ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ದೇಶದಲ್ಲೇ ಮೊದಲ ಬೃಹತ್ ಔಷಧ ಪಾರ್ಕ್ (ಡ್ರಗ್ ಪಾರ್ಕ್) ಗುಜರಾತ್ ರಾಜ್ಯದ ಭರೂಚ್‌ ಪ್ರದೇಶದಲ್ಲಿ ನಿರ್ಮಾಣವಾಗಲಿದೆ. ಈ ಕುರಿತು ಅಲ್ಲಿನ ಮುಖ್ಯಮಂತ್ರಿ ಭೂಪೇಂದ್ರ ಪಟೇಲ್‌ ಘೋಷಣೆ ಮಾಡಿದ್ದು ಬರೊಬ್ಬರಿ 2,300 ಕೋಟಿ ರೂ. ವೆಚ್ಚದಲ್ಲಿ ದೇಶದ ಮೊದಲ ಬೃಹತ್ ಡ್ರಗ್ ಪಾರ್ಕ್ ಸ್ಥಾಪಿಸುವುದಾಗಿ ಹೇಳಿದ್ದಾರೆ.
2020 ರ ಜುಲೈ 27 ರಂದು ಭಾರತ ಸರ್ಕಾರದ ರಾಸಾಯನಿಕ ಮತ್ತು ರಸಗೊಬ್ಬರಗಳ ಸಚಿವಾಲಯದ ಫಾರ್ಮಾಸ್ಯುಟಿಕಲ್ಸ್ ಇಲಾಖೆಯು ಬಿಡುಗಡೆ ಮಾಡಿದ “ಬೃಹತ್ ಡ್ರಗ್ ಪಾರ್ಕ್‌ಗಳ ಪ್ರಚಾರ” ಯೋಜನೆಯ ಮಾರ್ಗಸೂಚಿಗಳ ಅಡಿಯಲ್ಲಿ ಗುಜರಾತ್ ಸರ್ಕಾರವು ಬೃಹತ್ ಡ್ರಗ್ಸ್ ಪಾರ್ಕ್ ಅನ್ನು ಸ್ಥಾಪಿಸುತ್ತಿದೆ. ಈ ಪಾರ್ಕ್ ನಲ್ಲಿ ಔಷಧಗಳು, ಔಷಧೀಯ ಪದಾರ್ಥಗಳು ಮತ್ತು ನಿರ್ಣಾಯಕ ಔಷಧೀಯ ಪದಾರ್ಥಗಳನ್ನು ತಯಾರಿಸಲಾಗುತ್ತದೆ ಎಂದು ಗುಜರಾತ್ ಕೈಗಾರಿಕಾ ಅಭಿವೃದ್ಧಿ ನಿಗಮದ (GIDC) ಉಪಾಧ್ಯಕ್ಷ ಮತ್ತು MD ಎಂ ತೆನ್ನರಸನ್ ಹೇಳಿದ್ದಾರೆ.
ಇಡೀ ಯೋಜನೆಗೆ ಅಂದಾಜು ವೆಚ್ಚ ₹ 2,300 ಕೋಟಿ ಆಗಿದ್ದು, ₹ 1,000 ಕೋಟಿ ಆರ್ಥಿಕ ಅನುದಾನದಲ್ಲಿ ಬೃಹತ್ ಔಷಧ ಪಾರ್ಕ್‌ಗಳನ್ನು ಸ್ಥಾಪಿಸುವ ರಾಜ್ಯ ಸರ್ಕಾರದ ಪ್ರಸ್ತಾವನೆಗೆ ಕೇಂದ್ರವು ತಾತ್ವಿಕ ಅನುಮೋದನೆ ನೀಡಿದೆ. ಗುಜರಾತ್ ಹೊರತುಪಡಿಸಿ, ಹಿಮಾಚಲ ಪ್ರದೇಶ ಮತ್ತು ಆಂಧ್ರಪ್ರದೇಶದಲ್ಲಿ ಫಾರ್ಮಾ ಪಾರ್ಕ್‌ಗಳ ಪ್ರಸ್ತಾವನೆಗಳಿಗೆ ಫಾರ್ಮಾಸ್ಯುಟಿಕಲ್ಸ್ ಇಲಾಖೆ ‘ತಾತ್ವಿಕ’ ಅನುಮೋದನೆ ನೀಡಿದೆ ಎಂದು ಮೂಲಗಳು ವರದಿ ಮಾಡಿವೆ.
