ಹೊಸದಿಗಂತ ಡಿಜಿಟಲ್ ಡೆಸ್ಕ್:
ನಿರ್ದೇಶಕ ನಿತೇಶ್ ತಿವಾರಿ ಅವರ ಬಹುನಿರೀಕ್ಷಿತ ಹಾಗೂ ಅತ್ಯಂತ ಮಹತ್ವಾಕಾಂಕ್ಷೆಯ ಪ್ಯಾನ್-ಇಂಡಿಯನ್ ಚಿತ್ರ ‘ರಾಮಾಯಣ: ರೈಸ್ ಆಫ್ ಎ ಲೆಜೆಂಡ್’ ಸದ್ಯ ಜಾಗತಿಕ ಮಟ್ಟದಲ್ಲಿ ಭಾರೀ ಸದ್ದು ಮಾಡುತ್ತಿದೆ. ರಣ್‌ಬೀರ್ ಕಪೂರ್, ಸಾಯಿ ಪಲ್ಲವಿ ಮತ್ತು ರಾಕಿಂಗ್ ಸ್ಟಾರ್ ಯಶ್ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ ಈ ಚಿತ್ರದ ಅಂತಾರಾಷ್ಟ್ರೀಯ ಟ್ರೇಲರ್ ಬಿಡುಗಡೆಗೆ ಬೆಂಗಳೂರು ಸಜ್ಜಾಗಿದೆ. ಇದರ ಬೆನ್ನಲ್ಲೇ ಚಿತ್ರದ ಅಮೆರಿಕದ ಸೆನ್ಸಾರ್ ರೇಟಿಂಗ್ ಹಾಗೂ ರನ್‌ಟೈಮ್ ಅಧಿಕೃತವಾಗಿ ಹೊರಬಿದ್ದಿದ್ದು, ಸಿನಿಪ್ರಿಯರಲ್ಲಿ ಕುತೂಹಲ ದುಪ್ಪಟ್ಟಾಗಿದೆ.
ಅಮೆರಿಕದ ‘ಮೋಷನ್ ಪಿಕ್ಚರ್ ಅಸೋಸಿಯೇಷನ್’ ಈ ಚಿತ್ರಕ್ಕೆ PG-13 ರೇಟಿಂಗ್ ನೀಡಿದೆ. ಇದರರ್ಥ ಚಿತ್ರದಲ್ಲಿರುವ ತೀವ್ರವಾದ ಯುದ್ಧ ಸನ್ನಿವೇಶಗಳು, ರಕ್ತಸಿಕ್ತ ಹಿನ್ನೆಲೆ ಹಾಗೂ ಭೀಕರ ಆಕ್ಷನ್ ದೃಶ್ಯಗಳಿಂದಾಗಿ 13 ವರ್ಷದೊಳಗಿನ ಮಕ್ಕಳು ಪೋಷಕರ ಮಾರ್ಗದರ್ಶನದಲ್ಲಿ ಮಾತ್ರ ವೀಕ್ಷಿಸಬೇಕು. ಇದು ಭಾರತದ ‘ಯು/ಎ’ ಪ್ರಮಾಣಪತ್ರಕ್ಕೆ ಬಹುತೇಕ ಸರಿಸಮಾನವಾಗಿದ್ದು, ಚಿತ್ರದಲ್ಲಿ ಅತ್ಯಂತ ಶಕ್ತಿಶಾಲಿ ಮತ್ತು ದೈತ್ಯ ಹೋರಾಟಗಳು ಇರಲಿವೆ ಎಂಬುದನ್ನು ಇದು ಸ್ಪಷ್ಟಪಡಿಸುತ್ತದೆ.
ಚಿತ್ರದ ಬಿಡುಗಡೆಗೂ ಮುನ್ನ ಇದರ ಅವಧಿಯ ಬಗ್ಗೆಯೂ ಭಾರೀ ಚರ್ಚೆ ನಡೆಯುತ್ತಿದೆ. ಐಮ್ಯಾಕ್ಸ್ ಪಟ್ಟಿಯ ಪ್ರಕಾರ ಚಿತ್ರದ ರನ್-ಟೈಮ್ 3 ಗಂಟೆ 15 ನಿಮಿಷಗಳಷ್ಟು ಇರಬಹುದೆಂದು ಅಂದಾಜಿಸಲಾಗಿದೆ. ಒಂದು ವೇಳೆ ಇದು ಖಚಿತಗೊಂಡರೆ, ರಣ್‌ಬೀರ್ ಕಪೂರ್ ವೃತ್ತಿಜೀವನದಲ್ಲಿ ‘ಅನಿಮಲ್’ ಚಿತ್ರದ ಬಳಿಕ 3 ಗಂಟೆಗಳ ಗಡಿ ದಾಟುತ್ತಿರುವ ಎರಡನೇ ಸಿನಿಮಾ ಇದಾಗಲಿದೆ. ಆದರೆ, ಇಂಗ್ಲಿಷ್ ಆವೃತ್ತಿಯು ಸುಮಾರು 2 ಗಂಟೆ 45 ನಿಮಿಷಗಳಿರಬಹುದು ಎಂದು ವರದಿಗಳು ತಿಳಿಸಿದ್ದು, ಚಿತ್ರತಂಡದಿಂದ ಅಂತಿಮ ಅಧಿಕೃತ ಪ್ರಕಟಣೆ ಹೊರಬರಬೇಕಿದೆ.
