ಸಿನಿಮಾ ಪ್ರೇಮಿಗಳ ಹೃದಯ ಗೆದ್ದ ‘ಸೀನ್’: ಅಭಿಮಾನಿಗಳಿಗೆ ಥ್ಯಾಂಕ್ಸ್ ಹೇಳಿದ ಸೂರ್ಯ-ಜ್ಯೋತಿಕಾ

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ತಮಿಳು ಚಿತ್ರರಂಗದ ಸ್ಟಾರ್ ನಟ ಸೂರ್ಯ ಅವರಿಗೆ 2026ರ ದೀಪಾವಳಿ ಹಬ್ಬ ನಿಜಕ್ಕೂ ಅತ್ಯಂತ ವಿಶೇಷ ಹಾಗೂ ನೆನಪಿನಲ್ಲಿ ಉಳಿಯುವಂತಹ ಸಕ್ಸಸ್ ತಂದುಕೊಟ್ಟಿದೆ. ಅವರ ಬಹುನಿರೀಕ್ಷಿತ ‘ಸೀನ್’ ಸಿನಿಮಾ ಚಿತ್ರಮಂದಿರಗಳಲ್ಲಿ ಅದ್ಧೂರಿಯಾಗಿ ಬಿಡುಗಡೆಯಾಗಿದ್ದು, ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಈ ವರ್ಷ ಈಗಾಗಲೇ ‘ಕರುಪ್ಪು’ ಮತ್ತು ‘ವಿಶ್ವನಾಥ್ & ಸನ್ಸ್’ ನಂತಹ ಸೂಪರ್ ಹಿಟ್ ಚಿತ್ರಗಳನ್ನು ನೀಡಿದ್ದ ಸೂರ್ಯ, ಈಗ ‘ಸೀನ್’ ಮೂಲಕ ಸತತ ಮೂರನೇ ಹಿಟ್ ನೀಡಿ ತಮ್ಮ ಹ್ಯಾಟ್ರಿಕ್ ಗೆಲುವನ್ನು ಸಂಭ್ರಮಿಸುತ್ತಿದ್ದಾರೆ.

‘ಸೀನ್’ ಸಿನಿಮಾವು ಕ್ರೈಮ್, ಕಾಮಿಡಿ ಹಾಗೂ ಥ್ರಿಲ್ಲರ್ ಕಥಾಹಂದರವನ್ನು ಹೊಂದಿದ್ದು, ಬಿಡುಗಡೆಯಾದ ಮೊದಲ ದಿನದಿಂದಲೇ ಪ್ರೇಕ್ಷಕರಿಂದ ಅದ್ಭುತ ಪ್ರತಿಕ್ರಿಯೆ ಪಡೆದುಕೊಂಡಿದೆ. ಸೂರ್ಯ ಅವರ ಡಿಫರೆಂಟ್ ನಟನೆ ಹಾಗೂ ಚಿತ್ರದ ರಂಜನೀಯ ಕಥೆ ಪ್ರೇಕ್ಷಕರನ್ನು ಚಿತ್ರಮಂದಿರಗಳತ್ತ ಸೆಳೆಯುತ್ತಿದೆ.

https://www.instagram.com/p/Dfe5wkiH1ew/?utm_source=ig_web_button_share_sheet

ಈ ದೊಡ್ಡ ಗೆಲುವಿನ ಸಂಭ್ರಮದಲ್ಲಿ ಸೂರ್ಯ ಮತ್ತು ಅವರ ಧರ್ಮಪತ್ನಿ ಜ್ಯೋತಿಕಾ ಸೋಶಿಯಲ್ ಮೀಡಿಯಾದಲ್ಲಿ ಜಂಟಿ ಪೋಸ್ಟ್ ಹಂಚಿಕೊಳ್ಳುವ ಮೂಲಕ ಅಭಿಮಾನಿಗಳಿಗೆ ಧನ್ಯವಾದ ತಿಳಿಸಿದ್ದಾರೆ. ಹಬ್ಬದ ಉಡುಪಿನಲ್ಲಿ ಮಿಂಚಿದ ಈ ಜೋಡಿ, ಪ್ರೇಕ್ಷಕರ ಪ್ರೀತಿಗೆ ಮಣಿದಿದ್ದಾರೆ. ಜ್ಯೋತಿಕಾ ಅವರು ಸುಂದರ ಹಸಿರು ಸೀರೆಯಲ್ಲಿ ಕಂಗೊಳಿಸಿದರೆ, ಸೂರ್ಯ ಅವರು ಸಾಂಪ್ರದಾಯಿಕ ಪಿಂಕ್ ಶರ್ಟ್ ಮತ್ತು ಬಿಳಿ ಧೋತಿ ಧರಿಸಿ ನಗುಮುಖದೊಂದಿಗೆ ಫೋಟೋಗೆ ಪೋಸ್ ನೀಡಿದ್ದಾರೆ.

ತಮ್ಮ ಪೋಸ್ಟ್‌ನಲ್ಲಿ ಭಾವುಕರಾಗಿ ಬರೆದುಕೊಂಡಿರುವ ಸೂರ್ಯ, “ನಮ್ಮ ಹೃದಯ ಕೃತಜ್ಞತೆಯಿಂದ ತುಂಬಿದೆ! ಭಾಷೆ ಮತ್ತು ಗಡಿಗಳನ್ನು ಮೀರಿ ನೀವು #SCENE ಸಿನಿಮಾಗೆ ನೀಡಿದ ಪ್ರೀತಿ ಹಾಗೂ ಬೆಂಬಲ ನಮಗೆ, ಜ್ಯೋತಿಕಾ ಅವರಿಗೆ ಮತ್ತು ನಮ್ಮ ಇಡೀ ತಂಡಕ್ಕೆ ಅತ್ಯಂತ ಅಮೂಲ್ಯವಾದದ್ದು. ನಮ್ಮ ಮೇಲಿನ ಭರವಸೆಯಿಂದ ಥಿಯೇಟರ್‌ಗೆ ಬಂದ ಪ್ರತಿಯೊಬ್ಬರಿಗೂ ಧನ್ಯವಾದಗಳು. ನಿಮ್ಮ ಈ ಪ್ರೀತಿಯೇ ನಮಗೆ ಹೊಸ ಹಾದಿಗಳನ್ನು ಹುಡುಕಲು ಧೈರ್ಯ ನೀಡುತ್ತದೆ. ಎಲ್ಲರಿಗೂ ದೀಪಾವಳಿ ಹಬ್ಬದ ಶುಭಾಶಯಗಳು” ಎಂದು ಹೆಮ್ಮೆಯಿಂದ ಹಂಚಿಕೊಂಡಿದ್ದಾರೆ.