November 18, 2026
Wednesday, November 18, 2026
spot_img

ಭಾರತ-ಫಿಲಿಪೈನ್ಸ್ ವ್ಯಾಪಾರ ಮೈತ್ರಿಗೆ ಹೊಸ ವೇಗ: 2030ರ ವೇಳೆಗೆ 10 ಬಿಲಿಯನ್ ಡಾಲರ್ ವಹಿವಾಟಿನ ಗುರಿ

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:‌

ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಇತ್ತೀಚಿನ ಫಿಲಿಪೈನ್ಸ್ ಭೇಟಿಯು ಉಭಯ ದೇಶಗಳ ನಡುವಿನ ದ್ವಿಪಕ್ಷೀಯ ವ್ಯಾಪಾರ, ಹೂಡಿಕೆ ಮತ್ತು ತಂತ್ರಜ್ಞಾನ ಸಹಕಾರಕ್ಕೆ ಹೊಸ ಚೈತನ್ಯ ನೀಡಿದೆ. ಇದರ ಮುಂದುವರಿದ ಭಾಗವಾಗಿ, ಆಸಿಯಾನ್ ಪ್ರದೇಶದಲ್ಲಿ ವ್ಯಾಪಾರ ಅವಕಾಶಗಳನ್ನು ಅನ್ವೇಷಿಸಲು 2027ರ ಮಾರ್ಚ್‌ನಲ್ಲಿ 200ಕ್ಕೂ ಹೆಚ್ಚು ಭಾರತೀಯ ಸ್ಟಾರ್ಟ್‌ಅಪ್‌ಗಳನ್ನು ಫಿಲಿಪೈನ್ಸ್‌ಗೆ ಕರೆತರಲು ‘ಇಂಡಿಯಾ ಬ್ಯುಸಿನೆಸ್ ಫೋರಂ’ (IBF) ಯೋಜನೆ ರೂಪಿಸಿದೆ.

ವ್ಯಾಪಾರ ವಹಿವಾಟಿಗೆ ಭಾರೀ ಉತ್ತೇಜನ

ಪ್ರಧಾನಿ ಮೋದಿ ಅವರ ಭೇಟಿಯು ಭಾರತ ಮತ್ತು ಫಿಲಿಪೈನ್ಸ್ ಉದ್ಯಮಿಗಳಲ್ಲಿ ಹೊಸ ಉತ್ಸಾಹ ಮೂಡಿಸಿದೆ. ಫಿಲಿಪೈನ್ಸ್‌ನಲ್ಲಿರುವ ಭಾರತೀಯ ರಾಯಭಾರಿ ಕಚೇರಿಯ ಆಶ್ರಯದಲ್ಲಿ ಕಾರ್ಯನಿರ್ವಹಿಸುವ ಇಂಡಿಯಾ ಬ್ಯುಸಿನೆಸ್ ಫೋರಂ ಅಧ್ಯಕ್ಷ ದಿಲೀಪ್ ತಿವಾರಿ ಮಾತನಾಡಿ, “ದೇಶದ ಪ್ರಧಾನಿ ಭೇಟಿ ನೀಡಿದಾಗ ಉದ್ಯಮಿಗಳಲ್ಲಿ ಹೆಚ್ಚಿನ ವಿಶ್ವಾಸ ಮೂಡುತ್ತದೆ. ಇದು ಫಿಲಿಪೈನ್ಸ್‌ನಲ್ಲಿ ನೆಲೆಸಿರುವ ಭಾರತೀಯರಿಗೂ ನೈತಿಕ ಸ್ಥೈರ್ಯ ನೀಡಿದೆ” ಎಂದಿದ್ದಾರೆ.

ಪ್ರಸ್ತುತ ಭಾರತ ಮತ್ತು ಫಿಲಿಪೈನ್ಸ್ ನಡುವಿನ ದ್ವಿಪಕ್ಷೀಯ ವ್ಯಾಪಾರವು ಸುಮಾರು 4 ಬಿಲಿಯನ್ ಅಮೆರಿಕನ್ ಡಾಲರ್‌ಗಳಷ್ಟಿದ್ದು, 2030ರ ವೇಳೆಗೆ ಇದನ್ನು 10 ಬಿಲಿಯನ್ ಡಾಲರ್‌ಗಳಿಗೆ ಹೆಚ್ಚಿಸುವ ಮಹತ್ವಾಕಾಂಕ್ಷೆಯ ಗುರಿ ಹೊಂದಲಾಗಿದೆ. ಉದ್ದೇಶಿತ ಆದ್ಯತಾ ವ್ಯಾಪಾರ ಒಪ್ಪಂದವು (PTA) ಎರಡೂ ಮಾರುಕಟ್ಟೆಗಳಲ್ಲಿ ಹೊಸ ಅವಕಾಶಗಳನ್ನು ತೆರೆಯಲು ಸಹಕಾರಿಯಾಗಲಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಸ್ಟಾರ್ಟ್‌ಅಪ್‌ಗಳಿಗೆ ಉಚಿತ ವೇದಿಕೆ

2027ರ ಮಾರ್ಚ್‌ನಲ್ಲಿ ನಡೆಯಲಿರುವ ಬೃಹತ್ ತಂತ್ರಜ್ಞಾನ ಮತ್ತು ಸ್ಟಾರ್ಟ್‌ಅಪ್ ಶೃಂಗಸಭೆಯಲ್ಲಿ ಭಾರತದ ವಿವಿಧ ರಾಜ್ಯಗಳ 200ಕ್ಕೂ ಹೆಚ್ಚು ಸ್ಟಾರ್ಟ್‌ಅಪ್‌ಗಳು ಭಾಗವಹಿಸಲಿವೆ,. ಆರಂಭಿಕ ಹಂತದ ಸ್ಟಾರ್ಟ್‌ಅಪ್‌ಗಳಲ್ಲಿ ಹೂಡಿಕೆಗೆ ಹೆಚ್ಚಿನ ಹಣವಿರುವುದಿಲ್ಲ ಎಂಬುದನ್ನು ಮನಗಂಡು, ಫಿಲಿಪೈನ್ಸ್‌ನಲ್ಲಿ ಉದ್ಯಮ ಆರಂಭಿಸಲು ಅವರಿಗೆ ಸಂಪೂರ್ಣ ಉಚಿತವಾಗಿ ವೇದಿಕೆ ಕಲ್ಪಿಸಲಾಗುವುದು ಎಂದು ದಿಲೀಪ್ ತಿವಾರಿ ತಿಳಿಸಿದ್ದಾರೆ.

ಆಸಿಯಾನ್ ಮಾರುಕಟ್ಟೆಗೆ ಫಿಲಿಪೈನ್ಸ್ ಹೆಬ್ಬಾಗಿಲು

ಈ ವರ್ಷದ ಆರಂಭದಲ್ಲಿ ಫಿಲಿಪೈನ್ಸ್ ಅಧ್ಯಕ್ಷ ಫರ್ಡಿನಾಂಡ್ ಮಾರ್ಕೋಸ್ ಜೂನಿಯರ್ ಅವರು ಭಾರತಕ್ಕೆ ಭೇಟಿ ನೀಡಿದ್ದಾಗ ಉಭಯ ದೇಶಗಳ ಸಂಬಂಧವನ್ನು ಕಾರ್ಯತಂತ್ರದ ಪಾಲುದಾರಿಕೆಗೆ ಉನ್ನತೀಕರಿಸಲಾಗಿತ್ತು. ಈ ಕುರಿತು ಮಾತನಾಡಿದ IBF ಮಾಹಿತಿ ತಂತ್ರಜ್ಞಾನ ಮತ್ತು ನಾವೀನ್ಯತೆ ವಿಭಾಗದ ನಿರ್ದೇಶಕ ಹರಿಓಂ ಖಂಡೇಲ್ವಾಲ್, “ಭಾರತವು ತಂತ್ರಜ್ಞಾನ ಮತ್ತು ನಾವೀನ್ಯತೆಯಲ್ಲಿ ಮುಂಚೂಣಿಯಲ್ಲಿದೆ. ಭಾರತೀಯ ಕಂಪನಿಗಳು ಆಗ್ನೇಯ ಏಷ್ಯಾ ಮತ್ತು ಆಸಿಯಾನ್ ರಾಷ್ಟ್ರಗಳಿಗೆ ತಮ್ಮ ವ್ಯಾಪಾರವನ್ನು ವಿಸ್ತರಿಸಲು ಫಿಲಿಪೈನ್ಸ್ ಒಂದು ಪ್ರಮುಖ ಹೆಬ್ಬಾಗಿಲಾಗಲಿದೆ” ಎಂದು ಹೇಳಿದ್ದಾರೆ.

ಇದನ್ನೂ ಓದಿ:

ಯುವಜನತೆ ಮತ್ತು ತಳಮಟ್ಟದ ಸಹಕಾರಕ್ಕೆ ಒತ್ತು

ಪ್ರಧಾನಿ ಮೋದಿ ಅವರ ರಾಜತಾಂತ್ರಿಕ ದೂರದೃಷ್ಟಿಯನ್ನು ತಳಮಟ್ಟದ ವಾಣಿಜ್ಯ ಫಲಿತಾಂಶಗಳಾಗಿ ಪರಿವರ್ತಿಸುವುದು ತಮ್ಮ ಮುಖ್ಯ ಗುರಿಯಾಗಿದೆ ಎಂದು IBF ಮಂಡಳಿಯ ನಿರ್ದೇಶಕಿ ಅಪರ್ಣಾ ವೀರಾ ತಿಳಿಸಿದ್ದಾರೆ. ಭಾರತದ ‘ವಿಕಸಿತ ಭಾರತ 2047’ ಗುರಿ ಮತ್ತು ಫಿಲಿಪೈನ್ಸ್‌ನ ಅಭಿವೃದ್ಧಿ ಆಕಾಂಕ್ಷೆಗಳಿಗೆ ಪೂರಕವಾಗಿ, ಯುವ ವಿನಿಮಯ, ಸ್ಟಾರ್ಟ್‌ಅಪ್ ಹ್ಯಾಕಥಾನ್‌ಗಳು ಮತ್ತು ಸಾಂಸ್ಕೃತಿಕ ವಿನಿಮಯದ ಮೂಲಕ ಉಭಯ ದೇಶಗಳ ಉದ್ಯಮಿಗಳ ನಡುವೆ ಬಾಂಧವ್ಯ ವೃದ್ಧಿಸಲು ಈ ಶೃಂಗಸಭೆ ನೆರವಾಗಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

Must Read

Skip to toolbar