ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಸಾಮಾನ್ಯವಾಗಿ ತಲೆನೋವು ಎಂದರೆ ನಾವೆಲ್ಲರೂ ಮಾತ್ರೆ ನುಂಗಿ ಸುಮ್ಮನಾಗುತ್ತೇವೆ. ಆದರೆ ತಲೆಯ ಒಂದು ಬದಿಯಲ್ಲಿ ವಿಪರೀತ ನೋವು ಬಂದು, ಅದರ ಜೊತೆಗೆ ಕಣ್ಣಿನಿಂದ ನೀರು ಸುರಿಯಲು ಪ್ರಾರಂಭಿಸಿದರೆ ಅದನ್ನು ನಿರ್ಲಕ್ಷಿಸುವುದು ಅಪಾಯಕಾರಿ. ಇಂತಹ ಲಕ್ಷಣಗಳು ಸೈನಸೈಟಿಸ್ ಅಥವಾ ಕ್ಲಸ್ಟರ್ ತಲೆನೋವು ಎರಡರಲ್ಲೂ ಕಾಣಿಸಿಕೊಳ್ಳಬಹುದು. ಇವೆರಡರ ನಡುವಿನ ವ್ಯತ್ಯಾಸ ತಿಳಿಯುವುದು ಸೂಕ್ತ ಚಿಕಿತ್ಸೆಗೆ ಅತ್ಯಗತ್ಯ.
ರೋಗಲಕ್ಷಣಗಳ ವ್ಯತ್ಯಾಸ
ಸೈನಸೈಟಿಸ್: ಮೂಗಿನ ಸುತ್ತಲಿನ ಗಾಳಿಯ ಚೀಲಗಳಲ್ಲಿ ಉರಿಯೂತ ಉಂಟಾದಾಗ ಇದು ಬರುತ್ತದೆ. ಇದರಲ್ಲಿ ಹಣೆಯ ಭಾಗ, ಕೆನ್ನೆ ಹಾಗೂ ಮೂಗಿನ ಮೇಲ್ಭಾಗದಲ್ಲಿ ಭಾರವಾದ ನೋವಿರುತ್ತದೆ. ಕಣ್ಣಿನಲ್ಲಿ ನೀರು ಬರುವುದು, ಮೂಗು ಕಟ್ಟುವುದು, ಗಟ್ಟಿ ಲೋಳೆ ಬರುವುದು ಮತ್ತು ಜ್ವರ ಬರುವುದು ಇದರ ಪ್ರಮುಖ ಲಕ್ಷಣಗಳು. ನೋವು ನಿಧಾನವಾಗಿ ಶುರುವಾಗಿ ಇಡೀ ದಿನ ಇರುತ್ತದೆ.
ಕ್ಲಸ್ಟರ್ ತಲೆನೋವು: ಇದನ್ನು ಅತ್ಯಂತ ತೀವ್ರವಾದ ನೋವುಗಳಲ್ಲಿ ಒಂದೆಂದು ಕರೆಯಲಾಗುತ್ತದೆ. ಇದು ಇದ್ದಕ್ಕಿದ್ದಂತೆ ಕಣ್ಣಿನ ಹಿಂಭಾಗದಲ್ಲಿ ಅಥವಾ ತಲೆಯ ಒಂದು ಬದಿಯಲ್ಲಿ ಸೂಜಿಯಿಂದ ಚುಚ್ಚಿದಂತೆ ವಿಪರೀತವಾಗಿ ಪ್ರಾರಂಭವಾಗುತ್ತದೆ. ನೋವಿರುವ ಕಣ್ಣು ಕೆಂಪಾಗುವುದು, ಕಣ್ಣಿನಿಂದ ನೀರು ಸುರಿಯುವುದು ಮತ್ತು ಮೂಗು ಸೋರುವುದು ಇದರ ಲಕ್ಷಣ. ಈ ನೋವು 15 ನಿಮಿಷದಿಂದ 3 ಗಂಟೆಯವರೆಗೆ ಇರಬಹುದು ಮತ್ತು ದಿನಕ್ಕೆ ಹಲವು ಬಾರಿ ಪುನರಾವರ್ತನೆಯಾಗಬಹುದು.
ಚಿಕಿತ್ಸೆ ಮತ್ತು ಪರಿಹಾರಗಳು
ಕ್ಲಸ್ಟರ್ ತಲೆನೋವು
ಸಾಮಾನ್ಯ ನೋವು ನಿವಾರಕಗಳು ಇದಕ್ಕೆ ತಕ್ಷಣ ಸ್ಪಂದಿಸುವುದಿಲ್ಲ. ವೈದ್ಯರು ಆಮ್ಲಜನಕ ಥೆರಪಿ, ಟ್ರಿಪ್ಟಾನ್ಸ್‌ ಮಾತ್ರೆಗಳು ಅಥವಾ ಇಂಜೆಕ್ಷನ್‌ಗಳನ್ನು ನೀಡುತ್ತಾರೆ. ನೋವು ಬಾರದಂತೆ ತಡೆಯಲು ಮುನ್ನೆಚ್ಚರಿಕೆಯ ಔಷಧಗಳನ್ನು ನೀಡಲಾಗುತ್ತದೆ.
ಸೈನಸೈಟಿಸ್
ಬಿಸಿ ನೀರಿನ ಹಾವಿ ತೆಗೆದುಕೊಳ್ಳುವುದು ಮತ್ತು ಮೂಗಿನ ಡ್ರಾಪ್ಸ್ ಬಳಸುವುದು ಉಪಶಮನ ನೀಡುತ್ತದೆ. ವೈದ್ಯರ ಸಲಹೆಯಂತೆ ಆಂಟಿಬಯೋಟಿಕ್ಸ್, ಅಲರ್ಜಿ ನಿರೋಧಕ ಮಾತ್ರೆಗಳು ಹಾಗೂ ನೋವು ನಿವಾರಕಗಳನ್ನು ಬಳಸಬೇಕಾಗುತ್ತದೆ.
ಪ್ರಮುಖ ಸೂಚನೆ
ಸೈನಸೈಟಿಸ್ ಎನ್ನುವುದು ಶೀತ ಅಥವಾ ಅಲರ್ಜಿಯಿಂದ ಬರುವ ಸಾಮಾನ್ಯ ತೊಂದರೆಯಾದರೆ, ಕ್ಲಸ್ಟರ್ ತಲೆನೋವು ನರಮಂಡಲಕ್ಕೆ ಸಂಬಂಧಿಸಿದ ತೀವ್ರ ಸಮಸ್ಯೆಯಾಗಿದೆ. ಕಣ್ಣಿನಲ್ಲಿ ನೀರು ಬಂದು ತಲೆನೋವು ತಾಳಲಾರದಷ್ಟು ಹೆಚ್ಚಾದರೆ ತಕ್ಷಣ ನರರೋಗ ತಜ್ಞರನ್ನು ಭೇಟಿಯಾಗಿ ಸರಿಯಾದ ತಪಾಸಣೆ ಮಾಡಿಸಿಕೊಳ್ಳುವುದು ಜಾಣತನ.
