ಹೊಸದಿಗಂತ ಡಿಜಿಟಲ್ ಡೆಸ್ಕ್:
ದೊಡ್ಡ ನಿರೀಕ್ಷೆಯೊಂದಿಗೆ ಬಿಡುಗಡೆಯಾದ ಭೂತ್ ಬಂಗ್ಲ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ನಿರೀಕ್ಷಿತ ಮಟ್ಟದ ಆರಂಭ ಪಡೆಯಲು ವಿಫಲವಾಗಿದೆ. ಅಕ್ಷಯ್ ಕುಮಾರ್ ನಟನೆಯ ಈ ಕಾಮಿಡಿ-ಹಾರರ್ ಚಿತ್ರ ಮೊದಲ ದಿನ ಕೇವಲ 12 ಕೋಟಿ ರೂಪಾಯಿ ಗಳಿಕೆ ಮಾಡಿದ್ದು, ಚಿತ್ರದ ಭವಿಷ್ಯ ಕುರಿತು ಪ್ರಶ್ನೆಗಳು ಮೂಡಿವೆ.
ಸುಮಾರು 120 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಾಣವಾದ ಈ ಚಿತ್ರಕ್ಕೆ ಭರ್ಜರಿ ಓಪನಿಂಗ್ ಅಗತ್ಯವಿತ್ತು. ಆದರೆ ಆರಂಭಿಕ ಕಲೆಕ್ಷನ್ ಅದಕ್ಕೆ ತಕ್ಕಂತೆ ಕಾಣಿಸಿಲ್ಲ. ಇತ್ತೀಚಿನ ದಿನಗಳಲ್ಲಿ ಅಕ್ಷಯ್ ಕುಮಾರ್ ಅವರ ಸಿನಿಮಾಗಳು ನಿರೀಕ್ಷಿತ ಮಟ್ಟದಲ್ಲಿ ಮೆಚ್ಚುಗೆ ಪಡೆಯದೇ ಇರುವುದರಿಂದ, ಈ ಚಿತ್ರದ ಮೇಲೂ ಒತ್ತಡ ಹೆಚ್ಚಾಗಿದೆ.
ಕಾಮಿಡಿ ಮುಖ್ಯ ಆಕರ್ಷಣೆ ಎಂದು ಹೇಳಲಾಗಿದ್ದರೂ, ಅದು ಪ್ರೇಕ್ಷಕರಿಗೆ ತಲುಪಿಲ್ಲ ಎಂಬ ಮಾತು ಕೇಳಿಬರುತ್ತಿದೆ. ಅನೇಕ ವಿಮರ್ಶಕರು ಚಿತ್ರದ ಹಾಸ್ಯ ಅಂಶಗಳು ಪರಿಣಾಮಕಾರಿಯಾಗಿಲ್ಲ ಎಂದು ಟೀಕಿಸಿದ್ದಾರೆ. ಇದರಿಂದ ಸಿನಿಮಾ ಆರಂಭಿಕ ದಿನದಲ್ಲೇ ಮಿಶ್ರ ಪ್ರತಿಕ್ರಿಯೆ ಪಡೆದುಕೊಂಡಿದೆ.
ಇದನ್ನೂ ಓದಿ:
ಆದರೂ ಅಭಿಮಾನಿಗಳ ನಿರೀಕ್ಷೆಯಿಂದ ಮೊದಲ ದಿನ ಕಲೆಕ್ಷನ್ 12 ಕೋಟಿಗೆ ತಲುಪಿದೆ. ವಾರಾಂತ್ಯದಂದು, ವಿಶೇಷವಾಗಿ ಶನಿವಾರ ಮತ್ತು ಭಾನುವಾರ, ಸಿನಿಮಾದ ಗಳಿಕೆ ಏರಿಕೆಯಾಗುವ ಸಾಧ್ಯತೆ ಇದೆ. ಆದರೆ ಭಾನುವಾರ ಬಳಿಕ ಸ್ಪಷ್ಟ ಪ್ರತಿಕ್ರಿಯೆ ಸಿಗಲಿದ್ದು, ಅದರಿಂದ ಚಿತ್ರದ ಮುಂದಿನ ಕಲೆಕ್ಷನ್ ನಿರ್ಧಾರವಾಗಲಿದೆ.
ಒಟ್ಟಾರೆ, ಹೆಚ್ಚಿನ ಬಜೆಟ್ನ ಈ ಚಿತ್ರ ಲಾಭದಲ್ಲಿರಲು ದೊಡ್ಡ ಮಟ್ಟದ ಕಲೆಕ್ಷನ್ ಅಗತ್ಯವಿದೆ. ಪ್ರಸ್ತುತ ಟ್ರೆಂಡ್ ಗಮನಿಸಿದರೆ 100 ಕೋಟಿ ಕ್ಲಬ್ ತಲುಪುವುದು ಸವಾಲಾಗಬಹುದು ಎಂಬ ಅಂದಾಜು ವ್ಯಕ್ತವಾಗುತ್ತಿದೆ.
