ಹೊಸದಿಗಂತ ಡಿಜಿಟಲ್ ಡೆಸ್ಕ್:
ವರ್ಷಾಂತ್ಯದ ವೇಳೆಗೆ ಬಾಂಗ್ಲಾದೇಶಕ್ಕೆ ಮರಳುವ ಇಂಗಿತವನ್ನು ಮಾಜಿ ಪ್ರಧಾನಿ ಶೇಖ್ ಹಸೀನಾ ವ್ಯಕ್ತಪಡಿಸಿದ್ದಾರೆ. ಈ ಹೇಳಿಕೆಯನ್ನು ಬಾಂಗ್ಲಾದೇಶದ ಪ್ರಸ್ತುತ ಉಸ್ತುವಾರಿ ಸರ್ಕಾರ ಮುಕ್ತವಾಗಿ ಸ್ವಾಗತಿಸಿದೆ. ಹಸೀನಾ ದೇಶಕ್ಕೆ ಮರಳಿ ಕಾನೂನು ಪ್ರಕ್ರಿಯೆಗಳನ್ನು ಎದುರಿಸಲಿ ಎಂದು ಪ್ರಧಾನಿ ತಾರಿಕ್ ರೆಹಮಾನ್ ಅವರ ಮಾಹಿತಿ ಮತ್ತು ಕಾರ್ಯತಂತ್ರದ ಸಲಹೆಗಾರರಾದ ಜಹೀದ್ ಉರ್ ರೆಹಮಾನ್ ತಿಳಿಸಿದ್ದಾರೆ.
ವಿಶ್ವದ ಅತ್ಯುತ್ತಮ ವಕೀಲರನ್ನು ಕರೆತರಲಿ: ಸರ್ಕಾರದ ಸವಾಲು
ಮಾಧ್ಯಮಗೋಷ್ಟಿಯಲ್ಲಿ ಮಾತನಾಡಿದ ಜಹೀದ್ ಉರ್ ರೆಹಮಾನ್, “ಮಾಜಿ ಪ್ರಧಾನಿ ಹಸೀನಾ ಅವರು ಕಾನೂನಿನ ಮುಂದೆ ನಿಲ್ಲಬೇಕು. ಅವರು ಜಗತ್ತಿನ ಅತ್ಯಂತ ಪ್ರಭಾವಶಾಲಿ ಮತ್ತು ಶ್ರೇಷ್ಠ ವಕೀಲರನ್ನೇ ತಮ್ಮ ರಕ್ಷಣೆಗಾಗಿ ಕರೆತರಲಿ, ನಮಗೆ ಅಭ್ಯಂತರವಿಲ್ಲ. ದೇಶದ ಜನರಿಗೆ ನ್ಯಾಯ ಸಿಗಬೇಕಿರುವುದು ಮುಖ್ಯ,” ಎಂದು ನೇರ ಸವಾಲು ಹಾಕಿದ್ದಾರೆ.
ಮರಣದಂಡನೆ ಜಾರಿಗೆ ಸಾರ್ವಜನಿಕರ ಒತ್ತಾಯ
ಕಳೆದ 2024ರ ಆಗಸ್ಟ್ 5 ರಂದು ನಡೆದ ಭೀಕರ ವಿದ್ಯಾರ್ಥಿ ದಂಗೆ ಮತ್ತು ಹಿಂಸಾತ್ಮಕ ಪ್ರತಿಭಟನೆಗಳ ಕಾರಣದಿಂದಾಗಿ 78 ವರ್ಷದ ಶೇಖ್ ಹಸೀನಾ ತಮ್ಮ ಅಧಿಕಾರವನ್ನು ಕಳೆದುಕೊಂಡು ಭಾರತಕ್ಕೆ ಪಲಾಯನ ಮಾಡಿದ್ದರು. ಅವರು ಮಾಡಿರುವ ಅಪರಾಧಗಳಿಗೆ ಮತ್ತು ಮಾನವ ಹಕ್ಕುಗಳ ಉಲ್ಲಂಘನೆಗೆ ಮರಣದಂಡನೆ ಶಿಕ್ಷೆಯಾಗಬೇಕು ಎನ್ನುವುದು ಬಾಂಗ್ಲಾ ನಾಗರಿಕರ ತೀವ್ರ ಆಶಯವಾಗಿದೆ ಎಂದು ಜಹೀದ್ ಸ್ಪಷ್ಟಪಡಿಸಿದ್ದಾರೆ. ಪ್ರಸ್ತುತ ಭಾರತದಲ್ಲಿ ಆಶ್ರಯ ಪಡೆದಿರುವ ಹಸೀನಾ ಅವರ ಕಾನೂನು ಹೋರಾಟ ಮುಂಬರುವ ದಿನಗಳಲ್ಲಿ ತೀವ್ರ ಕುತೂಹಲ ಕೆರಳಿಸಿದೆ.
