ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ನಗರಗಳಲ್ಲಿ ದನ-ಕರುಗಳ ಹಾವಳಿಯಿಂದ ಬೇಸತ್ತ ರಾಜಸ್ತಾನ ಸರ್ಕಾರ ಕಠಿಣ ನಿಯಮಾವಳಿಗಳನ್ನು ಜಾರಿ ಮಾಡಿದೆ. ರಸ್ತೆಯಲ್ಲಿ ಎಲ್ಲೆಂದರಲ್ಲಿ ಜಾನುವಾರುಗಳ ಓಡಾಟದಿಂದ ಪ್ರಯಾಣಿಕರಿಗೆ ತೊಂದರೆಯಾಗುತ್ತಿರುವುದನ್ನು ಅರಿತ ಸರ್ಕಾರ ಇಂತಹ ನಿರ್ಧಾರಕ್ಕೆ ಕೈ ಹಾಕಿದೆ.
ಪಟ್ಟಣಗಳು ಮತ್ತು ನಗರಗಳಲ್ಲಿ ಜಾನುವಾರುಗಳನ್ನು ಸಾಕಲು ಇನ್ನು ಮುಂದೆ ಮಾಲೀಕರು ವಾರ್ಷಿಕ ಪರವಾನಗಿಯನ್ನು ಪಡೆಯಬೇಕು ಎಂದು ರಾಜಸ್ಥಾನ ಸರ್ಕಾರ ಆದೇಶಿಸಿದೆ. ಹಸು-ಕರು ಮತ್ತು ಎಮ್ಮೆಗಳನ್ನು ಸಾಕುವ ಮಾಲೀಕರು, ನಗರ ಪಾಲಿಕೆಗಳು ಮತ್ತು ಕೌನ್ಸಿಲ್‌ಗಳ ಅಡಿಯಲ್ಲಿ ವಾರ್ಷಿಕ ಪರವಾನಗಿ ಪಡೆದು, ಜಾನುವಾರುಗಳಿಗೆ ಕನಿಷ್ಠ 100 ಅಡಿ ಜಾಗ ಮಂಜೂರು ಮಾಡುವುದನ್ನು ಕಡ್ಡಾಯಗೊಳಿಸಿದೆ.
ಜಾನುವಾರುಗಳು ರಸ್ತೆಯಲ್ಲಿ ಓಡಾಡಿದರೆ ಮಾಲೀಕರಿಗೆ ₹ 10 ಸಾವಿರ ದಂಡ ವಿಧಿಸಲಾಗುತ್ತದೆ. ಪರವಾನಗಿ ಇಲ್ಲದ ಮನೆಯಲ್ಲಿ ಒಂದಕ್ಕಿಂತ ಹೆಚ್ಚು ಹಸು ಮತ್ತು ಕರುಗಳನ್ನು ಸಾಕಬಾರದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಹೊಸ ನಿಯಮಗಳ ಅಡಿಯಲ್ಲಿ ಪರವಾನಗಿ ಪಡೆಯಲು, ಅರ್ಜಿದಾರರು ಜಾನುವಾರುಗಳಿಗೆ ಗೊತ್ತುಪಡಿಸಿದ ಸ್ಥಳದ ವಿವರಗಳನ್ನು ಮತ್ತು ಜಾನುವಾರು ತ್ಯಾಜ್ಯವನ್ನು ಹೇಗೆ ನಿರ್ವಹಿಸುತ್ತಾರೆ ಎಂಬುದನ್ನು ದೃಢೀಕರಿಸಬೇಕು. ನೈರ್ಮಲ್ಯದ ನಿರ್ಲಕ್ಷ್ಯಕ್ಕಾಗಿ 5,000 ದಂಡವನ್ನು ವಿಧಿಸಲಾಗುತ್ತದೆ.
ಜಾನುವಾರುಗಳಿಗೆ ಮಾಲೀಕರ ಹೆಸರು ಹಾಗೂ ಫೋನ್ ನಂಬರ್ ಟ್ಯಾಗ್ ಮಾಡಬೇಕು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇದೇ ವೇಳೆ ಸಾರ್ವಜನಿಕ ಸ್ಥಳಗಳಲ್ಲಿ ಅನುಮತಿ ಇಲ್ಲದೆ ಜಾನುವಾರುಗಳ ಮೇವು ಮಾರಾಟ ಮಾಡಬಾರದು ಹಾಗೂ ನಿಯಮ ಉಲ್ಲಂಘಿಸಿದರೆ ₹ 500 ದಂಡ ವಿಧಿಸಲಾಗುವುದು ಎಂದು ಅಧಿಕಾರಿಗಳು ಎಚ್ಚರಿಕೆ ನೀಡಿದರು.
