ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಸಿನಿಮಾ ಬಿಡುಗಡೆಯಾಗಲು ಇನ್ನೂ ಸಾಕಷ್ಟು ಸಮಯ ಬಾಕಿ ಇದ್ದರೂ, ‘ವಾರಣಾಸಿ’ ಚಿತ್ರ ಈಗಾಗಲೇ ಭಾರೀ ಚರ್ಚೆಗೆ ಕಾರಣವಾಗಿದೆ. ಈ ಬಾರಿ ಚಿತ್ರದ ಕಥೆಯ ಪ್ರಮುಖ ಭಾಗಕ್ಕೆ ಸಂಬಂಧಿಸಿದ ಸೆಟ್ ಫೋಟೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಚಿತ್ರತಂಡಕ್ಕೆ ಹೊಸ ತಲೆನೋವು ತಂದಿದೆ.
ಸೋರಿಕೆಯಾದ ಸೆಟ್ನಲ್ಲಿ ಏನಿದೆ?
ಇತ್ತೀಚೆಗೆ ಹೊರಬಿದ್ದ ಚಿತ್ರದಲ್ಲಿ ಬೃಹತ್ ಬ್ಲೂ-ಸ್ಕ್ರೀನ್ ಹಿನ್ನೆಲೆ, ಕಲ್ಲಿನ ಶಿಲ್ಪಕಲೆಗಳು ಹಾಗೂ ಪುರಾತನ ಶೈಲಿಯ ಕಂಬಗಳು ಕಾಣಿಸಿಕೊಂಡಿವೆ. ಇದು ಸಿನಿಮಾದ ಪ್ರಮುಖ ಭಾಗವಾಗಿರುವ ‘ಉಗ್ರಭಟ್ಟಿ ಗುಹೆ’ಯ ಸೆಟ್ ಎಂದು ಸಿನಿ ವಲಯದಲ್ಲಿ ಚರ್ಚೆಯಾಗುತ್ತಿದೆ. ಈ ದೃಶ್ಯಗಳು ಚಿತ್ರದ ಕಥಾಹಂದರದಲ್ಲಿ ಮಹತ್ವದ ತಿರುವು ನೀಡಲಿವೆ ಎನ್ನಲಾಗುತ್ತಿದೆ.
ಇದನ್ನೂ ಓದಿ:
ಪುರಾಣ ಸ್ಪರ್ಶದ ಕಥಾಹಂದರ
ಮೂಲಗಳ ಪ್ರಕಾರ, ಈ ಭಾಗವು ಶಕ್ತಿದೇವತೆಯೊಂದರ ಪೌರಾಣಿಕ ಹಿನ್ನೆಲೆಯನ್ನು ಆಧರಿಸಿದೆ. ಕಥಾನಾಯಕ ತನ್ನ ಗುರಿ ಸಾಧನೆಗಾಗಿ ವಿಶೇಷ ಶಕ್ತಿಯನ್ನು ಅರಸುವ ಸಂದರ್ಭದಲ್ಲಿ ಈ ಗುಹೆಗೆ ಭೇಟಿ ನೀಡುವ ದೃಶ್ಯಗಳನ್ನು ಇಲ್ಲಿ ಚಿತ್ರೀಕರಿಸಲಾಗಿದೆ ಎನ್ನಲಾಗುತ್ತಿದೆ. ಇದರಿಂದ ಚಿತ್ರದ ಕಥೆಗೆ ಪೌರಾಣಿಕ ಮತ್ತು ಸಾಹಸಮಯ ಸ್ಪರ್ಶ ಸಿಗಲಿದೆ.
ಭದ್ರತೆ ಇದ್ದರೂ ಲೀಕ್ ಮುಂದುವರಿಕೆ
ಈ ಹಿಂದೆ ಕೂಡ ಚಿತ್ರದ ಚಿತ್ರೀಕರಣದ ವಿಡಿಯೋಗಳು ಮತ್ತು ಫೋಟೋಗಳು ಸೋರಿಕೆಯಾಗಿದ್ದವು. ಬಳಿಕ ಚಿತ್ರತಂಡ ಮೊಬೈಲ್ ಬಳಕೆ ಸೇರಿದಂತೆ ಹಲವು ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೊಳಿಸಿತ್ತು. ಆದರೂ ಮತ್ತೊಮ್ಮೆ ಪ್ರಮುಖ ದೃಶ್ಯಗಳು ಬಹಿರಂಗವಾಗಿರುವುದು ನಿರ್ಮಾಪಕರ ಆತಂಕಕ್ಕೆ ಕಾರಣವಾಗಿದೆ.
ಒಡಿಶಾ, ಹೈದರಾಬಾದ್ ಹಾಗೂ ವಿದೇಶಿ ಸ್ಥಳಗಳಲ್ಲಿ ಚಿತ್ರೀಕರಣಗೊಳ್ಳುತ್ತಿರುವ ಈ ಬೃಹತ್ ಚಿತ್ರವನ್ನು 2027ರಲ್ಲಿ ವಿಶ್ವದಾದ್ಯಂತ ಬಿಡುಗಡೆ ಮಾಡುವ ಯೋಜನೆ ಇದೆ.
