದೇ ಸಮಯಕ್ಕೆ ಊಟ ಮತ್ತು ನಿದ್ರೆಯ ಅಭ್ಯಾಸ ರೂಢಿಸಿಕೊಳ್ಳಿ.