ಸಿಎಸ್ಕೆ ಫ್ರಾಂಚೈಸಿ ಒಡೆತನದ ಜೋಬರ್ಗ್ ಸೂಪರ್ ಕಿಂಗ್ಸ್ (JSK) ತಂಡವು ಮುಂಬರುವ SA20 ಲೀಗ್ಗಾಗಿ ತಮ್ಮ ಹೊಸ ಮುಖ್ಯ ಕೋಚ್ ಹೆಸರನ್ನು ಪ್ರಕಟಿಸಿದೆ. ನ್ಯೂಜಿಲೆಂಡ್ನ ಮಾಜಿ ನಾಯಕ ಸ್ಟೀಫನ್ ಫ್ಲೆಮಿಂಗ್ ತಮ್ಮ ಹುದ್ದೆಯಿಂದ ಕೆಳಗಿಳಿದ ಕಾರಣ, ಅವರ ಸ್ಥಾನಕ್ಕೆ ದಕ್ಷಿಣ ಆಫ್ರಿಕಾದ ಮಾಜಿ ಆಲ್ರೌಂಡರ್ ಆಲ್ಬಿ ಮಾರ್ಕೆಲ್ ಅವರನ್ನು ನೇಮಕ ಮಾಡಲಾಗಿದೆ.
ಸೂಪರ್ ಕಿಂಗ್ಸ್ ಕುಟುಂಬದಲ್ಲಿ ಆಲ್ಬಿ ಮಾರ್ಕೆಲ್
ಆಲ್ಬಿ ಮಾರ್ಕೆಲ್ ಅವರಿಗೆ ಸೂಪರ್ ಕಿಂಗ್ಸ್ ಫ್ರಾಂಚೈಸಿ ಹೊಸದೇನಲ್ಲ. ಐಪಿಎಲ್ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಪರ ಆಡಿದ ಅನುಭವ ಹೊಂದಿರುವ ಅವರು, SA20 ಲೀಗ್ನ ಮೊದಲ ಆವೃತ್ತಿಯಿಂದಲೂ ಜೋಬರ್ಗ್ ತಂಡದ ಸಹಾಯಕ ಕೋಚಿಂಗ್ ಸಿಬ್ಬಂದಿಯಾಗಿ ಸಕ್ರಿಯರಾಗಿದ್ದರು. ತಂಡದ ತಂತ್ರಗಾರಿಕೆ ಹಾಗೂ ಯುವ ಆಟಗಾರರ ಪ್ರತಿಭೆ ಗುರುತಿಸುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದ್ದರು.
ಹೊಸ ಜವಾಬ್ದಾರಿ ವಹಿಸಿಕೊಂಡ ಆಫ್ರಿಕನ್ ದಿಗ್ಗಜ
ಜುಲೈ 30 ರಂದು ಈ ನಿರ್ಧಾರವನ್ನು ಫ್ರಾಂಚೈಸಿ ಅಧಿಕೃತವಾಗಿ ತಿಳಿಸಿದೆ. ಮುಂಬರುವ SA20 ಟೂರ್ನಿಯಲ್ಲಿ ಆಲ್ಬಿ ಮಾರ್ಕೆಲ್ ಮೊದಲ ಬಾರಿಗೆ ಹೆಡ್ ಕೋಚ್ ಆಗಿ ತಂಡವನ್ನು ಮುನ್ನಡೆಸಲಿದ್ದಾರೆ. ಫ್ಲೆಮಿಂಗ್ ರಾಜೀನಾಮೆಯಿಂದ ತೆರವಾಗಿದ್ದ ಸ್ಥಾನವನ್ನು ಭರ್ತಿ ಮಾಡಿರುವ ಮಾರ್ಕೆಲ್, ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸುವ ವಿಶ್ವಾಸದಲ್ಲಿದ್ದಾರೆ.
ಮಾರ್ಕೆಲ್ ಅವರ ಅಪಾರ ಅನುಭವ ಮತ್ತು ಫ್ರಾಂಚೈಸಿ ಜೊತೆಗಿನ ನಿಕಟ ಬಾಂಧವ್ಯ ಜೋಬರ್ಗ್ ಸೂಪರ್ ಕಿಂಗ್ಸ್ ತಂಡಕ್ಕೆ ಮುಂದಿನ ಸೀಸನ್ನಲ್ಲಿ ಹೆಚ್ಚಿನ ಶಕ್ತಿ ತುಂಬಲಿದೆ.
