ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಅಜಿತ್ ಅಗರ್ಕರ್ ನೇತೃತ್ವದ ಟೀಮ್ ಇಂಡಿಯಾ ಆಯ್ಕೆ ಸಮಿತಿ ಸೆಪ್ಟೆಂಬರ್ 16 ರ ಬುಧವಾರದಂದು ವೆಸ್ಟ್ ಇಂಡೀಸ್ ವಿರುದ್ಧದ ಏಕದಿನ ಹಾಗೂ ಟಿ20 ಸರಣಿಗೆ ಭಾರತ ತಂಡವನ್ನು ಘೋಷಣೆ ಮಾಡಿದೆ. ಮುಂಬರುವ ಏಕದಿನ ವಿಶ್ವಕಪ್ ದೃಷ್ಟಿಯಿಂದ ಪ್ರತಿಯೊಂದು ಸರಣಿಯೂ ಈಗ ಅತ್ಯಂತ ಪ್ರಮುಖ. ಅದೂ ಅಲ್ಲದೆ, ಏಷ್ಯನ್ ಗೇಮ್ಸ್ನಿಂದಾಗಿ ಪ್ರಮುಖ ಆಟಗಾರರ ಲಭ್ಯತೆ ಇಲ್ಲದಿರುವುದರಿಂದ ಈ ಸರಣಿಯಲ್ಲಿ ಯಾರು ಸ್ಥಾನ ಪಡೆಯಲಿದ್ದಾರೆ ಎಂಬ ದೊಡ್ಡ ಕುತೂಹಲ ಕ್ರಿಕೆಟ್ ಪ್ರಿಯರಲ್ಲಿತ್ತು.
ವಿಶೇಷವಾಗಿ, ಏಕದಿನ ತಂಡದ ನಾಲ್ಕನೇ ಕ್ರಮಾಂಕದಲ್ಲಿ ಆಡುತ್ತಿದ್ದ ಶ್ರೇಯಸ್ ಅಯ್ಯರ್ ಅಲಭ್ಯತೆಯಿಂದಾಗಿ ಅವರ ಜಾಗವನ್ನು ಯಾರು ತುಂಬಲಿದ್ದಾರೆ ಎಂಬುದು ಪ್ರಶ್ನೆಯಾಗಿತ್ತು. ಬಹುತೇಕ ಅಭಿಮಾನಿಗಳು ಮತ್ತು ವಿಶ್ಲೇಷಕರು ಈ ಜಾಗಕ್ಕೆ ಫಾರ್ಮ್ನಲ್ಲಿರುವ ಕನ್ನಡಿಗ ದೇವದತ್ ಪಡಿಕ್ಕಲ್ ಬರಲಿದ್ದಾರೆ ಎಂದೇ ಭಾವಿಸಿದ್ದರು. ಆದರೆ, ಬಿಸಿಸಿಐ ಅಚ್ಚರಿಯ ರೀತಿಯಲ್ಲಿ ರುತುರಾಜ್ ಗಾಯಕ್ವಾಡ್ ಅವರಿಗೆ ಮಣೆ ಹಾಕಿದೆ.
ವರ್ಲ್ಡ್ ಕ್ಲಾಸ್ ಆ್ಯವರೇಜ್ ಇದ್ರೂ ನೋ ಚಾನ್ಸ್
ದೇವದತ್ ಪಡಿಕ್ಕಲ್ ಇತ್ತೀಚೆಗೆ ಶ್ರೀಲಂಕಾ ಪ್ರವಾಸದಲ್ಲಿದ್ದಾಗ ಸತತ ಎರಡು ಶತಕಗಳನ್ನು ಸಿಡಿಸಿದ್ದರು. ಐಪಿಎಲ್ 2026ರ ಸೀಸನ್ನಲ್ಲೂ ಅವರ ಬ್ಯಾಟಿಂಗ್ ಚೆನ್ನಾಗಿತ್ತು. ಕೇವಲ 42 ಲಿಸ್ಟ್-ಎ ಪಂದ್ಯಗಳಲ್ಲಿ 13 ಭರ್ಜರಿ ಶತಕ ಹಾಗೂ 14 ಅರ್ಧಶತಕಗಳೊಂದಿಗೆ ಪಡಿಕ್ಕಲ್ 2,796 ರನ್ ಗಳಿಸಿದ್ದಾರೆ. ಬ್ಯಾಟಿಂಗ್ ಸರಾಸರಿ 82.23 ರಷ್ಟಿದ್ದು, ಪ್ರಸ್ತುತ ವಿಶ್ವ ಕ್ರಿಕೆಟ್ನ ಏಕದಿನ/ಲಿಸ್ಟ್-ಎ ಮಾದರಿಯಲ್ಲಿಯೇ ಇದು ಗರಿಷ್ಠ ಸರಾಸರಿಯಾಗಿದೆ. ಇಷ್ಟೆಲ್ಲಾ ಟ್ರ್ಯಾಕ್ ರೆಕಾರ್ಡ್ ಇದ್ದರೂ ಪಡಿಕ್ಕಲ್ ಅವರನ್ನು ಹೊರಗಿಟ್ಟಿರುವುದು ಕ್ರಿಕೆಟ್ ಪ್ರೇಮಿಗಳಿಗೆ ಕೊಂಚ ಬೇಸರ ತಂದಿರುವುದು ಸಹಜ.
ಪಡಿಕ್ಕಲ್ ಬಿಟ್ಟು ರುತುರಾಜ್ಗೆ ಜಾಗ ನೀಡಿದ್ದೇಕೆ?
ಪಡಿಕ್ಕಲ್ ಟಾಪ್-ಆರ್ಡರ್ ಅಥವಾ ಓಪನಿಂಗ್ ಬ್ಯಾಟರ್. ಆದರೆ, ಶ್ರೇಯಸ್ ಅಯ್ಯರ್ ಇಲ್ಲದಿರುವುದರಿಂದ ತಂಡಕ್ಕೆ ಬೇಕಾಗಿದ್ದದ್ದು ಮಧ್ಯಮ ಕ್ರಮಾಂಕದಲ್ಲಿ ಕ್ರೀಸ್ನಲ್ಲಿ ನಿಂತು ತಂಡವನ್ನು ಸಂಭಾಳಿಸುವ ಬ್ಯಾಟರ್. ರುತುರಾಜ್ ಅವರು ಓಪನರ್ ಆಗಿದ್ದರೂ ಮಧ್ಯಮ ಕ್ರಮಾಂಕದಲ್ಲೂ ಆಡಿ ಸಕ್ಸಸ್ ಆಗಿರುವ ಅನುಭವ ಹೊಂದಿದ್ದಾರೆ.
ರೋಹಿತ್ ಶರ್ಮಾ ಮತ್ತು ಶುಭಮನ್ ಗಿಲ್ ಈಗಾಗಲೇ ಓಪನರ್ಗಳಾಗಿದ್ದಾರೆ. ಇಂತಹ ಸಮಯದಲ್ಲಿ ಮತ್ತೊಬ್ಬ ಓಪನರ್ ಅನ್ನು ತಂದು ಮಿಡಲ್ ಆರ್ಡರ್ನಲ್ಲಿ ಪ್ರಯೋಗ ಮಾಡುವ ಬದಲು, ಮಧ್ಯಮ ಕ್ರಮಾಂಕಕ್ಕೆ ಹೊಂದಿಕೊಳ್ಳುವ ಮತ್ತು ಅನುಭವ ಇರುವ ಗಾಯಕ್ವಾಡ್ ಸೂಕ್ತ ಎಂಬ ತೀರ್ಮಾನಕ್ಕೆ ಸೆಲೆಕ್ಟರ್ಸ್ ಬಂದಿದ್ದಾರೆ.
ಏನೇ ಆದರೂ, ಪಡಿಕ್ಕಲ್ ಅವರ ಪ್ರಸ್ತುತ ಫಾರ್ಮ್ ಮತ್ತು ಆವರೇಜ್ ನೋಡಿ ಅವರಿಗೆ ತಂಡದಲ್ಲಿ ಸ್ಥಾನ ಸಿಗಬೇಕಿತ್ತು ಎನ್ನುವುದು ಹಲವರ ವಾದ. ಮುಂಬರುವ ದಿನಗಳಲ್ಲಾದರೂ ಇವರಿಗೆ ಅರ್ಹ ಅವಕಾಶ ಸಿಗುತ್ತಾ ಅನ್ನೋದನ್ನ ಕಾದು ನೋಡಬೇಕಿದೆ.
