ಗ್ರಾಹಕರ ದಾರಿ ತಪ್ಪಿಸುವ ಜಾಹೀರಾತು: ನೆಸ್ಲೆ, ಜೈಡಸ್ ಕಂಪನಿಗಳಿಗೆ ಬಿಗ್ ಶಾಕ್

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:‌

ಖಾದ್ಯ ಪದಾರ್ಥಗಳ ಜಾಹೀರಾತು ಮತ್ತು ಪ್ಯಾಕೇಜಿಂಗ್‌ನಲ್ಲಿ ಗ್ರಾಹಕರನ್ನು ಹಾದಿ ತಪ್ಪಿಸುವಂತಹ ಹೇಳಿಕೆಗಳನ್ನುನೀಡಿದ ಹಿನ್ನೆಲೆಯಲ್ಲಿ ದೈತ್ಯ ಕಂಪನಿಗಳಾದ ನೆಸ್ಲೆ ಇಂಡಿಯಾ (Nestle India) ಮತ್ತು ಜೈಡಸ್ ವೆಲ್ನೆಸ್ (Zydus Wellness) ಸಂಸ್ಥೆಗಳಿಗೆ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ ನೋಟಿಸ್ ಜಾರಿ ಮಾಡಿದೆ.

 ಮಕ್ಕಳ ಪೌಷ್ಟಿಕಾಂಶದ ಉತ್ಪನ್ನಗಳು ಮತ್ತು ಜನಪ್ರಿಯ ಹಾಲಿನ ಪಾನೀಯ ‘ಕಾಂಪ್ಲಾನ್’ (Complan) ಸೇರಿದಂತೆ ಕೆಲವು ಪ್ರಮುಖ ಬ್ರ್ಯಾಂಡ್‌ಗಳ ಜಾಹೀರಾತುಗಳ ಬಗ್ಗೆ ಪ್ರಾಧಿಕಾರವು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ.

ನೆಸ್ಲೆ ಕಂಪನಿಯ ಶಿಶು ಆಹಾರಗಳ ಮೇಲೆ ನಿಗಾ

ನೆಸ್ಲೆ ಕಂಪನಿಯ ಮಕ್ಕಳ ಹಾಲಿನ ಪುಡಿಗಳಾದ ‘ನ್ಯಾನ್ ಎಕ್ಸೆಲ್ಲಾ ಪ್ರೊ ಸ್ಟೇಜ್ 1’ ಮತ್ತು ‘ಲ್ಯಾಕ್ಟೋಜನ್ ಪ್ರೊ 1’ ಉತ್ಪನ್ನಗಳ ಪ್ಯಾಕಿಂಗ್ ಮೇಲಿನ ಹೇಳಿಕೆಗಳನ್ನು ಎಫ್‌ಎಸ್‌ಎಸ್‌ಎಐ ಪ್ರಶ್ನಿಸಿದೆ. “5 ಹೆಚ್‌ಎಂಒಗಳು (ಹ್ಯೂಮನ್ ಮಿಲ್ಕ್ ಆಲಿಗೋಸ್ಯಾಕರೈಡ್ಸ್) ಸಾಮಾನ್ಯ ರೋಗನಿರೋಧಕ ವ್ಯವಸ್ಥೆಯನ್ನು ಬೆಂಬಲಿಸಲು ಸಹಾಯ ಮಾಡುತ್ತದೆ” ಎಂಬ ಹೇಳಿಕೆಯು ನಿಯಮಾವಳಿಗಳ ಅಡಿಯಲ್ಲಿ ಅನುಮತಿಸಲಾಗದ ಶಾರೀರಿಕ ಪ್ರಯೋಜನವನ್ನು ಬಿಂಬಿಸುತ್ತದೆ ಎಂದು ಪ್ರಾಧಿಕಾರವು ಆಕ್ಷೇಪಿಸಿದೆ.

ವೈಜ್ಞಾನಿಕ ಪುರಾವೆಗೆ ಬೇಡಿಕೆ

ಹಾಲಿನ ಪ್ರೊಟೀನ್‌ನ ಅಂಶವಾಗಿರುವ ‘ವೇ ಪ್ರೊಟೀನ್’ ಜೀರ್ಣಿಸಿಕೊಳ್ಳಲು ತುಂಬಾ ಸುಲಭ ಎಂಬ ನೆಸ್ಲೆ ಕಂಪನಿಯ ವಾದಕ್ಕೆ ಸೂಕ್ತ ವೈಜ್ಞಾನಿಕ ಪುರಾವೆಗಳನ್ನು ಒದಗಿಸುವಂತೆ ನಿಯಂತ್ರಕ ಸಂಸ್ಥೆಯು ಸೂಚಿಸಿದೆ.

‘ಕಾಂಪ್ಲಾನ್’ ಜಾಹೀರಾತು ದಾರಿ ತಪ್ಪಿಸುವಂತಿದೆಯೇ?

ಜೈಡಸ್ ವೆಲ್ನೆಸ್ ಕಂಪನಿಯ ಜನಪ್ರಿಯ ಪಾನೀಯ ‘ಕಾಂಪ್ಲಾನ್’, “2 ಪಟ್ಟು ವೇಗವಾಗಿ ಮಕ್ಕಳ ಬೆಳವಣಿಗೆಗೆ ಸಹಕಾರಿ” ಎಂದು ಜಾಹೀರಾತು ನೀಡುತ್ತಿರುವುದನ್ನು ಎಫ್‌ಎಸ್‌ಎಸ್‌ಎಐ ಪ್ರಶ್ನಿಸಿದೆ. ಈ ಕ್ಲೈಮ್ ಗ್ರಾಹಕರನ್ನು ಹಾದಿ ತಪ್ಪಿಸುವಂತಿದೆ ಎಂದು ಹೇಳಿರುವ ಪ್ರಾಧಿಕಾರವು, ಇದಕ್ಕೆ ಕಾರಣವಾದ ವಿವರಣೆಗಳು, ದಾಖಲೆಗಳು ಮತ್ತು ಬೆಂಬಲಿತ ವೈಜ್ಞಾನಿಕ ಸಾಕ್ಷ್ಯಗಳನ್ನು ನೀಡುವಂತೆ ಕಂಪನಿಗೆ ಕಾರಣ ಕೇಳಿ ನೋಟಿಸ್ ನೀಡಿದೆ.

ಇನ್‌ಫ್ಲುಯೆನ್ಸರ್‌ಗೂ ಶಾಕ್

ಇನ್‌ಸ್ಟಾಗ್ರಾಮ್‌ನಲ್ಲಿ ತಾಯಿ ಹಾಲಿಗೆ ಪರ್ಯಾಯವಾಗಿ ಬಳಸುವ ಇನ್ಫೆಂಟ್ ಫಾರ್ಮುಲಾವನ್ನು (ಶಿಶು ಆಹಾರ) ಪ್ರಚಾರ ಮಾಡಿದ ಆರೋಪದ ಮೇಲೆ ಸಾಮಾಜಿಕ ಜಾಲತಾಣದ ಇನ್‌ಫ್ಲುಯೆನ್ಸರ್ ಒಬ್ಬರಿಗೂ ಪ್ರಾಧಿಕಾರವು ನೋಟಿಸ್ ಜಾರಿ ಮಾಡಿದೆ.

ಕಾನೂನು ಕ್ರಮಕ್ಕೆ ತಜ್ಞರ ಒತ್ತಾಯ

ಬ್ರೆಸ್ಟ್‌ಫೀಡಿಂಗ್ ಪ್ರಮೋಷನ್ ನೆಟ್‌ವರ್ಕ್ ಆಫ್ ಇಂಡಿಯಾ (BPNI) ಸ್ಥಾಪಕ ಡಾ. ಅರುಣ್ ಗುಪ್ತಾ ಅವರು ಪ್ರಾಧಿಕಾರದ ಈ ಕ್ರಮವನ್ನು ಸ್ವಾಗತಿಸಿದ್ದಾರೆ. ಭಾರತದ ಐಎಂಎಸ್ ಕಾಯ್ದೆ-1992 ಪ್ರಕಾರ ತಾಯಿಯ ಎದೆಹಾಲು ಉಣಿಸುವುದನ್ನು ರಕ್ಷಿಸಲು ಇಂತಹ ಕೃತಕ ಹಾಲಿನ ಪುಡಿಗಳ ಪ್ರಚಾರವನ್ನು ಕಟ್ಟುನಿಟ್ಟಾಗಿ ತಡೆಯಬೇಕಾಗಿದೆ. ಡಿಜಿಟಲ್ ಯುಗದಲ್ಲೂ ಈ ಕಾನೂನು ಪರಿಣಾಮಕಾರಿಯಾಗಿ ಜಾರಿಯಾಗಬೇಕಿದ್ದು, ಉಲ್ಲಂಘಿಸುವ ಕಂಪನಿಗಳ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.

ಇದನ್ನೂ ಓದಿ:

ಮಕ್ಕಳ ಆರೋಗ್ಯಕ್ಕೆ ಸಂಬಂಧಿಸಿದ ಜೈವಿಕ ಹಾಗೂ ವೈಜ್ಞಾನಿಕ ವಿಷಯಗಳನ್ನು ಕಂಪನಿಗಳು ತಮ್ಮ ಲಾಭಕ್ಕಾಗಿ ಅತಿಯಾಗಿ ಬಿಂಬಿಸುವುದನ್ನು ತಡೆಯಲು ಆಹಾರ ಸುರಕ್ಷತಾ ಇಲಾಖೆಯು ಇತ್ತೀಚಿನ ದಿನಗಳಲ್ಲಿ ತೀವ್ರ ನಿಗಾ ವಹಿಸಿದೆ.