ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಜೋಶಿಮಠ ಆಯ್ತು ಇದೀಗ ಶಂಕರಾಚಾರ್ಯ ಮಠದಲ್ಲೂ ಬಿರುಕು ಕಾಣಿಸಿಕೊಂಡಿದ್ದು, ಅಲ್ಲಿನ ಜನ ಕೂಡ ಭಯಭೀತರಾಗಿದ್ದಾರೆ. ಹಿಂದೂ ಮಠಗಳಲ್ಲಿ ಒಂದಾದ ಜ್ಯೋತಿರ್ಮಠದ ಶಂಕರಾಚಾರ್ಯ ಮಠವು ಕಳೆದ 15 ದಿನಗಳಿಂದ ಹಲವೆಡೆ ಬಿರುಕು ಬಿಟ್ಟಿದ್ದು, ಎರಡೂ ಮಠಗಳ ಪರಿಸ್ಥಿತಿ ಕಠೋರವಾಗಿದೆ.
ಕಳೆದ 15 ದಿನಗಳಿಂದ ಈ ಬಿರುಕುಗಳು ಹೆಚ್ಚಾಗಿವೆ ಎಂದು ಜ್ಯೋತಿರ್ಮಠದ ಆಡಳಿತ ಮಂಡಳಿ ತಿಳಿಸಿದೆ. ‘ಅಭಿವೃದ್ಧಿ’ಯೇ ದುರಂತಕ್ಕೆ ಕಾರಣ ಎಂದು ಮಠದ ಮುಖ್ಯಸ್ಥ ಸ್ವಾಮಿ ವಿಶ್ವಪ್ರಿಯಾನಂದ ಹೇಳಿದ್ದಾರೆ.
ಜಲವಿದ್ಯುತ್ ಯೋಜನೆಗಳಿಂದ ನಾಶಕ್ಕೆ ಕಾರಣವಾಗಿದೆ, ಸುರಂಗಗಳು ನಮ್ಮ ಊರಿನ ಮೇಲೆ ಪರಿಣಾಮ ಬೀರಿವೆ. 15 ದಿನಗಳ ಹಿಂದೆ ಯಾವುದೇ ಬಿರುಕುಗಳು ಇರಲಿಲ್ಲ, ಆದರೆ ಇದೀಗ ಮಠದಲ್ಲಿ ಬಿರುಕುಗಳು ನಿರಂತರವಾಗಿ ಹೆಚ್ಚಾಗುತ್ತಿವೆ ಎಂದು ವಿಶ್ವಪ್ರಿಯಾನಂದ ಸ್ವಾಮೀಜಿ ಹೇಳಿದ್ದಾರೆ.
ಜೋಶಿಮಠ ಪಟ್ಟಣವನ್ನು ಜ್ಯೋತಿರ್ಮಠ ಎಂದೂ ಕರೆಯುತ್ತಾರೆ, ಇದು ಭಗವಾನ್ ಬದರಿನಾಥನ ಚಳಿಗಾಲದ ಆಸನವಾಗಿದೆ, ದೇವರ ವಿಗ್ರಹವನ್ನು ಮುಖ್ಯ ಬದರಿನಾಥ ದೇವಾಲಯದಿಂದ ಜೋಶಿಮಠದ ವಾಸುದೇವ ದೇವಾಲಯಕ್ಕೆ ಪ್ರತಿ ಚಳಿಗಾಲದಲ್ಲಿ ತರಲಾಗುತ್ತದೆ. ಜೋಶಿಮಠದ ಪವಿತ್ರ ಪಟ್ಟಣವನ್ನು ಹಿಂದೂಗಳು ದೇಶದ ಪ್ರಮುಖ ಯಾತ್ರಾ ಕೇಂದ್ರವೆಂದು ಪೂಜಿಸುತ್ತಾರೆ.
ಮನೆಗಳಲ್ಲಿ ಬಿರುಕು ಕಾಣಿಸಿಕೊಂಡ ನಂತರ, ಒಟ್ಟು 66 ಕುಟುಂಬಗಳು ಜೋಶಿಮಠದಿಂದ ವಲಸೆ ಹೋಗಿದ್ದಾರೆ ಎಂದು ವರದಿಯಾಗಿದೆ.
ಪ್ರಕೃತಿ ವಿಕೋಪದಿಂದ ಸಂತ್ರಸ್ತರಾದ ಕುಟುಂಬಗಳಿಗೆ ಸುರಕ್ಷಿತ ಪರಿಹಾರ ಶಿಬಿರಗಳಲ್ಲಿ ಇರಲು ಜಿಲ್ಲಾಡಳಿತ ವ್ಯವಸ್ಥೆ ಮಾಡಿದೆ ಎಂದು ಆಡಳಿತ ಭಾನುವಾರ ತಿಳಿಸಿದೆ.
