ಬೇಸಿಗೆಯ ಕಡು ಬಿಸಿಲಿನಿಂದ ಬೆಂದು ಹೋಗಿರುವ ಭೂಮಿಗೆ ತಂಪೆರೆಯಲು ಬರುವ ಮೊದಲ ಮಳೆ ಎಲ್ಲರಿಗೂ ಖುಷಿ ನೀಡುತ್ತದೆ. ಮಣ್ಣಿನ ಸುವಾಸನೆ ಮತ್ತು ತಂಪಾದ ಗಾಳಿ ಮನಸ್ಸಿಗೆ ಮುದ ನೀಡುತ್ತದೆ. ಆದರೆ, ಈ ಮೊದಲ ಮಳೆಯನ್ನು ದೂರದಿಂದಲೇ ನೋಡಿ ಆನಂದಿಸಬೇಕೇ ಹೊರತು, ಅದರಲ್ಲಿ ನೆನೆಯಬಾರದು ಎಂದು ಹಿರಿಯರು ಎಚ್ಚರಿಸುತ್ತಾರೆ. ಇದರ ಹಿಂದೆ ಕೇವಲ ಮೂಢನಂಬಿಕೆಯಿಲ್ಲ, ಬದಲಿಗೆ ಬಲವಾದ ವೈಜ್ಞಾನಿಕ ಮತ್ತು ಆರೋಗ್ಯದ ಕಾರಣಗಳಿವೆ.
ವಾತಾವರಣದ ಮಾಲಿನ್ಯ ಮತ್ತು ಆಮ್ಲೀಯತೆ
ಬೇಸಿಗೆಯ ತಿಂಗಳುಗಳಲ್ಲಿ ಗಾಳಿಯಲ್ಲಿ ಧೂಳು, ಕಾರ್ಖಾನೆಗಳ ಹೊಗೆ, ವಾಹನಗಳ ವಿಷಕಾರಿ ಅನಿಲಗಳು (ಸಲ್ಫರ್ ಡೈಆಕ್ಸೈಡ್ ಮತ್ತು ನೈಟ್ರೋಜನ್ ಆಕ್ಸೈಡ್) ವಾತಾವರಣದ ಮೇಲ್ಪದರದಲ್ಲಿ ಭಾರಿ ಪ್ರಮಾಣದಲ್ಲಿ ಸಂಗ್ರಹವಾಗಿರುತ್ತವೆ. ವರ್ಷದ ಮೊದಲ ಮಳೆ ಬಂದಾಗ, ಈ ಎಲ್ಲಾ ಹಾನಿಕಾರಕ ರಾಸಾಯನಿಕಗಳು ಮತ್ತು ಮಾಲಿನ್ಯಕಾರಕಗಳು ಮಳೆನೀರಿನೊಂದಿಗೆ ಕರಗಿ ಭೂಮಿಗೆ ಇಳಿಯುತ್ತವೆ. ತಾಂತ್ರಿಕವಾಗಿ ಇದು ಸಂಪೂರ್ಣ ಆಮ್ಲ ಮಳೆಯಲ್ಲದಿದ್ದರೂ, ಮೊದಲ ಮಳೆಯ ನೀರು ತೀವ್ರವಾಗಿ ಕಲುಷಿತಗೊಂಡಿರುತ್ತದೆ ಮತ್ತು ಆಮ್ಲೀಯ ಗುಣವನ್ನು ಹೊಂದಿರುತ್ತದೆ.
ಚರ್ಮದ ಅಲರ್ಜಿ ಮತ್ತು ಸೋಂಕುಗಳು
ಕಲುಷಿತಗೊಂಡ ಮೊದಲ ಮಳೆನೀರು ನಮ್ಮ ಚರ್ಮದ ಮೇಲೆ ಬಿದ್ದಾಗ ತಕ್ಷಣವೇ ಅಡ್ಡಪರಿಣಾಮಗಳು ಉಂಟಾಗಬಹುದು. ಮಳೆನೀರಿನಲ್ಲಿರುವ ರಾಸಾಯನಿಕಗಳು ಚರ್ಮದ ನೈಸರ್ಗಿಕ ತೈಲಾಂಶವನ್ನು ನಾಶಪಡಿಸುತ್ತವೆ. ಇದರಿಂದಾಗಿ, ಚರ್ಮದ ಮೇಲೆ ಕೆಂಪು ದದ್ದುಗಳು (Rashes) ಮೂಡುವುದು, ವಿಪರೀತ ತುರಿಕೆ ಮತ್ತು ಅಲರ್ಜಿ ಉಂಟಾಗುವುದು. ಶಿಲೀಂಧ್ರಗಳ ಸೋಂಕು ಬರಬಹುವುದು.
ದಿಢೀರ್ ಹವಾಮಾನ ಬದಲಾವಣೆ ಮತ್ತು ಜ್ವರ
ಬೇಸಿಗೆಯ ಅತಿಯಾದ ತಾಪಮಾನಕ್ಕೆ ನಮ್ಮ ದೇಹವು ಒಗ್ಗಿಕೊಂಡಿರುತ್ತದೆ. ಇಂತಹ ಸಂದರ್ಭದಲ್ಲಿ ಹಠಾತ್ ಆಗಿ ಬೀಳುವ ತಂಪಾದ ಮಳೆನೀರಿಗೆ ದೇಹವನ್ನು ಒಡ್ಡಿದಾಗ, ದೇಹದ ಆಂತರಿಕ ಉಷ್ಣಾಂಶದಲ್ಲಿ ತೀವ್ರ ಏರುಪೇರಾಗುತ್ತದೆ. ಇದು ದೇಹದ ರೋಗನಿರೋಧಕ ಶಕ್ತಿಯನ್ನು ತಾತ್ಕಾಲಿಕವಾಗಿ ಕುಗ್ಗಿಸುತ್ತದೆ. ಪರಿಣಾಮವಾಗಿ, ಗಾಳಿಯಲ್ಲಿರುವ ವೈರಸ್ಗಳು ಸುಲಭವಾಗಿ ದೇಹವನ್ನು ಸೇರಿ ನೆಗಡಿ, ಕೆಮ್ಮು, ಸೈನಸ್, ಗಂಟಲು ನೋವು ಮತ್ತು ವೈರಲ್ ಜ್ವರಕ್ಕೆ ಕಾರಣವಾಗುತ್ತವೆ.
ಇದನ್ನೂ ಓದಿ:
ಗಾಳಿಯಲ್ಲಿ ಹರಡುವ ಶಿಲೀಂಧ್ರಗಳು ಮತ್ತು ಉಸಿರಾಟದ ತೊಂದರೆ
ಬೇಸಿಗೆಯ ಉದ್ದಕ್ಕೂ ಮಣ್ಣು ಮತ್ತು ಮರಗಳಲ್ಲಿ ಒಣಗಿ ಸುಪ್ತವಾಗಿದ್ದ ಶಿಲೀಂಧ್ರಗಳು (Fungi) ಮತ್ತು ಬ್ಯಾಕ್ಟೀರಿಯಾಗಳು ಮೊದಲ ಮಳೆ ಬಿದ್ದ ತಕ್ಷಣ ಸಕ್ರಿಯಗೊಳ್ಳುತ್ತವೆ. ಮಳೆಹನಿಗಳು ಒಣ ನೆಲಕ್ಕೆ ಅಪ್ಪಳಿಸಿದಾಗ, ಈ ಶಿಲೀಂಧ್ರಗಳ ಲಕ್ಷಾಂತರ ಸೂಕ್ಷ್ಮ ಬೀಜಕಗಳು (Spores) ದಿಢೀರ್ ಆಗಿ ಗಾಳಿಯಲ್ಲಿ ಬಿಡುಗಡೆಯಾಗುತ್ತವೆ. ಮೊದಲ ಮಳೆಗೆ ಹೊರಗೆ ನಿಂತು ನೆನೆಯುವಾಗ ಈ ಕಲುಷಿತ ಗಾಳಿಯನ್ನು ಉಸಿರಾಡುವುದರಿಂದ ಆಸ್ತಮಾ (Asthma), ಅಲರ್ಜಿಕ್ ಸೈನಸೈಟಿಸ್ ಮತ್ತು ಉಸಿರಾಟದ ಸೋಂಕುಗಳು ತಕ್ಷಣವೇ ಉಲ್ಬಣಗೊಳ್ಳುತ್ತವೆ.
ಕೂದಲಿನ ಆರೋಗ್ಯಕ್ಕೆ ಹಾನಿ
ಮೊದಲ ಮಳೆಯ ನೀರು ತಲೆಗೆ ಬಿದ್ದಾಗ ಕೂದಲಿನ ಬೇರುಗಳು ದುರ್ಬಲಗೊಳ್ಳುತ್ತವೆ. ಮಳೆನೀರಿನಲ್ಲಿರುವ ಧೂಳು ಮತ್ತು ಆಮ್ಲೀಯ ಅಂಶಗಳು ತಲೆಯಲ್ಲಿ ಹೊಟ್ಟು ಮತ್ತು ತುರಿಕೆಯನ್ನು ಉಂಟುಮಾಡುತ್ತವೆ. ಇದರಿಂದ ಕೂದಲು ಒರಟಾಗುವುದಲ್ಲದೆ, ವಿಪರೀತವಾಗಿ ಉದುರಲು ಪ್ರಾರಂಭವಾಗುತ್ತದೆ.
