ಹೊಸದಿಗಂತ ಡಿಜಿಟಲ್ ಡೆಸ್ಕ್:
ನೀಟ್ ಅಕ್ರಮ ಖಂಡಿಸಿ CJP ನಡೆಸಿದ ಚಳವಳಿ ಶಿಕ್ಷಣ ಸಚಿವರ ಪೀಠವನ್ನೇ ಅಲ್ಲಾಡಿಸಿದ ಬೆನ್ನಲ್ಲೇ, ಈಗ ‘E20 ಜನತಾ ಪಕ್ಷ’ ಎಂಬ ನೂತನ ಸಂಸ್ಥೆ ದೇಶಾದ್ಯಂತ ಭಾರಿ ಸಂಚಲನ ಮೂಡಿಸುತ್ತಿದೆ. ಶೇ. 20 ಎಥೆನಾಲ್ ಮಿಶ್ರಿತ ಪೆಟ್ರೋಲ್ ಬದಲು ಸಾರ್ವಜನಿಕರಿಗೆ ಶೇ. 100 ರಷ್ಟು ಶುದ್ಧ ಪೆಟ್ರೋಲ್ ಬಳಸುವ ಹಕ್ಕು ನೀಡಬೇಕು ಎಂದು ಒತ್ತಾಯಿಸಿ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಅವರ ರಾಜೀನಾಮೆಗೆ ಅಭಿಯಾನ ಆರಂಭಿಸಿದೆ.
ಸೋಶಿಯಲ್ ಮೀಡಿಯಾ ಬೆಂಬಲ ಮತ್ತು ‘ದೆಹಲಿ ಚಲೋ’
ಸಾಮಾಜಿಕ ಜಾಲತಾಣ ‘X’ ನಲ್ಲಿ ಶುರುವಾದ ಈ ಅಭಿಯಾನಕ್ಕೆ ಕ್ಷಣಾರ್ಧದಲ್ಲೇ 25,000ಕ್ಕೂ ಅಧಿಕ ಜನರು ಬೆಂಬಲ ಸೂಚಿಸಿದ್ದಾರೆ. ದೆಹಲಿಯ ಟ್ಯಾಕ್ಸಿ ಹಾಗೂ ಪ್ರವಾಸಿ ವಾಹನ ಒಕ್ಕೂಟಗಳು ಸಹಯೋಗ ನೀಡಿದ್ದು, ಆಗಸ್ಟ್ 4 ರಂದು ಸಂಸತ್ ಭವನಕ್ಕೆ ಬೃಹತ್ ಚಲೋ ಹಮ್ಮಿಕೊಳ್ಳಲಾಗಿದೆ.
ವಾಹನ ಚಾಲಕರ ಪ್ರಮುಖ ದೂರುಗಳು
ಎಥೆನಾಲ್ ಇಂಧನದಿಂದ ವಾಹನಗಳ ಮೈಲೇಜ್ ಕುಸಿಯುತ್ತಿದ್ದು, ಹಳೆಯ ಇಂಜಿನ್ಗಳು ಬೇಗನೇ ಹಾಳಾಗುತ್ತಿವೆ ಎಂಬುದು ಚಾಲಕರ ಗೋಳು. “ನಾವು ಉಚಿತ ಇಂಧನವಾಗಲಿ ಅಥವಾ ರಿಯಾಯಿತಿಯನ್ನಾಗಲಿ ಕೇಳುತ್ತಿಲ್ಲ. ಎಥೆನಾಲ್ ಸಂಪೂರ್ಣ ನಿಷೇಧಿಸಿ ಎಂದೂ ಹೇಳುತ್ತಿಲ್ಲ. ಬದಲಿಗೆ ಶುದ್ಧ ಪೆಟ್ರೋಲ್ ಆಯ್ಕೆ ಮಾಡುವ ಅಧಿಕಾರ ಪ್ರತಿಯೊಬ್ಬ ಗ್ರಾಹಕನಿಗೂ ಸಿಗಬೇಕು” ಎಂಬುದು ಹೋರಾಟಗಾರರ ಸ್ಪಷ್ಟ ನಿಲುವು.
ಪಾರದರ್ಶಕತೆ ಮತ್ತು ಸರ್ಕಾರದ ಸ್ಪಷ್ಟನೆ
ಪ್ರತಿಯೊಂದು ಪೆಟ್ರೋಲ್ ಬಂಕ್ಗಳಲ್ಲಿ ಇಂಧನದ ಗುಣಮಟ್ಟ, ಮೈಲೇಜ್ ಪ್ರಮಾಣ ಹಾಗೂ ಎಂಜಿನ್ ಮೇಲಾಗುವ ಪರಿಣಾಮಗಳ ಕುರಿತು ಅಧಿಕೃತ ಅಧ್ಯಯನ ವರದಿಗಳನ್ನು ಪ್ರದರ್ಶಿಸಬೇಕು ಎಂದು ಸಂಘಟನೆ ಆಗ್ರಹಿಸಿದೆ. ಆದರೆ, ಈ ಬಗ್ಗೆ ಕೇಂದ್ರ ಸರ್ಕಾರಕ್ಕೆ ಯಾವುದೇ ಅಧಿಕೃತ ದೂರುಗಳು ಬಂದಿಲ್ಲ ಎಂದು ಪೆಟ್ರೋಲಿಯಂ ಸಚಿವ ಸುರೇಶ್ ಗೋಪಿ ಸಂಸತ್ತಿನಲ್ಲಿ ತಿಳಿಸಿದ್ದಾರೆ.
