ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಐಪಿಎಲ್‌ 2027ರ ಸೀಸನ್‌ಗೂ ಮುನ್ನ ಚೆನ್ನೈ ಸೂಪರ್‌ ಕಿಂಗ್ಸ್‌ (CSK) ತಂಡದಲ್ಲಿ ಮಹತ್ವದ ಬದಲಾವಣೆಗಳು ನಡೆಯುತ್ತಿದ್ದು, ಇದೀಗ ತಂಡದ ದೀರ್ಘಕಾಲದ ಬ್ಯಾಟಿಂಗ್‌ ಕೋಚ್‌ ಮೈಕೆಲ್‌ ಹಸ್ಸಿ ಅವರ ನಿರ್ಗಮನದ ಸುದ್ದಿ ಕ್ರಿಕೆಟ್‌ ವಲಯದಲ್ಲಿ ವೈರಲ್ ಆಗಿದೆ. ಆಟಗಾರನಾಗಿ ಹಾಗೂ ಕೋಚ್‌ ಆಗಿ 15 ವರ್ಷಕ್ಕೂ ಹೆಚ್ಚು ಕಾಲ ಸಿಎಸ್‌ಕೆ ಜೊತೆ ಗುರುತಿಸಿಕೊಂಡಿದ್ದ ಹಸ್ಸಿ ಅವರ ಒಡನಾಟ ಅಂತ್ಯಗೊಳ್ಳುವ ಹಂತಕ್ಕೆ ಬಂದಿದೆ ಎಂದು ವರದಿಯಾಗಿದೆ.
ಆಟಗಾರನಿಂದ ಕೋಚ್‌ವರೆಗೆ ಯಶಸ್ವಿ ಪಯಣ
ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಮೈಕೆಲ್‌ ಹಸ್ಸಿ ಸಿಎಸ್‌ಕೆ ತಂಡದ ಪ್ರಮುಖ ಭಾಗವಾಗಿದ್ದರು. ಆಟಗಾರನಾಗಿ ಎರಡು ಬಾರಿ ಹಾಗೂ ಕೋಚ್‌ ಆಗಿ ಮೂರು ಬಾರಿ ಐಪಿಎಲ್‌ ಪ್ರಶಸ್ತಿ ಗೆಲ್ಲುವಲ್ಲಿ ತಂಡದೊಂದಿಗೆ ಯಶಸ್ಸು ಕಂಡಿದ್ದಾರೆ. 2013ರ ಐಪಿಎಲ್‌ನಲ್ಲಿ ಅವರು 733 ರನ್‌ ಗಳಿಸಿ ತಮ್ಮ ಬ್ಯಾಟಿಂಗ್‌ ಸಾಮರ್ಥ್ಯವನ್ನು ಪ್ರದರ್ಶಿಸಿದ್ದರು.
ವರದಿಗಳ ಪ್ರಕಾರ, ಸಿಎಸ್‌ಕೆ ಆಡಳಿತ ಮಂಡಳಿ ಹಸ್ಸಿ ಅವರಿಗೆ ತಂಡದಿಂದ ಹೊರಹೋಗುವಂತೆ ತಿಳಿಸಿದೆ ಎನ್ನಲಾಗಿದೆ. ಆದರೆ, ಅವರು ಐಪಿಎಲ್‌ 2027ರಲ್ಲಿ ಮತ್ತೊಂದು ಫ್ರಾಂಚೈಸಿಯ ಕೋಚಿಂಗ್‌ ಸಿಬ್ಬಂದಿಯಲ್ಲಿ ಕಾಣಿಸಿಕೊಳ್ಳುವ ಸಾಧ್ಯತೆಯೂ ಇದೆ. ಕೆಲವು ತಂಡಗಳೊಂದಿಗೆ ಅವರು ಮಾತುಕತೆ ನಡೆಸುತ್ತಿದ್ದಾರೆ ಎಂಬ ಮಾಹಿತಿಯೂ ವರದಿಯಲ್ಲಿದೆ.
ಇದನ್ನೂ ಓದಿ:
ಕೋಚಿಂಗ್‌ ವಿಭಾಗದಲ್ಲಿ ಮಹತ್ವದ ಬದಲಾವಣೆ
ಸಿಎಸ್‌ಕೆ ತಂಡದಲ್ಲಿ ನಡೆಯುತ್ತಿರುವ ಬದಲಾವಣೆಗಳು ಹಸ್ಸಿ ಅವರ ನಿರ್ಗಮನಕ್ಕೆ ಮಾತ್ರ ಸೀಮಿತವಾಗಿಲ್ಲ. ದೀರ್ಘಕಾಲ ಮುಖ್ಯ ಕೋಚ್‌ ಆಗಿದ್ದ ಸ್ಟೀಫನ್‌ ಫ್ಲೆಮಿಂಗ್‌ ಮತ್ತು ಬೌಲಿಂಗ್‌ ಕೋಚ್‌ ಎರಿಕ್‌ ಸೈಮನ್ಸ್‌ ಅವರೂ ತಂಡದಿಂದ ಹೊರಬಂದಿದ್ದಾರೆ ಎಂದು ವರದಿಯಾಗಿದೆ. ಮತ್ತೊಂದೆಡೆ, ಜಹೀರ್‌ ಖಾನ್‌ ಅವರನ್ನು ಮುಖ್ಯ ಕೋಚ್‌ ಆಗಿ ನೇಮಿಸಲಾಗಿದ್ದು, ಮಾಜಿ ಸಿಎಸ್‌ಕೆ ವೇಗಿ ಮೊಹಿತ್‌ ಶರ್ಮಾ ಅವರಿಗೆ ಬೌಲಿಂಗ್‌ ಕೋಚ್‌ ಜವಾಬ್ದಾರಿ ನೀಡಲಾಗಿದೆ. ಫೀಲ್ಡಿಂಗ್‌ ಕೋಚ್‌ ಜೇಮ್ಸ್‌ ಫೋಸ್ಟರ್‌ ಅವರ ಭವಿಷ್ಯದ ಬಗ್ಗೆಯೂ ಸ್ಪಷ್ಟತೆ ಇಲ್ಲ.
ತಂಡದ ಈ ಬದಲಾವಣೆಗಳಲ್ಲಿ ಎಂ.ಎಸ್‌. ಧೋನಿ ಪ್ರಮುಖ ಪಾತ್ರ ವಹಿಸುತ್ತಿದ್ದಾರೆ ಎಂಬ ವರದಿಗಳೂ ಕೇಳಿಬಂದಿವೆ.
ಹೊಸ ಸಿಎಸ್‌ಕೆ ರೂಪುಗೊಳ್ಳುತ್ತಾ?
ಐಪಿಎಲ್‌ 2027ಕ್ಕೂ ಮುನ್ನ ಕೋಚಿಂಗ್‌ ವಿಭಾಗದಲ್ಲಿ ನಡೆಯುತ್ತಿರುವ ಈ ಬದಲಾವಣೆಗಳು ತಂಡದ ಮುಂದಿನ ಕಾರ್ಯತಂತ್ರದ ಬಗ್ಗೆ ಕುತೂಹಲ ಮೂಡಿಸಿವೆ. ಹಸ್ಸಿ ಅವರ ಸ್ಥಾನಕ್ಕೆ ಯಾರು ಬರಲಿದ್ದಾರೆ ಮತ್ತು ಹೊಸ ಕೋಚಿಂಗ್‌ ತಂಡದ ಮಾರ್ಗದರ್ಶನದಲ್ಲಿ ಸಿಎಸ್‌ಕೆ ಹೇಗೆ ಪ್ರದರ್ಶನ ನೀಡಲಿದೆ ಎಂಬುದು ಮುಂದಿನ ದಿನಗಳಲ್ಲಿ ತಿಳಿಯಲಿದೆ.
