ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಹಲವು ಸವಾಲುಗಳ ನಡುವೆಯೂ ನಿಗದಿತ ಸಮಯಕ್ಕೆ ಕ್ಷಣಗಣನೆ ಪೂರ್ಣಗೊಳಿಸಿದ ನಾಸಾ ಮತ್ತು ಸ್ಪೇಸ್‌ಎಕ್ಸ್, ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದತ್ತ ಹೊಸ ತಂಡವನ್ನು ಯಶಸ್ವಿಯಾಗಿ ಕಳುಹಿಸಿವೆ. ಫ್ಲೋರಿಡಾದ ಕೇಪ್ ಕ್ಯಾನವರಲ್ ಸ್ಪೇಸ್ ಫೋರ್ಸ್ ಸ್ಟೇಷನ್‌ನ ಸ್ಪೇಸ್ ಲಾಂಚ್ ಕಾಂಪ್ಲೆಕ್ಸ್-40ರಿಂದ ಗುರುವಾರ ರಾತ್ರಿ ಫಾಲ್ಕನ್-9 ರಾಕೆಟ್ ಉಡಾವಣೆಯಾಗಿದ್ದು, ‘ಗ್ರೇಸ್’ ಹೆಸರಿನ ಡ್ರ್ಯಾಗನ್ ಬಾಹ್ಯಾಕಾಶ ನೌಕೆಯಲ್ಲಿ ನಾಲ್ವರು ಗಗನಯಾತ್ರಿಗಳು ಪ್ರಯಾಣ ಆರಂಭಿಸಿದ್ದಾರೆ.
ನಾಸಾದ ಜೆಸಿಕಾ ವಾಟ್ಕಿನ್ಸ್ ಮತ್ತು ಲ್ಯೂಕ್ ಡೆಲೇನಿ, ಕೆನಡಾ ಬಾಹ್ಯಾಕಾಶ ಸಂಸ್ಥೆಯ ಜೋಶುವಾ ಕುಟ್ರಿಕ್ ಹಾಗೂ ರಷ್ಯಾದ ರೋಸ್ಕೋಸ್ಮೋಸ್‌ನ ಸೆರ್ಗೆಯ್ ಟೆಟೆರ್ಯಾಟ್ನಿಕೋವ್ ತಂಡದಲ್ಲಿದ್ದಾರೆ. ವಾಟ್ಕಿನ್ಸ್ ತಂಡದ ಕಮಾಂಡರ್ ಆಗಿದ್ದು, ಡೆಲೇನಿ ಪೈಲಟ್ ಆಗಿ ಕಾರ್ಯನಿರ್ವಹಿಸಲಿದ್ದಾರೆ. ಕುಟ್ರಿಕ್ ಮತ್ತು ಟೆಟೆರ್ಯಾಟ್ನಿಕೋವ್ ಮಿಷನ್ ಸ್ಪೆಷಲಿಸ್ಟ್‌ಗಳಾಗಿ ಕಾರ್ಯನಿರ್ವಹಿಸಲಿದ್ದಾರೆ.
ಇದನ್ನೂ ಓದಿ:
Crew-13, ಸ್ಪೇಸ್‌ಎಕ್ಸ್‌ನ ಮಾನವ ಬಾಹ್ಯಾಕಾಶ ಸಾರಿಗೆ ವ್ಯವಸ್ಥೆಯ 13ನೇ ಸಿಬ್ಬಂದಿ ಬದಲಾವಣೆ ಮಿಷನ್ ಆಗಿದೆ. ನಾಸಾದ ಕಮರ್ಷಿಯಲ್ ಕ್ರೂ ಕಾರ್ಯಕ್ರಮದಡಿ ISSಗೆ ನಡೆಯುತ್ತಿರುವ ಸಿಬ್ಬಂದಿ ಸಾಗಣೆ ಕಾರ್ಯಾಚರಣೆಗಳಲ್ಲಿಯೂ ಇದು ಪ್ರಮುಖ ಹಂತವಾಗಿದೆ.
ಉಡಾವಣೆಯ ಬಳಿಕ ಡ್ರ್ಯಾಗನ್ ನೌಕೆ ISSನ ಹಾರ್ಮನಿ ಮಾಡ್ಯೂಲ್‌ನ ಮುಂಭಾಗದ ಡಾಕಿಂಗ್ ಪೋರ್ಟ್‌ಗೆ ಸ್ವಯಂಚಾಲಿತವಾಗಿ ಸಂಪರ್ಕಗೊಳ್ಳಲಿದೆ. ಸುಮಾರು 7 ಗಂಟೆ 50 ನಿಮಿಷಗಳ ಈ ಪ್ರಯಾಣ ಅಮೆರಿಕದ ಬಾಹ್ಯಾಕಾಶ ನೌಕೆಯ ಅತ್ಯಂತ ವೇಗದ ISS ಡಾಕಿಂಗ್‌ಗಳಲ್ಲಿ ಒಂದಾಗಲಿದೆ.
