ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಗವರ್ನರ್ ಶಕ್ತಿಕಾಂತ ದಾಸ್ ನೇತೃತ್ವದ ಆರು ಸದಸ್ಯರ ಹಣಕಾಸು ನೀತಿ ಸಮಿತಿ (ಎಂಪಿಸಿ) ನಿರ್ಧಾರವನ್ನು ಬುಧವಾರ ಪ್ರಕಟಿಸಲಾಗಿದೆ. ಹಣದುಬ್ಬರವು ಸಹಿಷ್ಣುತೆಯ ಮಟ್ಟವನ್ನು ಮೀರಿರುವುದರಿಂದ ಕೇಂದ್ರ ಬ್ಯಾಂಕ್ ತನ್ನ ಪ್ರಮುಖ ನೀತಿ ದರವನ್ನು ಹೆಚ್ಚಿಸಿದೆ.
ಪ್ರಸ್ತುತ ಸಭೆಯ ನಂತರ ರೆಪೊ ದರವನ್ನು 35 ಬೆಸಿಸ್‌ ಪಾಯಿಂಟ್‌ ಗಳಷ್ಟು ಏರಿಕೆ ಮಾಡಲಾಗಿದೆ. ಇದು ಕಳೆದ ಮೂರು ಏರಿಕೆಗಳಿಗೆ ಹೋಲಿಸಿದರೆ ಅತಿ ಕಡಿಮೆ ಏರಿಕೆಯಾಗಿದೆ. ಕೋವಿಡ್-ಪ್ರೇರಿತ ಲಾಕ್‌ಡೌನ್‌ನ ಪರಿಣಾಮವನ್ನು ತಗ್ಗಿಸುವ ಗುರಿಯೊಂದಿಗೆ RBI ಮಾರ್ಚ್, 2020 ರಲ್ಲಿ ರೆಪೊ ದರವನ್ನು ಕಡಿತಗೊಳಿಸಿತ್ತು ಮತ್ತು ಮೇ 4, 2022 ರಂದು ಹೆಚ್ಚಿಸುವ ಮೊದಲು ಬೆಂಚ್‌ಮಾರ್ಕ್ ಬಡ್ಡಿ ದರದಲ್ಲಿ ಸುಮಾರು ಎರಡು ವರ್ಷಗಳ ಕಾಲ ಯಥಾಸ್ಥಿತಿ ಕಾಯ್ದುಕೊಂಡಿತ್ತು. RBI ಮೇ ತಿಂಗಳಲ್ಲಿ ತನ್ನ ಮೊದಲ ನಿಗದಿತ ಮಧ್ಯ ಸಭೆಯ ಹೆಚ್ಚಳದಿಂದ ಒಟ್ಟು 190 ಬೇಸಿಸ್ ಪಾಯಿಂಟ್‌ಗಳಷ್ಟು ರೆಪೊದರವನ್ನು ಹೆಚ್ಚಿಸಿದೆ.
ಈ ಕುರಿತು ಗವರ್ನರ್ ಶಕ್ತಿಕಾಂತ್‌ ದಾಸ್ ಮಾತನಾಡಿದ್ದು “ಉಕ್ರೇನ್ ಯುದ್ಧವು ವಿಶ್ವ ಆರ್ಥಿಕ ದೃಷ್ಟಿಕೋನವನ್ನು ಮೂಲಭೂತವಾಗಿ ಬದಲಾಯಿಸಿದೆ. ಉದಯೋನ್ಮುಖ ದೇಶಗಳ ಮೇಲೆ ಹೆಚ್ಚು ಪರಿಣಾಮ ಬೀರಿವೆ” ಎಂದಿದ್ದಾರೆ. “ಭಾರತೀಯ ಕಾರ್ಪೊರೇಟ್‌ಗಳು ಮೊದಲಿಗಿಂತ ಆರೋಗ್ಯಕರವಾಗಿವೆ. ಭಾರತದ ಆರ್ಥಿಕತೆಯು ಚೇತರಿಸಿಕೊಳ್ಳುತ್ತಿದೆ. ನಮ್ಮ ಹಣದುಬ್ಬರವು ಪ್ರಪಂಚದ ಹೆಚ್ಚಿನ ಭಾಗದಲ್ಲಿರುವಂತೆ ಎತ್ತರದಲ್ಲಿದೆ, ಈ ವರ್ಷ ಭಾರತದ ಆರ್ಥಿಕತೆಯು ಏಷ್ಯಾದಲ್ಲಿ ವೇಗವಾಗಿ ಬೆಳೆಯಲಿದೆ” ಎಂದು ಅವರು ಹೇಳಿದ್ದಾರೆ.
