ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌ :
ಶಾಲೆಯಲ್ಲಿ ಶಿಕ್ಷಕರನ್ನು ‘ಸರ್’ ಅಥವಾ ‘ಮೇಡಂ’ ಎಂದು ಕರೆಯುವ ಬದಲು ‘ಶಿಕ್ಷಕ’ ಎಂದು ಸಂಬೋಧಿಸಬೇಕೆಂದು ಕೇರಳದ ತಿರುವನಂತಪುರಂ ನಲ್ಲಿ ಮಕ್ಕಳ ಹಕ್ಕುಗಳ ಸಮಿತಿ ನಿರ್ದೇಶಿಸಿದೆ. ‘ಶಿಕ್ಷಕ’ ಎಂಬುದು ‘ಸರ್’ ಅಥವಾ ‘ಮೇಡಂ’ ನಂತಹ ಗೌರವಾರ್ಥ ಪದಗಳಿಗಿಂತ ಹೆಚ್ಚು ಲಿಂಗ-ತಟಸ್ಥ ಪದವಾಗಿದೆ ಎಂದು ಕೇರಳ ರಾಜ್ಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗ (KSCPCR) ಇತ್ತೀಚಿನ ಆದೇಶದಲ್ಲಿ ತಿಳಿಸಿದೆ.
ಸಮಿತಿಯ ಅಧ್ಯಕ್ಷ ಕೆ ವಿ ಮನೋಜ್ ಕುಮಾರ್ ಮತ್ತು ಸದಸ್ಯ ಸಿ ವಿಜಯಕುಮಾರ್ ಅವರನ್ನೊಳಗೊಂಡ ಪೀಠ ರಾಜ್ಯದ ಎಲ್ಲಾ ಶಾಲೆಗಳಲ್ಲಿ ‘ಶಿಕ್ಷಕ’ ಪದವನ್ನು ಬಳಸಲು ಸೂಚನೆಗಳನ್ನು ನೀಡುವಂತೆ ಸಾಮಾನ್ಯ ಶಿಕ್ಷಣ ಇಲಾಖೆಗೆ ಬುಧವಾರ ಸೂಚಿಸಿದೆ.
ಶಿಕ್ಷಕರನ್ನು ಅವರ ಲಿಂಗಕ್ಕೆ ಅನುಗುಣವಾಗಿ ‘ಸರ್’ ಮತ್ತು ‘ಮೇಡಂ’ ಎಂದು ಸಂಬೋಧಿಸುವಾಗ ತಾರತಮ್ಯವನ್ನು ಕೊನೆಗೊಳಿಸುವಂತೆ ಕೋರಿ ವ್ಯಕ್ತಿಯೊಬ್ಬರು ಸಲ್ಲಿಸಿದ ಮನವಿಯನ್ನು ಪರಿಗಣಿಸುವಾಗ ಈ ನಿರ್ದೇಶನವನ್ನು ನೀಡಲಾಗಿದೆ. ದೂರುದಾರರು ಶಿಕ್ಷಕರನ್ನು ಲಿಂಗ-ತಟಸ್ಥ ರೀತಿಯಲ್ಲಿ ಸಂಬೋಧಿಸಬೇಕೆಂದು ಬಯಸಿದ್ದರು.
ಲಿಂಗ ತಾರತಮ್ಯವಿಲ್ಲದೆ ಗೌರವಯುತವಾಗಿ ಸಂಬೋಧಿಸಲು ಎಲ್ಲಾ ಶಿಕ್ಷಣ ಸಂಸ್ಥೆಗಳಲ್ಲಿ ‘ಶಿಕ್ಷಕ’ ಎಂಬ ಪದವನ್ನು ಬಳಸುವಂತೆ ನಿರ್ದೇಶನ ನೀಡಲು ಕ್ರಮಕೈಗೊಳ್ಳಬೇಕು ಎಂದು ಸಮಿತಿಯು ತನ್ನ ಆದೇಶದಲ್ಲಿ ತಿಳಿಸಿದೆ.
“ಸರ್” ಅಥವಾ ‘ಮೇಡಂ’ ಎಂಬ ಗೌರವಾರ್ಥಗಳು ಶಿಕ್ಷಕರ ಪರಿಕಲ್ಪನೆಯೊಂದಿಗೆ ಹೊಂದಿಕೆಯಾಗುವುದಿಲ್ಲ ಎಂದು ಅದು ಗಮನಿಸಿದೆ. ಅಲ್ಲದೆ ‘ಶಿಕ್ಷಕ’ ಪದವು ಶಿಕ್ಷಕರು ಮತ್ತು ವಿದ್ಯಾರ್ಥಿಗಳನ್ನು ಹತ್ತಿರಕ್ಕೆ ತರುತ್ತದೆ ಎಂಬ ಆಲೋಚನೆಯಲ್ಲಿ ಈ ಕ್ರಮ ಕೈಗೊಂಡಿದೆ.
