ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಇತ್ತೀಚಿನ ವರ್ಷಗಳಲ್ಲಿ ಪ್ರಭಾಸ್, ಅಲ್ಲು ಅರ್ಜುನ್, ಜೂನಿಯರ್ ಎನ್ಟಿಆರ್ ಮತ್ತು ರಾಮ್ ಚರಣ್ ಅವರಂತಹ ದಕ್ಷಿಣ ಭಾರತದ ತಾರೆಯರು ‘ಪ್ಯಾನ್ ಇಂಡಿಯಾ ಸ್ಟಾರ್’ಗಳಾಗಿ ದೇಶಾದ್ಯಂತ ಸದ್ದು ಮಾಡುತ್ತಿದ್ದಾರೆ. ಆದರೆ, ಇವರೆಲ್ಲರಿಗಿಂತ ದಶಕಗಳ ಮೊದಲೇ ಉತ್ತರ ಭಾರತದಲ್ಲಿ ತಮ್ಮದೇ ಆದ ಸಾಮ್ರಾಜ್ಯ ಸೃಷ್ಟಿಸಿದ್ದ ಅಸಲಿ ‘ಓಜಿ’ ಪ್ಯಾನ್ ಇಂಡಿಯಾ ಸ್ಟಾರ್ ಎಂದರೆ ಅದು ಮೆಗಾಸ್ಟಾರ್ ಚಿರಂಜೀವಿ. ಕೇವಲ ತೆಲುಗು ಸಿನಿಮಾಗಳಲ್ಲೇ ನಟಿಸುತ್ತಿದ್ದರೂ, ಒಂದು ಕಾಲದಲ್ಲಿ ಇಡೀ ದೇಶದಲ್ಲೇ ಅತಿ ಹೆಚ್ಚು ಸಂಭಾವನೆ ಪಡೆಯುವ ನಟನಾಗಿ ಚಿರಂಜೀವಿ ಇತಿಹಾಸ ಬರೆದಿದ್ದರು. ಅವರ ಕ್ರೇಜ್ ಎಷ್ಟಿತ್ತೆಂದರೆ, ನಾರ್ತ್ ಇಂಡಿಯಾದಲ್ಲಿ ಮುಳುಗುತ್ತಿದ್ದ ಟಿವಿ ಚಾನೆಲ್ಗಳಿಗೆ ಅವರ ಸಿನಿಮಾಗಳೇ ಸಂಜೀವಿನಿಯಾಗಿದ್ದವು!
ಭಾರತೀಯ ಕಿರುತೆರೆ ಲೋಕದ ದೈತ್ಯ ಹಾಗೂ ಪ್ರಮುಖ ಮಾಧ್ಯಮ ತಜ್ಞರಾದ ಸಮೀರ್ ನಾಯರ್ ಇತ್ತೀಚೆಗೆ ಈ ಕುರಿತು ಆಸಕ್ತಿದಾಯಕ ರಹಸ್ಯವೊಂದನ್ನು ಬಿಚ್ಚಿಟ್ಟಿದ್ದಾರೆ. ಅನುಪಮಾ ಚೋಪ್ರಾ ಅವರ ಪ್ರಸಿದ್ಧ ‘ಹಾಲಿವುಡ್ ರಿಪೋರ್ಟರ್ ಇಂಡಿಯಾ’ ಯೂಟ್ಯೂಬ್ ಚಾನೆಲ್ ಸಂದರ್ಶನದಲ್ಲಿ ಭಾಗವಹಿಸಿದ್ದ ಅವರು, ಉತ್ತರ ಭಾರತದಲ್ಲಿ ಮೆಗಾಸ್ಟಾರ್ ಚಿರಂಜೀವಿ ಅವರ ಸಿನಿಮಾ ಕ್ರೇಜ್ ಯಾವ ಮಟ್ಟಿಗೆ ಕೆಲಸ ಮಾಡುತ್ತಿತ್ತು ಎಂಬುದನ್ನು ನೆನಪಿಸಿಕೊಂಡಿದ್ದಾರೆ.
TRP ರೇಟಿಂಗ್ಸ್ ಹೆಚ್ಚಿಸುತ್ತಿದ್ದ ‘ಇಂದ್ರ: ದಿ ಟೈಗರ್’
ಸಂದರ್ಶನದಲ್ಲಿ ಮಾತನಾಡಿದ ಸಮೀರ್ ನಾಯರ್, “ಹಿಂದಿ ಮನೋರಂಜನಾ ಚಾನೆಲ್ಗಳ ಟಿಆರ್ಪಿ ಯಾವಾಗ ಕುಸಿಯುತ್ತಿತ್ತೋ, ಅಥವಾ ಚಾನೆಲ್ ಸಂಕಷ್ಟಕ್ಕೆ ಸಿಲುಕುತ್ತಿತ್ತೋ, ಆಗ ನಾವು ತಕ್ಷಣವೇ ಚಿರಂಜೀವಿ ನಟನೆಯ ಸೂಪರ್ ಹಿಟ್ ‘ಇಂದ್ರ’ ಸಿನಿಮಾದ ಹಿಂದಿ ಡಬ್ಬಿಂಗ್ ಆವೃತ್ತಿಯನ್ನು ಪ್ರಸಾರ ಮಾಡುತ್ತಿದ್ದೆವು. ಹಿಂದಿಯಲ್ಲಿ ಈ ಚಿತ್ರವನ್ನು ‘ಇಂದ್ರ: ದಿ ಟೈಗರ್’ ಎಂದು ಹೆಸರಿಸಲಾಗಿತ್ತು. ವಿಶೇಷವೆಂದರೆ, ಈ ಸಿನಿಮಾವನ್ನು ಎಷ್ಟು ಬಾರಿ ಮರುಪ್ರಸಾರ ಮಾಡಿದರೂ ಪ್ರತಿ ಬಾರಿಯೂ ಚಾನೆಲ್ನ ಟಿಆರ್ಪಿ ದಾಖಲೆ ಮಟ್ಟದಲ್ಲಿ ಹೆಚ್ಚಾಗುತ್ತಿತ್ತು” ಎಂದು ಹೇಳಿದ್ದಾರೆ.
ಕೇವಲ ‘ಇಂದ್ರ’ ಸಿನಿಮಾ ಮಾತ್ರವಲ್ಲದೆ, ಮೆಗಾಸ್ಟಾರ್ ನಟನೆಯ ಹಲವು ಬ್ಲಾಕ್ಬಸ್ಟರ್ ತೆಲುಗು ಚಿತ್ರಗಳನ್ನು ಹಿಂದಿಗೆ ಡಬ್ ಮಾಡಿ ವಿವಿಧ ವಾಹಿನಿಗಳು ಪ್ರಸಾರ ಮಾಡುತ್ತಿದ್ದವು. ಪ್ರತಿ ಬಾರಿಯೂ ಉತ್ತರ ಭಾರತದ ಪ್ರೇಕ್ಷಕರು ಚಿರಂಜೀವಿ ಅವರ ಸಾಹಸ ದೃಶ್ಯಗಳು ಹಾಗೂ ಸ್ಟೈಲ್ಗೆ ಮನಸೋತು ಮುಗಿಬಿದ್ದು ಟಿವಿ ವೀಕ್ಷಿಸುತ್ತಿದ್ದರು. ಸದ್ಯದ ಪ್ಯಾನ್ ಇಂಡಿಯಾ ಟ್ರೆಂಡ್ಗೆ ದಶಕಗಳ ಮೊದಲೇ ಹಿಂದಿ ಪ್ರೇಕ್ಷಕರನ್ನು ಕಟ್ಟಿಹಾಕಿದ್ದ ಚಿರಂಜೀವಿ ಅವರ ಜನಪ್ರಿಯತೆಗೆ ಇಂದಿಗೂ ಸರಿಸಾಟಿಯಿಲ್ಲ ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿ.
