ಟೀಮ್ ಇಂಡಿಯಾ ವೇಗಿ ಅರ್ಷದೀಪ್ ಸಿಂಗ್ ನಿಶ್ಚಿತಾರ್ಥ: ನಟಿ, ಮಾಡೆಲ್ ಸಮ್ರೀನ್ ಕೌರ್ ಜೊತೆ ಹೊಸ ಜೀವನ ಆರಂಭ

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:‌

ಭಾರತ ಕ್ರಿಕೆಟ್ ತಂಡದ ಯುವ ವೇಗದ ಬೌಲರ್ ಅರ್ಷದೀಪ್ ಸಿಂಗ್ ಅವರು ತಮ್ಮ ಜೀವನದ ಹೊಸ ಇನ್ನಿಂಗ್ಸ್ ಆರಂಭಿಸಲು ಸಜ್ಜಾಗಿದ್ದಾರೆ. ಕಳೆದ ಕೆಲವು ಸಮಯದಿಂದ ಪ್ರೀತಿಯಲ್ಲಿದ್ದ ಅರ್ಷದೀಪ್ ಸಿಂಗ್ ಮತ್ತು ಖ್ಯಾತ ನಟಿ ಹಾಗೂ ಮಾಡೆಲ್ ಸಮ್ರೀನ್ ಕೌರ್ ಬುಧವಾರ ಅಧಿಕೃತವಾಗಿ ನಿಶ್ಚಿತಾರ್ಥ ಮಾಡಿಕೊಂಡಿದ್ದಾರೆ. ಈ ತಾರಾ ಜೋಡಿಯು ತಮ್ಮ ವಿಶೇಷ ಕ್ಷಣದ ಸುಂದರ ಚಿತ್ರಗಳನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಳ್ಳುವ ಮೂಲಕ ಮದುವೆಯ ಬಂಧಕ್ಕೆ ಒಳಗಾಗುತ್ತಿರುವ ಸುದ್ದಿಯನ್ನು ಪ್ರಕಟಿಸಿದೆ.

https://www.instagram.com/p/DfmTr6WmH4Z/?utm_source=ig_web_copy_link&rpxt=MzRlODBiNWFlZA==&srtk=MzRlODBiNWFlZA==

ಗಣ್ಯರಿಂದ ಶುಭಾಶಯ

ಇನ್‌ಸ್ಟಾಗ್ರಾಮ್‌ನಲ್ಲಿ ಜಂಟಿ ಪೋಸ್ಟ್ ಹಂಚಿಕೊಂಡಿರುವ ಈ ಜೋಡಿಯು, ಜೀವನ ನಮಗೆ ನೀಡಿದ ಎಲ್ಲ ಅತ್ಯುತ್ತಮ ಉಡುಗೊರೆಗಳಿಗಿಂತ ನಾವು ಪರಸ್ಪರ ಸಿಕ್ಕಿರುವುದೇ ಅತ್ಯಂತ ಸಂತೋಷದ ವಿಷಯ ಎಂದು ಬರೆದುಕೊಂಡಿದ್ದಾರೆ. ಅರ್ಷದೀಪ್ ಅವರು ಮಂಡಿಯೂರಿ ಪ್ರೀತಿಯ ನಿವೇದನೆ ಮಾಡುತ್ತಿರುವ ಚಿತ್ರ ಹಾಗೂ ಸಮ್ರೀನ್ ಧರಿಸಿರುವ ಆಕರ್ಷಕ ವಜ್ರದ ಉಂಗುರದ ಫೋಟೋಗಳು ಪ್ರಸ್ತುತ ಇಂಟರ್ನೆಟ್‌ನಲ್ಲಿ ಸಖತ್ ವೈರಲ್ ಆಗುತ್ತಿವೆ. ಈ ಹೊಸ ಜೋಡಿಗೆ ಹಾರ್ದಿಕ್ ಪಾಂಡ್ಯ ಸೇರಿದಂತೆ ಸಹ ಆಟಗಾರರು ಹಾಗೂ ಗಣ್ಯರು ಶುಭಾಶಯಗಳ ಮಳೆ ಹರಿಸುತ್ತಿದ್ದಾರೆ.

ಯಾರು ಈ ಸಮ್ರೀನ್ ಕೌರ್

ಜಮ್ಮು ಮತ್ತು ಕಾಶ್ಮೀರ ಮೂಲದ ಸಮ್ರೀನ್ ಕೌರ್ ಅವರು ಮಾಡೆಲಿಂಗ್ ಲೋಕದ ಮೂಲಕ ರಾಷ್ಟ್ರಮಟ್ಟದಲ್ಲಿ ಗುರುತಿಸಿಕೊಂಡಿದ್ದಾರೆ. 2018 ರ ಫೆಮಿನಾ ಮಿಸ್ ಇಂಡಿಯಾ ಸ್ಪರ್ಧೆಯಲ್ಲಿ ಫೈನಲಿಸ್ಟ್ ಆಗಿದ್ದ ಇವರು, ಪ್ರಸಿದ್ಧ ವೆಬ್ ಸೀರೀಸ್ ‘ನೇಲ್ ಪಾಲಿಶ್’ ಮತ್ತು ಬಾಲಿವುಡ್‌ನ ’83’ ಚಿತ್ರದಲ್ಲಿ ನಟಿಸಿದ್ದಾರೆ. ಇದರ ಜೊತೆಗೆ ಜುಬಿನ್ ನೌಟಿಯಾಲ್ ಹಾಗೂ ಬಾದ್‌ಶಾ ಅವರ ಹಲವು ಹಿಟ್ ಮ್ಯೂಸಿಕ್ ವಿಡಿಯೋಗಳಲ್ಲೂ ಅವರು ಕಾಣಿಸಿಕೊಂಡಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ ತಮ್ಮ ವೈಯಕ್ತಿಕ ಜೀವನದ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದ ನೆಗೆಟಿವ್ ಕಮೆಂಟ್‌ಗಳ ವಿರುದ್ಧ ಸಮ್ರೀನ್ ಹಾಗೂ ಅರ್ಷದೀಪ್ ಇಬ್ಬರೂ ತೀವ್ರವಾಗಿ ಪ್ರತಿಕ್ರಿಯಿಸಿದ್ದರು. ಜಗತ್ತು ಏನೇ ಅಂದುಕೊಂಡರೂ ನಮ್ಮ ಪ್ರೀತಿ ಪವಿತ್ರವಾದದ್ದು ಎಂದು ಸಮ್ರೀನ್ ಹೇಳಿದ್ದರೆ, ಸುಖಾಸುಮ್ಮನೆ ಇತರರ ಬದುಕಿನ ಬಗ್ಗೆ ಮಾತನಾಡುವವರು ಸ್ವಲ್ಪ ವಿರಾಮ ತೆಗೆದುಕೊಂಡು ಪ್ರೀತಿಯನ್ನು ಹಂಚುವುದನ್ನು ಕಲಿಯಲಿ ಎಂದು ಅರ್ಷದೀಪ್ ಬೆಂಬಲವಾಗಿ ನಿಂತಿದ್ದರು. ಇದೀಗ ಈ ಜೋಡಿ ನಿಶ್ಚಿತಾರ್ಥದ ಮೂಲಕ ತಮ್ಮ ಪ್ರೀತಿಗೆ ಅಧಿಕೃತ ಮುದ್ರೆ ಒತ್ತಿದೆ.