ಸೌತೆಕಾಯಿ ಪಡ್ಡು (ಗುಳಿಯಪ್ಪ) ಆರೋಗ್ಯಕರ, ಮೃದುವಾದ ಹಾಗೂ ರುಚಿಕರವಾದ ತಿಂಡಿಯಾಗಿದೆ. ಬೆಳಗಿನ ಉಪಾಹಾರಕ್ಕೂ, ಸಂಜೆ ಟೀ ಟೈಮ್ ಸ್ನ್ಯಾಕ್ಗೂ ಇದು ಬೆಸ್ಟ್. ಕಡಿಮೆ ಸಮಯದಲ್ಲಿ ಸುಲಭವಾಗಿ ತಯಾರಿಸಬಹುದಾದ ಈ ಪಡ್ಡು ಮಕ್ಕಳು ಹಾಗೂ ದೊಡ್ಡವರು ಎಲ್ಲರು ಇಷ್ಟಪಡುತ್ತಾರೆ.
ಬೇಕಾಗುವ ಸಾಮಗ್ರಿಗಳು
ತುರಿದ ಸೌತೆಕಾಯಿ – 1 ಕಪ್
ಅಕ್ಕಿ ಹಿಟ್ಟು – ½ ಕಪ್
ಮೊಸರು – 2 ಚಮಚ
ಈರುಳ್ಳಿ – ½ (ಸಣ್ಣಗೆ ಹೆಚ್ಚಿದದ್ದು)
ಹಸಿಮೆಣಸಿನಕಾಯಿ – 1
ಜೀರಿಗೆ – 1 ಚಮಚ
ಕೊತ್ತಂಬರಿ ಸೊಪ್ಪು – 2 ಚಮಚ
ಉಪ್ಪು – ರುಚಿಗೆ ತಕ್ಕಷ್ಟು
ಎಣ್ಣೆ ಅಥವಾ ತುಪ್ಪ – ಅಗತ್ಯಕ್ಕೆ ತಕ್ಕಷ್ಟು
ಮಾಡುವ ವಿಧಾನ
ಒಂದು ಪಾತ್ರೆಗೆ ತುರಿದ ಸೌತೆಕಾಯಿ, ಅಕ್ಕಿ ಹಿಟ್ಟು, ಮೊಸರು, ಈರುಳ್ಳಿ, ಹಸಿಮೆಣಸಿನಕಾಯಿ, ಜೀರಿಗೆ, ಕೊತ್ತಂಬರಿ ಸೊಪ್ಪು ಮತ್ತು ಉಪ್ಪು ಸೇರಿಸಿ ಚೆನ್ನಾಗಿ ಕಲಸಿ.
ಅಗತ್ಯವಿದ್ದರೆ ಸ್ವಲ್ಪ ನೀರು ಸೇರಿಸಿ, ದಪ್ಪದ ದೋಸೆ ಹಿಟ್ಟಿನ ಹದಕ್ಕೆ ಮಿಶ್ರಣವನ್ನು ತಯಾರಿಸಿಕೊಳ್ಳಿ. ಪಡ್ಡು ಅಥವಾ ಅಪ್ಪೆ ಪಾತ್ರೆಯನ್ನು ಬಿಸಿ ಮಾಡಿ. ಪ್ರತಿಯೊಂದು ಗುಳಿಗೂ ಸ್ವಲ್ಪ ಎಣ್ಣೆ ಅಥವಾ ತುಪ್ಪ ಹಾಕಿ.
ಹಿಟ್ಟನ್ನು ಪ್ರತಿ ಗುಳಿಗೆ ಸುಮಾರು ಮುಕ್ಕಾಲು ಭಾಗದಷ್ಟು ತುಂಬಿ. ಮುಚ್ಚಳ ಹಾಕಿ ಮಧ್ಯಮ ಉರಿಯಲ್ಲಿ 3–4 ನಿಮಿಷ ಬೇಯಿಸಿ.
ಒಂದು ಬದಿ ಗೋಲ್ಡನ್ ಬ್ರೌನ್ ಬಣ್ಣ ಬಂದ ಬಳಿಕ ಪಡ್ಡುಗಳನ್ನು ತಿರುಗಿಸಿ ಮತ್ತೊಂದು ಬದಿಯನ್ನೂ ಚೆನ್ನಾಗಿ ಬೇಯಿಸಿ.
ಬಿಸಿಬಿಸಿಯಾದ ಸೌತೆಕಾಯಿ ಪಡ್ಡನ್ನು ತೆಂಗಿನಕಾಯಿ ಚಟ್ನಿ, ಟೊಮೆಟೊ ಚಟ್ನಿ ಅಥವಾ ಪುದೀನಾ ಚಟ್ನಿಯೊಂದಿಗೆ ಸವಿದರೆ ರುಚಿ ಇನ್ನಷ್ಟು ಹೆಚ್ಚುತ್ತದೆ.
