ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಬಾಲಿವುಡ್ನ ಖ್ಯಾತ ನಟಿ ಪ್ರೀತಿ ಜಿಂಟಾ ಅವರ ಬಹುನಿರೀಕ್ಷಿತ ಕಮ್ಬ್ಯಾಕ್ ಸಿನಿಮಾ ‘ಬಂಟ್ವಾರಾ 1947’ ಇಂದು ದೇಶಾದ್ಯಂತ ಚಿತ್ರಮಂದಿರಗಳಲ್ಲಿ ಅದ್ಧೂರಿಯಾಗಿ ಬಿಡುಗಡೆಯಾಗಿದೆ. ಸಿನಿಮಾ ಬಿಡುಗಡೆಯ ಮುನ್ನಾದಿನದಂದು, ನಟಿ ಪ್ರೀತಿ ಜಿಂಟಾ ಅವರು ಈ ಚಿತ್ರದಲ್ಲಿ ಸನ್ನಿ ಡಿಯೋಲ್ ನಿರ್ವಹಿಸುತ್ತಿರುವ ‘ಸಿಕಂದರ್ ಮಿರ್ಜಾ’ ಪಾತ್ರದ ಎದುರು ತಾವು ನಟಿಸಿರುವ ‘ಹಮೀದಾ’ ಪಾತ್ರದ ಆಳವಾದ ನೆನಪುಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ.
ಭಾವನಾತ್ಮಕ ‘ಮೋನೋಕ್ರೋಮ್’ ಲುಕ್ ವೈರಲ್
ಬಾಲಿವುಡ್ನ ಈ ಸುಂದರ ನಟಿ ಸಿನಿಮಾದ ಲುಕ್ ಟೆಸ್ಟ್ ಸಮಯದ ಒಂದು ಅಪರೂಪದ ಬ್ಲ್ಯಾಕ್ ಅಂಡ್ ವೈಟ್ ಫೋಟೋವನ್ನು ಶೇರ್ ಮಾಡಿದ್ದಾರೆ. ಹೂವಿನ ಬಾರ್ಡರ್ ಇರೋ ಸರಳವಾದ ಸೀರೆಯನ್ನು ಉಟ್ಟು, ಸೀರೆಯ ಸೆರಗನ್ನು ತಲೆಯ ಮೇಲೆ ಹೊದ್ದುಕೊಂಡಿರುವ ಪ್ರೀತಿ ಜಿಂಟಾ ಅವರ ನೋಟ ಅತ್ಯಂತ ಆಕರ್ಷಕವಾಗಿ ಮೂಡಿಬಂದಿದೆ. ಅವರ ಗುಂಗುರು ಕೂದಲು ಮತ್ತು ಕೈಯಲ್ಲಿನ ಚಿನ್ನದ ಬಳೆಗಳು ಅವರ ಈ ಸರಳ ಹಾಗೂ ಸುಂದರ ನೋಟಕ್ಕೆ ಮತ್ತಷ್ಟು ಕಳೆ ನೀಡಿವೆ.
ಎಲ್ಲವೂ ಎಲ್ಲಿಂದ ಆರಂಭವಾಯಿತೋ ಅಲ್ಲಿಗೇ ಮರಳಲು ಬಯಸಿದ್ದೆ
ಫೋಟೋ ಜೊತೆಗೆ ಬರೆದುಕೊಂಡಿರುವ ಪ್ರೀತಿ ಜಿಂಟಾ, ಬಂಟ್ವಾರಾ 1947 ಚಿತ್ರದ ಬಿಡುಗಡೆಯ ಮುನ್ನಾದಿನದಂದು, ಎಲ್ಲವೂ ಎಲ್ಲಿಂದ ಆರಂಭವಾಯಿತೋ ಅಲ್ಲಿಗೇ ನಾನು ಮತ್ತೆ ಹಿಂತಿರುಗಲು ಬಯಸಿದ್ದೆ. ಈ ಫೋಟೋವನ್ನು ಲುಕ್ ಟೆಸ್ಟ್ ಸಮಯದಲ್ಲಿ ತೆಗೆದುಕೊಳ್ಳಲಾಗಿತ್ತು. ಅಲ್ಲಿ ನಾನು ಹಮೀದಾ ಪಾತ್ರದ ಮೊದಲ ನೋಟವನ್ನು ಕಣ್ಣಾರೆ ಕಂಡು ಅನುಭವಿಸಿದೆ ಎಂದು ಭಾವುಕರಾಗಿದ್ದಾರೆ.
ತಮ್ಮ ಪಾತ್ರದ ಬಗ್ಗೆ ಬೆಳಕು ಚೆಲ್ಲಿದ ಅವರು, ಪ್ರಸಿದ್ಧ ಸೂಫಿ ಕವಿ ರೂಮಿ ಅವರ ಸಾಲುಗಳನ್ನು ಉಲ್ಲೇಖಿಸಿದ್ದಾರೆ: “ನಿಮ್ಮ ಸುತ್ತಲಿನ ಪ್ರತಿಯೊಂದು ವಿಷಯವೂ ಕತ್ತಲಾಗಿ ಕಾಣಿಸಿದರೆ, ಮತ್ತೊಮ್ಮೆ ಸೂಕ್ಷ್ಮವಾಗಿ ಗಮನಿಸಿ, ಬಹುಶಃ ನೀವೇ ಆ ಕತ್ತಲನ್ನು ಓಡಿಸುವ ಬೆಳಕಾಗಿರಬಹುದು.” ಕೊನೆಯಲ್ಲಿ, ʼಆಗಸ್ಟ್ 14 ರಂದು ಚಿತ್ರಮಂದಿರಗಳಲ್ಲಿ ಬಂಟ್ವಾರಾ 1947 ಚಿತ್ರಕ್ಕಾಗಿ ನಿಮ್ಮನ್ನು ಭೇಟಿಯಾಗುತ್ತೇನೆ ಟಿಂಗ್ʼ ಎಂದು ಬರೆದಿದ್ದಾರೆ.
ಎಂಟು ವರ್ಷಗಳ ನಂತರ ಬೆಳ್ಳಿ ತೆರೆಗೆ ಮರಳಿದ ಡಿಂಪಲ್ ಗರ್ಲ್
ಆಗಸ್ಟ್ 14 ರಂದು ಥಿಯೇಟರ್ಗಳಲ್ಲಿ ಬಿಡುಗಡೆಯಾಗಿರುವ ‘ಬಂಟ್ವಾರಾ 1947’ ಚಿತ್ರದ ಮೂಲಕ ಪ್ರೀತಿ ಜಿಂಟಾ ಅವರು ಬರೋಬ್ಬರಿ ಎಂಟು ವರ್ಷಗಳ ಸುದೀರ್ಘ ಬಿಡುಗಡೆಯ ನಂತರ ಮತ್ತೆ ಬೆಳ್ಳಿ ತೆರೆಗೆ ಮರಳುತ್ತಿದ್ದಾರೆ. 2018 ರಲ್ಲಿ ಸನ್ನಿ ಡಿಯೋಲ್ ಅವರ ಜೊತೆಯೇ ನಟಿಸಿದ್ದ ‘ಭೈಯ್ಯಾಜಿ ಸೂಪರ್ಹಿಟ್’ ಚಿತ್ರದ ನಂತರ ಪ್ರೀತಿ ಜಿಂಟಾ ಒಪ್ಪಿಕೊಂಡ ಮೊದಲ ದೊಡ್ಡ ಪ್ರಾಜೆಕ್ಟ್ ಇದಾಗಿದೆ.
ಇದನ್ನೂ ಓದಿ:
ಖ್ಯಾತ ನಾಟಕ ಆಧಾರಿತ ಸಿನಿಮಾ, ಆಮಿರ್ ಖಾನ್ ನಿರ್ಮಾಣ
ಖ್ಯಾತ ನಿರ್ದೇಶಕ ರಾಜ್ಕುಮಾರ್ ಸಂತೋಷಿ ಅವರ ನಿರ್ದೇಶನದಲ್ಲಿ ಮೂಡಿಬಂದಿರುವ ಈ ಸಿನಿಮಾವು, ಅಸ್ಗರ್ ವಜಾಹತ್ ಅವರ ಪ್ರಸಿದ್ಧ ನಾಟಕ ‘ಜಿಸ್ ಲಾಹೋರ್ ನೈ ವೇಖ್ಯಾ, ಓ ಜಮ್ಯಾ ಇ ನೈ’ ಎಂಬುದನ್ನು ಆಧರಿಸಿ ಸಿದ್ಧಪಡಿಸಲಾಗಿದೆ. 1947 ರ ಭಾರತ-ಪಾಕಿಸ್ತಾನ ವಿಭಜನೆ ಮತ್ತು ಪಂಜಾಬ್ ವಿಭಜನೆಯ ಕರಾಳ ದಿನಗಳ ಹಿನ್ನೆಲೆಯಲ್ಲಿ ಈ ಚಿತ್ರ ಮೂಡಿಬಂದಿದೆ. ದೇಶದ ವಿಭಜನೆಯ ನಡುವೆ ಸಾಮಾನ್ಯ ಜನರ ಜೀವನದಲ್ಲಾದ ನೋವು ಮತ್ತು ತಲ್ಲಣಗಳ ಕಥೆಯನ್ನು ಇದು ಕಣ್ಣಿಗೆ ಕಟ್ಟುವಂತೆ ವಿವರಿಸುತ್ತದೆ.
ಈ ಚಿತ್ರದಲ್ಲಿ ಶಬಾನಾ ಅಜ್ಮಿ, ಕನಿಕಾ ಕಪೂರ್, ಕರಣ್ ಡಿಯೋಲ್, ಅಲಿ ಫಜಲ್, ಖುಷಿ ಹಜಾರೆ ಮತ್ತು ಅಭಿಮನ್ಯು ಸಿಂಗ್ ಮುಂತಾದ ದೊಡ್ಡ ತಾರಾಗಣವಿದೆ. ವಿಶೇಷವೆಂದರೆ, ಈ ಚಿತ್ರವನ್ನು ‘ಆಮಿರ್ ಖಾನ್ ಪ್ರೊಡಕ್ಷನ್ಸ್’ ಬ್ಯಾನರ್ ಅಡಿಯಲ್ಲಿ ಬಾಲಿವುಡ್ ಮಿಸ್ಟರ್ ಪರ್ಫೆಕ್ಟ್ ಆಮಿರ್ ಖಾನ್ ನಿರ್ಮಿಸಿದ್ದಾರೆ.
