November 21, 2026
Saturday, November 21, 2026
spot_img

ಸಮಾಜ ನೋಡಲು ನಿರಾಕರಿಸುವ ಸತ್ಯ ಬಿಚ್ಚಿಡುವುದೇ ನಿಜವಾದ ಸಿನಿಮಾ: ಗಿರೀಶ್ ಕಾಸರವಳ್ಳಿ

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:‌

ಸಿನಿಮಾ ಎನ್ನುವುದು ಕೇವಲ ಕಥೆ ಹೇಳುವ ಮಾಧ್ಯಮವಲ್ಲ, ಬದಲಾಗಿ ಸಮಾಜವು ನೋಡಲು ಹಿಂಜರಿಯುವ ವಾಸ್ತವಗಳನ್ನು ಎದುರಿಸುವ ಧೈರ್ಯವಾಗಿದೆ ಎಂದು ಖ್ಯಾತ ಕನ್ನಡ ಚಲನಚಿತ್ರ ನಿರ್ದೇಶಕ, ರಾಷ್ಟ್ರಪ್ರಶಸ್ತಿ ವಿಜೇತ ಗಿರೀಶ್ ಕಾಸರವಳ್ಳಿ ಅಭಿಪ್ರಾಯಪಟ್ಟಿದ್ದಾರೆ.

ಗೋವಾದ ಕಲಾ ಅಕಾಡೆಮಿಯಲ್ಲಿ ನಡೆಯುತ್ತಿರುವ 57ನೇ ಭಾರತೀಯ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದ (IFFI) ‘ಸಮಾನಾಂತರ ಸಿನಿಮಾದ ನೈತಿಕ ವಿಶ್ವ: ಗಿರೀಶ್ ಕಾಸರವಳ್ಳಿ ಅವರ 50 ವರ್ಷಗಳು’ ಎಂಬ ಸಂವಾದ ಗೋಷ್ಠಿಯಲ್ಲಿ ಅವರು ತಮ್ಮ ಐದು ದಶಕಗಳ ಸಿನಿಮಾ ಪಯಣದ ಅನುಭವಗಳನ್ನು ಹಂಚಿಕೊಂಡರು.

ಕೇವಲ ಮನರಂಜನೆ ಎಂಬುದು ಯಾವುದೂ ಇಲ್ಲ

ವಾಣಿಜ್ಯ ಮತ್ತು ಕಲಾತ್ಮಕ ಸಿನಿಮಾ ಎಂಬ ಸಾಂಪ್ರದಾಯಿಕ ವಿಭಜನೆಯನ್ನು ತಳ್ಳಿಹಾಕಿದ ಕಾಸರವಳ್ಳಿ, ಪ್ರತಿಯೊಂದು ಸಿನಿಮಾದ ಹಿಂದೆಯೂ ಒಂದು ಸೈದ್ಧಾಂತಿಕ ನಿಲುವಿರುತ್ತದೆ ಎಂದರು. “‘ಕೇವಲ ಮನರಂಜನೆ’ ಎನ್ನುವಂಥದ್ದು ಯಾವುದೂ ಇಲ್ಲ. ಮನರಂಜನೆಯೂ ಕೂಡ ಒಂದು ರೀತಿಯ ರಾಜಕೀಯವೇ ಆಗಿದೆ. ನಿರ್ದೇಶಕರು ತಮ್ಮ ಚಿತ್ರಗಳ ಮೂಲಕ ಸಮಾಜದ ಪ್ರಬಲ ಸಿದ್ಧಾಂತಗಳನ್ನು ಒಪ್ಪಿಕೊಳ್ಳುತ್ತಾರೆ ಅಥವಾ ಪ್ರಶ್ನಿಸುತ್ತಾರೆ,” ಎಂದು ತಿಳಿಸಿದರು.

1977ರ ‘ಘಟಶ್ರಾದ್ಧ’ದಿಂದ ಹಿಡಿದು ‘ತಬರನ ಕಥೆ’, ‘ತಾಯಿ ಸಾಹೇಬ’, ‘ದ್ವೀಪ’ದವರೆಗಿನ ತಮ್ಮ ಚಿತ್ರಗಳನ್ನು ಸ್ಮರಿಸಿದ ಅವರು, ಜಾತಿ ವ್ಯವಸ್ಥೆ, ಧಾರ್ಮಿಕ ಯಜಮಾನಿಕೆ ಮತ್ತು ಶೋಷಿತ ಸಮುದಾಯಗಳನ್ನು ಸಮಾಜದ ಮುಖ್ಯವಾಹಿನಿಯಿಂದ ಹೊರಗಿಡುವ ‘ಪರಕೀಯಗೊಳಿಸುವಿಕೆ’ಯೇ ತಮ್ಮ ಚಿತ್ರಗಳ ಕೇಂದ್ರಬಿಂದು ಎಂದು ವಿವರಿಸಿದರು. ಕಥಾವಸ್ತುವಿಗಿಂತ ಕಥೆಯನ್ನು ನೋಡುವ ದೃಷ್ಟಿಕೋನ ಮುಖ್ಯ; ಶೈಲಿಯನ್ನು ಹೊರಗಿನಿಂದ ಹೇರಲು ಸಾಧ್ಯವಿಲ್ಲ, ಅದು ಕಥೆಯ ಒಳಗಿನಿಂದಲೇ ಹುಟ್ಟಬೇಕು ಎಂದರು.

ತೀರ್ಪು ನೀಡುವುದಲ್ಲ, ಆಲೋಚನೆಗೆ ಹಚ್ಚುವುದೇ ಸಿನಿಮಾ

ಸಾಹಿತಿ ಯು.ಆರ್. ಅನಂತಮೂರ್ತಿ ಅವರ ಚಿಂತನೆಯನ್ನು ನೆನಪಿಸಿಕೊಂಡ ಅವರು, ಸಿನಿಮಾ ಯಾವತ್ತೂ ‘ಇದು ಸರಿ, ಇದು ತಪ್ಪು’ ಎಂದು ಸುಲಭದ ತೀರ್ಪು ನೀಡಬಾರದು. ಬದಲಾಗಿ ಪ್ರೇಕ್ಷಕರನ್ನು ಸ್ವತಂತ್ರವಾಗಿ ಆಲೋಚಿಸುವಂತೆ ಪ್ರೇರೇಪಿಸಬೇಕು ಎಂದರು. ಇದೇ ವೇಳೆ ತಮ್ಮ ಸಿನಿಮಾಗಳಲ್ಲಿನ ಮಹಿಳಾ ಪಾತ್ರಗಳ ಗಟ್ಟಿತನವನ್ನು ಉಲ್ಲೇಖಿಸುತ್ತಾ, ‘ದ್ವೀಪ’ ಚಿತ್ರದ ನಾಗಿ ಪಾತ್ರದ “ವರ್ತಮಾನವನ್ನು ಹಿತಕರವಾಗಿಸಿಕೊಳ್ಳೋಣ” ಎಂಬ ಮಾತನ್ನು ಸ್ಮರಿಸಿ, ಎಂತಹದೇ ಅನಿಶ್ಚಿತ ಸಂದರ್ಭವನ್ನೂ ನಿಭಾಯಿಸುವ ಅದ್ಭುತ ಶಕ್ತಿ ಮಹಿಳೆಯರಿಗಿದೆ ಎಂದರು.

ನಮ್ಮದೇ ನೆಲದ ಸಿನಿಮಾ ಭಾಷೆ ಬೇಕು

ಸಿನಿಮಾ ನಿರ್ಮಾಣವು ಒಂದು ಸಾಮೂಹಿಕ ಕಲೆಯಾಗಿದ್ದು, “ಕಲ್ಪನೆ ನನ್ನ ಮನಸ್ಸಿನಲ್ಲಿ ಮೊಳಕೆಯೊಡೆದರೂ ಅದಕ್ಕೆ ಪರದೆಯ ಮೇಲೆ ಜೀವ ತುಂಬುವುದು ನನ್ನ ತಂಡ” ಎಂದು ಹೇಳಿದರು. ಕ್ಯೂಬನ್ ನಿರ್ದೇಶಕ ಜೂಲಿಯೋ ಗಾರ್ಸಿಯಾ ಎಸ್ಪಿನೋಸಾ ಅವರ ‘ಅಪರಿಪೂರ್ಣ ಸಿನಿಮಾ’ ಸಿದ್ಧಾಂತವನ್ನು ಉಲ್ಲೇಖಿಸಿದ ಕಾಸರವಳ್ಳಿ, ಭಾರತೀಯ ನಿರ್ದೇಶಕರು ಪಾಶ್ಚಾತ್ಯ ಅಥವಾ ಬೇರೆಯವರ ಮಾನದಂಡಗಳಿಗೆ ತಕ್ಕಂತೆ ತಮ್ಮನ್ನು ಅಳೆದುಕೊಳ್ಳುವ ಅಗತ್ಯವಿಲ್ಲ. “ಬೇರೆಯವರ ಅಳತೆಗೋಲಿಗೆ ತಕ್ಕಂತೆ ನಾನೇಕೆ ಪರಿಪೂರ್ಣನಾಗಿರಬೇಕು? ನಾನು ನನ್ನದೇ ಪರಿಸರ ಮತ್ತು ಸಂಸ್ಕೃತಿಗೆ ನಿಷ್ಠನಾಗಿರಬೇಕು,” ಎನ್ನುವ ಮೂಲಕ ದೇಶೀಯ ಸಿನಿಮಾ ಭಾಷೆಯನ್ನು ಕಟ್ಟುವಂತೆ ಕರೆ ನೀಡಿದರು.

Must Read

Skip to toolbar